सोमवार, 26 ऑक्टोबर 2026
येत्या २८ जुलैपासून इंग्लंडमधील बर्मिंगहॅममध्ये राष्ट्रकुल स्पर्धांचे म्हणजेच कॉमनवेल्थ गेम्सचं (Commonwealth Games 2022) आयोजन करण्यात आले आहे. या स्पर्धेमध्ये साधारण ७२ देशांतील पाच हजार ५४ खेळाडू सहभागी होतील ,असा अंदाज आहे. या राष्ट्रकुल स्पर्धेसाठी भारताने आज १८ सदस्यीय वरिष्ठ पुरुष हॉकी संघाची (Indian Hockey Team) घोषणा केली आहे. या संघासाठी मनप्रीत सिंगची (Manpreet Singh) कर्णधारपदी तर ड्रॅग फ्लिकर हरमनप्रीत सिंगची उपकर्णधारपदी निवड करण्यात आली आहे.
[read_also content=”राज्यात दिवसभरात २३५४ नव्या रुग्णांची भर, मुंबईत सर्वाधिक कोरोनाबाधित https://www.navarashtra.com/maharashtra/maharashtra-corona-update-2354-new-patients-registered-in-state-nrsr-294944.html”]
राष्ट्रकुल स्पर्धेमध्ये भारतीय संघाला इंग्लंड, कॅनडा, वेल्स आणि घाना सोबत पूल ‘ब’मध्ये ठेवण्यात आले आहे. भारतीय संघ ३१ जुलै रोजी घानाविरुद्ध खेळेल. गेल्या वर्षी टोक्यो ऑलिम्पिकमध्ये ऐतिहासिक कास्यपदक जिंकून भारतीय संघाचे नेतृत्व करणारा मनप्रीत याही स्पर्धेत भारताचे नेतृत्व करेल.
अनुभवी गोलरक्षक पीआर श्रीजेश आणि कृष्ण बहादूर पाठक यांचा संघात समावेश करण्यात आला आहे. बचावाची जबाबदारी वरुण कुमार, सुरेंद्र कुमार, हरमनप्रीत सिंग, अमित रोहिदास, जुगराज सिंग आणि जरमनप्रीत सिंग यांच्यावर असेल. मनप्रीत सिंग, हार्दिक सिंग, विवेक सागर प्रसाद, समशेर सिंग, आकाशदीप सिंग आणि नीलकांत शर्मा यांना मिडफिल्डमध्ये स्थान मिळाले आहे. मनदीप सिंग, ललित कुमार उपाध्याय, गुरजंत सिंग आणि अभिषेक यांचा स्ट्रायकर म्हणून संघात समावेश करण्यात आला आहे.
हँगझोऊ आशियाई खेळांमध्ये आणि राष्ट्रकुल स्पर्धांमध्ये कमी कालावधी असल्यामुळे हॉकी इंडियाने सुरुवातीला राष्ट्रकुल खेळांसाठी द्वितीय श्रेणीचा संघ पाठवण्याचा निर्णय घेतला होता. मात्र चीनमधील कोविड-१९च्या परिस्थितीमुळे आशियाई क्रीडा स्पर्धा पुढे ढकलण्यात आल्या. त्यामुळे राष्ट्रकुल स्पर्धेसाठी हॉकी इंडियाने एक मजबूत संघ निवडला.
