भाजपवर टीका करुन शहाजी बापू पाटील फसले? चौकशीचा ससेमिरा अन् विरोधकांचे टीकास्त्र

माजी आमदार शहाजी बापू पाटील यांनी भाजपविरोधात आक्रमक भूमिका घेतली. यानंतर त्यांच्या अडचणींमध्ये वाढ झाली आहे. विरोधकांनी जोरदार टीका केली आहे तर निवडणूक आयोगाच्या तपासणीचा ससेमीर लावला.

• शहाजी बापू पाटील यांचा भाजपवर निशाणा
• बापू पाटील यांची निवडणूक आयोग अधिकाऱ्यांकडून चौकशी
• उद्धव ठाकरेंची शहाजी बापू पाटलांवर टीका

Shahaji Bapu Patil : सांगोला : राज्यामध्ये स्थानिक स्वराज्य संस्थांच्या निवडणुकांची (Local Body Elections) रणधुमाळी सुरु आहे. आज (दि.02) नगर परिषद आणि नगर पंचायतीसाठी मतदान प्रक्रिया पार पडत आहे. निवडणुकीच्या प्रचारामध्ये नेत्यांनी एकमेंकावर जोरदार टीकास्त्र डागले. महायुतीच्या मित्रपक्षांनी एकमेकांवर जोरदार आरोप प्रत्यारोप केले आहेत. यामध्ये शिंदे गटाचे नेते आणि भाजपमध्ये  जोरदार राजकीय वादंग निर्माण झाल्याचे दिसून आले. यामध्ये एकनाथ शिंदे यांच्या पक्षातील माजी आमदार शहाजी बापू पाटील (Shahaji Bapu Patil) यांनी भाजपविरोधात आक्रमक भूमिका घेतली. यामुळे मात्र शहाजी बापू पाटील यांच्या अडचणींमध्ये वाढ झाली आहे. विरोधकांनी जोरदार टीका केली आहे तर निवडणूक आयोगाच्या तपासणीचा ससेमीरा देखील त्यांच्या मागे लागला आहे.

उपमुख्यमंत्री एकनाथ शिंदे यांच्या शिवसेनेचे माजी आमदार शहाजीबापू पाटील यांच्या अडचणींमध्ये वाढ झाली. त्यांनी भाजपविरोधात आक्रमक भूमिका घेतल्यानंतर त्यांच्या कार्यालयाची एलसीबी पथक आणि निवडणूक आयोगाच्या भरारी पथकाकडून तपासणी करण्यात आली. या कारवाई दरम्यान कार्यालयाची झाडाझडती घेण्यात आली असून संपूर्ण प्रक्रियेचे व्हिडिओ रेकॉर्डिंग करण्यात आले आहे. अधिकाऱ्यांनी कार्यालयातील उपस्थितांना बाहेर जाण्यास मज्जाव केला होता. निवडणुकीच्या पार्श्वभूमीवर ही कारवाई करण्यात आल्याचे समजते. या घटनेमुळे राजकीय वर्तुळात खळबळ उडाली असून, प्रशासनाकडून अधिक तपास सुरू आहे. मागील काही दिवसांपासून शहाजी बापू पाटील हे भाजप विरोधी भूमिका घेत होते.

हे देखील वाचा : ‘निवडणूक आयोगाला सोट्याने हाणायला हवे’; काँग्रेसच्या ‘या’ पदाधिकाऱ्याचे खळबळजनक विधान

शिंदे गटाचे नेते शहाजीबापू पाटील यांनी भाजपने पैसे वाटप केल्याचे म्हणत नाराजी व्यक्त केली होती. तसेच सांगोल्यामध्ये त्यांना डावल्याचा आरोप देखील केला होता. यानंतर महायुतीमधील अंतर्गत वाद चव्हाट्यावर आले. यावरुन विरोधकांनी देखील आक्रमक पवित्रा घेतला आहे. ठाकरे गटाचे प्रमुख उद्धव ठाकरे यांनी शहाजी बापू पाटील यांच्यावर टीकास्त्र डागले. उद्धव ठाकरे म्हणाले की, आपल्यातला एक गद्दार गेला त्याचा डायलॉग फेमस झाला होता काय झाडी काय डोंगर वगैरे.. आता त्याला जाऊन विचारा कारण त्याच्यावर ईडीची धाड पडली आहे. आता म्हण काय धाडी, काय पोलीस आणि जा आता तुरुंगात. या लोकांना मुंबईची वाट लावत आहेतच. नाशिकमध्ये साधुग्रामसाठी १७०० हून जास्त झाडं कापायचा निर्णय घेतला आहे. मला नाशिकच्या लोकांनी फोन केला की आता काय करायचं? मी त्यांना म्हटले तपोवनातली झार्ड भाजपात गेली अशी बातमी द्या, म्हणजे झाडांची कत्तल थांबेल. झाडं भाजपात जाऊ शकत नाहीत म्हणून त्यांची कत्तल चालवली आहे. हिंदुत्वाचे नाव घ्यायचं आणि कंत्राटदारांचं काम करायचं. यालाच म्हणतात रामाचे नाव घ्यायचं आणि या गोष्टी करायच्या, याला म्हणतात मुँह में राम नाम और बगल में अदाणी अशीही टीका उद्धव ठाकरेंनी केली आहे.

हे देखील वाचा : “भावकीतील वाद जवळून पाहिलाय..; राणे बंधूंच्या कडाक्याच्या वादात रोहित पवारांची उडी