Satara Politics: सातारा जिल्हा परिषदेत २० कोटींचा ‘सेस फंड’ घोटाळा?

जवळपास 20 कोटींचा निधी गेल्या तीन वर्षांमध्ये वळवण्यात आला असून, मुख्य कार्यकारी अधिकारी यांनी वीस कोटींचा जिल्हा परिषदेला चूना लावला आहे.

• सातारा जिल्हा परिषदेत २० कोटींचा ‘सेस फंड’ घोटाळ्याचा आरोप
• सीईओ नागराजन यांनी २० कोटींचा चुना लावल्याचा संजय गाडे यांचा थेट आरोप
• नागराजन यांच्या विरोधात रिपब्लिकन गवई गटाचे आंदोलन

Satara Politics: सातारा जिल्हा परिषद अध्यक्ष पदाचा हाय व्होल्टेज ड्रामा जिल्हा परिषद परिसरात सुरू असतानाच, याच जिल्हा परिषदेतील सेस फंड तिजोरीत खडखडाट करणाऱ्या मुख्य कार्यकारी अधिकारी नागराजन यांच्या विरोधात रिपब्लिकन गवई गट आक्रमक झालेला पाहायला मिळाला. जिल्हा परिषद गेटवर जिल्हाध्यक्ष संजय गाडे यांच्या नेतृत्वाखाली रिपाईने घंटानाद आंदोलन केले.

दरम्यान या आंदोलनावेळी बोलताना संजय गाडे म्हणाले की, “सातारा जिल्हा परिषदेतील सेस फंड हा चुकीच्या पद्धतीने प्रशासक तथा मुख्य कार्यकारी अधिकारी याशणी नागराजन यांनी खर्च केला असून, अंगणवाडी इमारतीला नियोजन समितीतून प्रस्तावित निधी मंजूर झालेला असताना देखील जिल्हा परिषद सेसफंडातील लाखो रुपये हे अंगणवाडी इमारतींसाठी चुकीच्या पद्धतीने नियमबाह्य वळवण्यात आले आहेत. त्यांच्या या भूमिकेवर रिपब्लिकन पार्टीला संशय असून नेमके हे पैसे वळवण्याचा उद्देश मुख्य कार्यकारी अधिकारी यांनी स्पष्ट करावा.

जवळपास 20 कोटींचा निधी गेल्या तीन वर्षांमध्ये वळवण्यात आला असून, मुख्य कार्यकारी अधिकारी यांनी वीस कोटींचा जिल्हा परिषदेला चूना लावला आहे. असा थेट आरोप गाडे यांनी केला तर चुकीच्या पद्धतीने केलेल्या खर्चाची स्वतंत्रपणे चौकशी व्हावी व दोषीवर तात्काळ कारवाई व्हावी अशी मागणी यावेळी केली. आंदोलनावेळी मुख्य कार्यकारी अधिकारी यांच्या विरोधात जोरदार घोषणाबाजी करण्यात आली. यावेळी महिला आघाडी अध्यक्ष रेखा सकट, गणेश भिसे,विशाल कांबळे,आशुतोष वाघमोडे यासह कार्यकर्ते उपस्थित होते.