स्टार फलंदाज स्टीव्ह स्मिथ निवृत्तीच्या मार्गावर ?
सध्या युरोपियन T20 प्रीमियम लीगमध्ये ‘ॲमस्टरडॅम फ्लेम्स’ या संघाकडून खेळत असलेल्या स्मिथने आपल्या भविष्यातील योजनांबद्दल मोकळेपणाने भाष्य केले आहे. कसोटी क्रिकेटमधील अनिश्चिततेच्या पार्श्वभूमीवर स्मिथने टी-20 क्रिकेटमधील आपल्या सहभागाबाबत उत्साह दाखवला आहे. 2028 मध्ये लॉस एंजिल्स येथे होणाऱ्या ऑलिम्पिक स्पर्धेत क्रिकेटचा समावेश करण्यात आला आहे. या ऐतिहासिक ऑलिम्पिक स्पर्धेत ऑस्ट्रेलियन संघाचे प्रतिनिधित्व करणे हे आपले मुख्य ध्येय असल्याचे स्मिथने स्पष्ट केले आहे.
अॅशेस 2027 मध्ये खेळणार का, या प्रश्नावर उत्तर देताना स्मिथ म्हणाला, “मी सध्या 2027 च्या एशेज मालिकेबाबत कोणताही ठाम निर्णय घेतलेला नाही. माझे वय ३७ वर्षे असून मी आता एका वेळी एकाच मालिकेचा विचार करत पुढे जात आहे. माझे शरीर आणि फॉर्म कशी साथ देतात, यावरच पुढील निर्णय अवलंबून असतील.”
ऑस्ट्रेलियन फलंदाजीचा मुख्य कणा मानल्या जाणाऱ्या स्टीव्ह स्मिथने आपल्या कसोटी कारकिर्दीत अनेक मोठे टप्पे पार केले आहेत. स्मिथने आतापर्यंत १२५ कसोटी सामने खेळले असून त्याच्या नावावर ३७ कसोटी शतकांची नोंद आहे. सध्या आंतरराष्ट्रीय क्रिकेट परिषदेच्या (ICC) पुरुष कसोटी क्रमवारीमध्ये तो इंग्लंडच्या हॅरी ब्रूकनंतर दुसऱ्या क्रमांकावर विराजमान आहे.
ऑस्ट्रेलियन संघ यंदाच्या ऑक्टोबर महिन्यात तीन कसोटी सामन्यांच्या मालिकेसाठी दक्षिण आफ्रिकेच्या दौऱ्यावर जाणार आहे. स्मिथसाठी हा दौरा अत्यंत महत्त्वाचा मानला जात आहे. बॉल टेंपरिंग प्रकरणानंतर स्मिथने आंतरराष्ट्रीय क्रिकेटमध्ये दमदार पुनरागमन करत अनेक विक्रम रचले. मात्र, ज्या देशात त्याच्या कारकिर्दीतील सर्वात मोठा वाद निर्माण झाला होता, त्याच दक्षिण आफ्रिकेत जाऊन खेळणे हे स्मिथसाठी मोठे आव्हान असेल. ऑक्टोबरमध्ये होणाऱ्या या मालिकेतील स्मिथची कामगिरी कशी राहते, याकडे जगभरातील क्रिकेटप्रेमींचे लक्ष लागले आहे.
.png "Videos"){kind=small}
