लहानांपासून मोठ्यांपर्यंत आईस्क्रीम सर्वांच्या आवडीची. आईस्क्रीम मुळात कोणाला आवडत नाही. उन्हाळ्यात तर अनेकांसाठी आईस्क्रीम खाणे म्हणजे स्वर्गसुख बनते. लहानांसाठी ट्रीट असो वा जेवणानंतरची गोड परंपरा आईस्क्रीम अनेकांना आनंदी करण्याचे काम करते. आईस्क्रीम खाण्यासाठी कधीही आणि कोणालाही विचारले तरी त्याचे उत्तर नाही म्हणून येऊच शकत नाही. काही आईस्क्रीमप्रेमी तर आजारी असतानाही आईस्क्रीम खाण्याची संधी चुकवत नाही.
आजचा विशेष दिवस हा जगभरात प्रसिद्ध असणाऱ्या आईस्क्रीमचा. आज 17 जुलै रोजी संपूर्ण देशभरात जागतिक आईस्क्रीम दिवस साजरा केला जात आहे. अनेक देशातील लोक आईस्क्रीमसाठी आपली पसंती दर्शवतात. गोड आणि थंड आईस्क्रीमची चव फार आल्हादायक वाटते. मात्र सर्वांची आवडती ही आईस्क्रीम नक्की कुठून आली? किंवा हिचा शोध नक्की कुणी आणि कसा लावला असावा? याचा विचार कधी तुम्ही केला आहे का? आज आम्ही तुम्हाला या आईस्क्रीमदिनी आईस्क्रीमची एक मनोरंजक कथा सांगत आहोत.
सर्वात पहिली आईस्क्रीम अलेक्झांडरसाठी बनवण्यात आली. अलेक्झांडर हा त्याकाळचा एक प्रसिद्ध योद्धा होता. सुमारे अडीच हजार वर्षांपूर्वी इजिप्त जिंकल्यावर त्याने भरपूर आइस्क्रीम बनवण्याची ऑर्डर दिली. अलेक्झांडरला थंड आइस्क्रीमचा आनंद लुटता यावा म्हणून सैनिकांनी डोंगरावरील गोठलेला बर्फ आणून अनेक खड्ड्यांमध्ये भरला असल्याचेही सांगीतले जाते. इसवी सनाच्या पहिल्या शतकात रोमचा राजा नीरो याने आपल्या सेवकांना डोंगरावरून बर्फ आणून त्यात फळांचा रस आणि मध मिसळून थंड मिठाई बनवण्याचे आदेश दिले. हा पदार्थ म्हणजेच आजची आपली सर्वांची लाडकी आईस्क्रीम. त्यामुळेच या राजाने सर्वात आधी आईस्क्रीमचा शोध लावल्याचे सांगितले जाते.
18व्या शतकात अमेरिका आणि ब्रिटनच्या पाककृतींमध्ये आईस्क्रीमचा समावेश आढळून आला. ऑक्सफर्ड इंग्लिश डिक्शनरीनुसार, आइस्क्रीम हा शब्द प्रथम 1744 मध्ये आढळतो. जगातील पहिले आइस्क्रीम पार्लर 1776 मध्ये अमेरिकेत सुरू करण्यात आले.
हेदेखील वाचा – National Ice Cream Day 2024: भारतातील असे एक शहर ज्याला आईस्क्रीम सिटी म्हणून ओळखले जाते…
अमेरिकेचे अध्यक्ष रोनाल्ड रेगन यांनी 1984 मध्ये जुलै महिन्याला राष्ट्रीय आइस्क्रीम महिना म्हणून घोषित केले. आइस्क्रीममुळे पोषण मिळते आणि अमेरिकेतील 90 टक्के लोकांना ते खायला आवडते, असा त्यांचा विश्वास होता. यांनतर सर्वत्र जगभर हा महिन्यात आईस्क्रीम दिवस साजरा करण्याची प्रथा सुरु झाली.
जगभराप्रमाणेच भारतातही अनेक आईसक्रीमप्रेमी आहेत. भारतातील अनेकांना आईसक्रीमची चव फार आवडते. तसेच इथे सिजनल आईसक्रीमचा ट्रेंड फार चालतो. भारतात वेगवगेळ्या सीजनप्रमाणे निरनिराळ्या फ्लेवर्सची आईसक्रीम पाहायला मिळते. आंबा, सिताफळ, टेंडर कोकोनट, फणस, संत्रा अशा विविध फळांचे आइस्क्रीम बनवले आणि विकले जाते.
