शनिवार, 26 सप्टेंबर 2026
सातारा जिल्हा बँक निवडणुकीचे बिगूल वाजले; पहिल्याच दिवशी सहा अर्ज
सातारा : सातारा जिल्हा मध्यवर्ती सहकारी बँकेच्या पंचवार्षिक निवडणुकीसाठी शुक्रवारी नामनिर्देशन अर्ज दाखल करण्यास सुरुवात झाली. पहिल्याच दिवशी विविध मतदारसंघांतून सहा उमेदवारांनी अर्ज दाखल केल्याने निवडणूक प्रक्रियेला सुरुवातीपासूनच वेग आला आहे. कोरेगाव तालुका मतदारसंघातून सुनील रवेलचंद खत्री यांनी दोन नामनिर्देशनपत्रे दाखल केली.
गृहनिर्माण सहकारी संस्था तसेच दूध उत्पादक, पशुपैदास, वराह पालन, कुक्कुटपालन व शेळी-मेंढी पालन संस्था मतदारसंघातून छत्रपती उदयनराजे प्रतापसिंह भोसले यांनी अर्ज दाखल केला. फलटण तालुका विकास सेवा सहकारी संस्था व धान्य अधिकोष मतदारसंघातून संजीवराजे विजयसिंह नाईक-निंबाळकर यांनी उमेदवारी अर्ज भरला. अनुसूचित जाती-जमाती राखीव मतदारसंघातून दीपक प्रल्हाद चव्हाण, नागरी बँका, नागरी सहकारी पतपेढ्या, ग्रामीण बिगरशेती संस्था व पगारदार नोकरांच्या पतसंस्था मतदारसंघातून सुरभी मदन भोसले, तर महिला राखीव मतदारसंघातून अनुपमा शाहूराज फाळके यांनी नामनिर्देशनपत्रे दाखल केली.
दरम्यान, २६ व २७ सप्टेंबर रोजी शासकीय सुट्टी असल्याने या दिवशी अर्ज विक्री व स्वीकारण्याची प्रक्रिया बंद राहणार आहे. त्यानंतर २८ सप्टेंबर ते १ ऑक्टोबरदरम्यान सकाळी ११ ते दुपारी ३ या वेळेत उमेदवारांना अर्ज दाखल करता येणार आहेत. निवडणूक कार्यालयातील गर्दी टाळण्यासाठी अर्ज दाखल करताना केवळ उमेदवार किंवा सूचक यांनीच उपस्थित राहावे, असे निवडणूक निर्णय अधिकारी तथा जिल्हा उपनिबंधक, सहकारी संस्था, सातारा यांनी स्पष्ट केले आहे. समर्थक व इतर व्यक्तींनी कार्यालयात गर्दी करू नये, असे आवाहनही करण्यात आले आहे.
सन २०२६ ते २०३१ या कालावधीसाठी होणाऱ्या या निवडणुकीची प्रक्रिया सुरळीत पार पडण्यासाठी संबंधितांनी निवडणूक यंत्रणेला सहकार्य करावे, असे आवाहन प्रशासनाने केले आहे.
