भारताने हॉकी विश्वचषक ( Hockey World Cup 2026) स्पर्धेची शानदार सुरुवात केली आहे. सलग दोन ऑलिम्पिक पदक जिंकलेल्या भारतीय पुरुष हॉकी संघाने आपल्या विश्वचषक २०२६ मोहिमेची सुरुवात दणदणीत विजयाने केली. स्वातंत्र्यदिनी भारताने पहिला सामना वेल्सविरुद्ध खेळला. हरमनप्रीत सिंगच्या नेतृत्वाखालील संघाने वेल्सचा ३-१ ने पराभव केला आणि स्पर्धेत दमदार सुरुवात केली. कर्णधार हरमनप्रीत सिंगने दोन गोल करून भारताच्या विजयात महत्त्वाची भूमिका बजावली.बेल्जियम आणि नेदरलँड्स यांनी हॉकी विश्वचषक स्पर्धचे सह- आयोजन केले आहे.
अॅमस्टेलवीन येथील वॅग्नर हॉकी स्टेडियमवर भारत आणि वेल्स यांच्यात सामना खेळला गेला. या सामन्यात भारताने सुरुवातीपासूनच आक्रमक खेळ केला. पहिल्या क्वार्टरच्या ७व्या मिनिटाला सुमितने भारतासाठी पहिला गोल केला. ज्यामुळे भारताला १-० अशी आघाडी मिळाली. त्यानंतर कर्णधार हरमनप्रीत सिंगने १०व्या मिनिटाला एका शानदार ड्रॅग-फ्लिकने ही आघाडी २-० अशी वाढवली. पहिल्या हाफच्या अखेरीस भारत २-० ने आघाडीवर होता. दुसऱ्या क्वार्टरमध्ये भारतीय संघाने डिफेन्सिव्ह पवित्रा घेतला, ज्यामुळे त्यांनी स्वतः एकही गोल केला नाही आणि वेल्सलाही आपले खाते उघडण्याची संधी दिली नाही.
तिसऱ्या क्वार्टरच्या सुरुवातीला भारतीय संघाने पुन्हा एकदा आक्रमक पवित्रा घेतला. ४३ व्या मिनिटाला, भारतीय कर्णधाराने गोल करण्याची एक सुवर्णसंधी साधून भारताला ३-० अशी आघाडी मिळवून दिली. तिसऱ्या क्वार्टरच्या अखेरीस, भारताने ३-० अशी आघाडी घेतली, ज्यामुळे विजय निश्चित झाला. चौथ्या क्वार्टरमध्ये वेल्सने पुनरागमन करण्याचा प्रयत्न केला. ५३ व्या मिनिटाला त्यांना पेनल्टी कॉर्नर मिळाला, परंतु भारतीय डिफेन्सने धोका टाळला. परंतु, ५५ व्या मिनिटाला सॅम वेल्शने गोल करून स्कोअर ३-१ असा केला. त्यानंतर वेल्सने दबाव वाढवण्याचा प्रयत्न केला, परंतु भारतीय संघाने शेवटच्या मिनिटांमध्ये आपला संयम राखला आणि त्यांना दुसरा गोल करण्यापासून रोखले.
अंतिम शिट्टी वाजताच भारताने हा सामना ३-१ ने जिंकला. हरमनप्रीत सिंगच्या शानदार दोन गोल्स आणि सुमितच्या एका गोलमुळे भारताला विश्वचषकात विजयी सुरुवात मिळाली. आता, भारतीय संघ हीच लय कायम ठेवून आपला ५१ वर्षांचा विश्वचषक पदकाचा दुष्काळ संपवण्याचा प्रयत्न करेल. टीम इंडिया आता विश्वचषकातील पुढचा सामना १७ ऑगस्ट रोजी इंग्लंडविरुद्ध खेळणार आहे. हा एक महत्त्वपूर्ण सामना असेल.
.png "Videos"){kind=small}
