बुधवार, 7 ऑक्टोबर 2026
Pune Grand Tour : पुणे ग्रँड टूरला UCI 2.1 श्रेणी; 2027 मध्ये आंतरराष्ट्रीय सायकलपटूंची स्पर्धा रंगणार
भारतीय सायकलिंग क्षेत्रासाठी महत्त्वाची बातमी समोर आली आहे. बजाज पुणे ग्रँड टूरला (Pune Grand Tour) UCI 2.2 वरून UCI 2.1 श्रेणीत बढती मिळाली आहे. त्यामुळे 2027 मध्ये होणाऱ्या या स्पर्धेत अधिक दर्जेदार आंतरराष्ट्रीय सायकलपटू सहभागी होण्याची शक्यता आहे. विशेष म्हणजे, पुण्याला 2032 च्या UCI रोड वर्ल्ड चॅम्पियनशिपचे यजमानपद मिळाल्यानंतर लगेचच ही श्रेणीवाढ झाली आहे.
बजाज पुणे ग्रँड टूरची दुसरी आवृत्ती 26 ते 31 जानेवारी 2027 दरम्यान होणार आहे. पुणे आणि पुणे जिल्ह्यातील विविध भागांत सहा टप्प्यांमध्ये ही शर्यत पार पडणार आहे. UCI 2.1 श्रेणीमुळे या स्पर्धेला आंतरराष्ट्रीय स्तरावर आणखी महत्त्व प्राप्त झाले असून, मजबूत संघ आणि अनुभवी सायकलपटूंच्या सहभागामुळे स्पर्धेची रंगत वाढणार आहे.
मॉन्ट्रियल, कॅनडा येथे झालेल्या UCI काँग्रेसमध्ये पुण्याला 2032 UCI रोड वर्ल्ड चॅम्पियनशिपचे यजमानपद देण्यात आले. रोड सायकलिंगमधील सर्वोच्च जागतिक स्पर्धेचे यजमानपद मिळवणारे पुणे हे भारतातील पहिले शहर ठरले आहे.
या पार्श्वभूमीवर बजाज पुणे ग्रँड टूरची श्रेणीवाढ भारतीय सायकलिंगसाठी महत्त्वाची मानली जात आहे. या स्पर्धेमुळे पुण्यातील रस्ते, भौगोलिक विविधता आणि सायकलिंग संस्कृती आंतरराष्ट्रीय स्तरावर पोहोचण्यास मदत होणार आहे.
जानेवारी 2026 मध्ये झालेल्या बजाज पुणे ग्रँड टूरच्या पहिल्या आवृत्तीला मोठा प्रतिसाद मिळाला होता. या स्पर्धेत 35 देशांतील 29 संघ आणि 171 सायकलपटूंनी सहभाग घेतला होता. शर्यतीच्या मार्गावर सुमारे 25 लाख प्रेक्षक उपस्थित होते.
या यशामुळे भारतीय आंतरराष्ट्रीय सायकलिंग कॅलेंडरमध्ये पुणे ग्रँड टूरने आपले स्थान निर्माण केले. आता UCI 2.1 श्रेणीमुळे या स्पर्धेचा दर्जा आणखी उंचावणार आहे.
UCI 2.2 वरून UCI 2.1 श्रेणीत बढती मिळाल्याने ही स्पर्धा आंतरराष्ट्रीय रोड रेसिंगच्या Class 2 वरून Class 1 स्तरावर पोहोचणार आहे.
यामुळे सायकलपटूंना अधिक UCI रँकिंग गुणांसाठी स्पर्धा करण्याची संधी मिळणार आहे. तसेच अधिक मजबूत आंतरराष्ट्रीय संघ आणि खेळाडू पुण्यात सहभागी होण्याची शक्यता आहे. त्यामुळे प्रेक्षकांना सहाही टप्प्यांमध्ये उच्च दर्जाची स्पर्धा पाहायला मिळेल.
2027 च्या स्पर्धेला 26 जानेवारी, प्रजासत्ताक दिनी सुरुवात होणार असून, 31 जानेवारीला अंतिम टप्पा पार पडेल. सहा टप्प्यांमध्ये सायकलपटू पुणे आणि महाराष्ट्रातील विविध भौगोलिक भागांतून मार्गक्रमण करतील.
मुळशी – हिंजवडी
बारामती – सासवड
जुन्नर – राजगुरुनगर
आळंदी – लोणावळा-खंडाळा
लोणावळा – हिंजवडी
PCMC – बालगंधर्व रंगमंदिर
या मार्गात शहरी रस्ते, ग्रामीण भाग, ऐतिहासिक स्थळे आणि पश्चिम घाटातील आव्हानात्मक भूभागाचा समावेश आहे. UCIचे अध्यक्ष डेव्हिड लापार्टिएंट यांनी बजाज पुणे ग्रँड टूरच्या UCI 2.1 श्रेणीतील बढतीचे स्वागत केले. या श्रेणीवाढीमुळे पुण्यात अधिक मजबूत आंतरराष्ट्रीय स्पर्धा आणण्याची संधी उपलब्ध होईल, असे त्यांनी सांगितले.
त्यांच्या मते, अशा स्तरावरील स्पर्धांमुळे सायकलपटूंना आंतरराष्ट्रीय रेसिंगचा अनुभव मिळतो. तसेच संघ, अधिकारी आणि आयोजकांनाही उच्च स्तरावर काम करण्याचा अनुभव मिळतो. 2032 मध्ये UCI रोड वर्ल्ड चॅम्पियनशिपचे यजमानपद स्वीकारण्याच्या तयारीत असलेल्या पुण्यासाठी ही स्पर्धा महत्त्वाची ठरणार आहे.
पुणे जिल्हाधिकारी जितेंद्र दुडी यांनी UCI 2.1 श्रेणीतील बढतीला भारतीय सायकलिंगसाठी महत्त्वाचा टप्पा असल्याचे म्हटले आहे. या स्पर्धेमुळे भारतीय सायकलपटूंना अनुभवी आंतरराष्ट्रीय खेळाडूंविरुद्ध स्पर्धा करण्याच्या अधिक संधी मिळतील, असे त्यांनी सांगितले.
Cycling Federation of Indiaचे महासचिव मनिंदर पाल सिंग यांनीही या श्रेणीवाढीचे स्वागत केले. भारतीय सायकलपटूंना जगभरातील दर्जेदार खेळाडूंसोबत स्पर्धा करण्यासाठी यामुळे मोठे व्यासपीठ उपलब्ध होईल, असे त्यांनी म्हटले.
