India Record : 'या' 6 वर्षीय चिमुकलीचा विक्रम पाहिलात का? भल्याभल्यांनाही जमलं नाही ते तिने करून दाखवलं
अवघ्या 6 वर्षे 4 महिने 20 दिवसांच्या आर्या निकी थिन्नालुरीने अरबी समुद्रात तब्बल 17 किलोमीटर पोहत एक अनोखी कामगिरी केली आहे. आंध्र प्रदेशातील विजयवाडा येथील आर्याने अटल सेतूपासून मुंबईच्या गेटवे ऑफ इंडियापर्यंतचे अंतर 3 तास 51 मिनिटांत विक्रमी (India Record) पूर्ण केले. तिच्या या कामगिरीची सध्या सर्वत्र चर्चा होत आहे.
समुद्रातील लाटा, पाण्याचा प्रवाह आणि बदलत्या परिस्थितीचा सामना करत आर्याने सलग पोहत हे अंतर पूर्ण केले. स्विमिंग पूलच्या तुलनेत समुद्रात पोहणे अधिक आव्हानात्मक मानले जाते. अशा परिस्थितीत आर्याने दाखवलेला आत्मविश्वास, जिद्द आणि चिकाटी विशेष कौतुकास्पद ठरली आहे.
आर्याने यापूर्वीच जलतरणाच्या क्षेत्रात तीन वर्ल्ड रेकॉर्ड आपल्या नावावर केले आहेत. कमी वयातच लांब पल्ल्याच्या पोहण्याचे कठीण आव्हान स्वीकारत तिने आपल्या कामगिरीत आणखी एका विक्रमाची भर घातली आहे. तिच्या या यशामागे नियमित सराव, शिस्त आणि कुटुंबाचे सातत्यपूर्ण प्रोत्साहन महत्त्वाचे ठरले आहे.
ही उल्लेखनीय कामगिरी केल्यानंतर आर्या आपल्या कुटुंबासह शिर्डीला पोहोचली. तिने श्री साईबाबांचे दर्शन घेत आशीर्वाद घेतला. यावेळी तिच्या जलतरणाच्या कामगिरीसाठी मिळालेली ट्रॉफीही तिच्यासोबत होती. शिर्डीत तिच्या या अनोख्या कामगिरीची माहिती समोर आल्यानंतर तिचे कौतुक आणि अभिनंदन करण्यात आले.
Womens League : वुमन्स कॉर्पोरेट टी-20 लीगमध्ये इम्प्रिंट डिस्प्ले संघाला विजेतेपद
अवघ्या 6 वर्षांच्या वयात तीन वर्ल्ड रेकॉर्ड आणि आता अरबी समुद्रात 17 किलोमीटरची आव्हानात्मक टप्पा पूर्ण करणाऱ्या आर्याने जलतरणाच्या क्षेत्रात आपली वेगळी ओळख निर्माण केली आहे. तिच्या या कामगिरीमागे कठोर मेहनत, नियमित सराव आणि कुटुंबाचा भक्कम पाठिंबा असल्याचे सांगितले जात आहे. आर्याच्या पुढील कामगिरीकडे आता जलतरणप्रेमींचे लक्ष लागले आहे.
.png "Videos"){kind=small}
