ICC चा ऐतिहासिक निर्णय! पुढील World Cup मध्ये मोठा बदल, सहभागी संघांच्या संख्येत वाढ

भारताने दक्षिण आफ्रिकेला ५२ धावांनी हरवून विजेतेपद पटकावले. हे त्यांचे पहिलेच विजेतेपद होते. त्यानंतर, आयसीसीने आता २०२९ च्या महिला विश्वचषकाबाबत ऐतिहासिक निर्णय घेतला आहे.

• ICC चा ऐतिहासिक निर्णय
• महिला एकदिवसीय वर्ल्ड कपमध्ये मोठा बदल
• २०२९ पासून १० संघ खेळणार

इंटरनॅशनल क्रिकेट काउंसिल (ICC) ने महिला क्रिकेटला प्रोत्साहन देण्यासाठी एक मोठा आणि ऐतिहासिक निर्णय घेतला आहे. नुकत्याच झालेल्या वर्ल्ड कप २०२५ च्या प्रचंड यशानंतर, ICC ने ७ नोव्हेंबर रोजी घोषणा केली की, २०२९ पासून महिला एकदिवसीय (ODI) वर्ल्ड कपमध्ये सहभागी होणाऱ्या संघांची संख्या वाढवण्यात येणार आहे. या निर्णयानुसार, पुढील महिला वर्ल्ड कपमध्ये ८ ऐवजी १० संघ (Teams) भाग घेतील. महिला क्रिकेटचा जागतिक स्तरावर विकास आणि स्पर्धात्मकता वाढवणे हा या बदलामागील प्रमुख उद्देश आहे.

ICC ने जारी केले अधिकृत निवेदन

ICC ने एका प्रेस रिलीजमध्ये म्हटले आहे: “ICC बोर्ड, महिला वर्ल्ड कपच्या यशाला पुढे घेऊन जाण्यासाठी, पुढील स्पर्धेत सहभागी होणाऱ्या संघांची संख्या (२०२५ मध्ये ८ संघ होते) ८ वरून १० पर्यंत वाढवण्यास सहमत आहे.”

निवेदनात पुढे स्पष्ट करण्यात आले की, महिला क्रिकेटने गेल्या काही वर्षांत नेत्रदीपक प्रगती केली आहे. भारत, ऑस्ट्रेलिया आणि इंग्लंडसारख्या संघांचे सातत्यपूर्ण प्रदर्शन आणि बांगलादेश, आयर्लंड, श्रीलंका यांसारख्या उदयोन्मुख संघांची क्षमता यामुळे स्पर्धात्मकता वाढवण्यासाठी हा विस्तार आवश्यक होता.

हे देखील वाचा: Women Cricket World Cup 2025 च्या अंतिम सामन्याने रचला इतिहास; सामना पाहणाऱ्या लोकांच्या संख्येचा नवा विक्रम 

यशाच्या पार्श्वभूमीवर महत्त्वाचा निर्णय

• प्रेक्षकांचा प्रतिसाद: नुकत्याच झालेल्या महिला वर्ल्ड कप २०२५ मध्ये ८ संघांनी भाग घेतला होता. या स्पर्धेने स्टेडियममध्ये उपस्थितीचा तीन लाख प्रेक्षकांचा विक्रमी आकडा पार केला. तसेच, भारतात सुमारे ५० कोटी प्रेक्षकांनी हा वर्ल्ड कप ऑनलाईन पाहिला, जो एक जागतिक विक्रम आहे.
• भारताचा विजय: नवी मुंबई येथे झालेल्या अंतिम सामन्यात टीम इंडियाने दक्षिण आफ्रिकेचा ५२ धावांनी पराभव करून पहिल्यांदाच ICC वर्ल्ड कपचे विजेतेपद पटकावले होते.
• बदल: वाढते प्रदर्शन स्तर, प्रेक्षकांची वाढती रुची आणि महिला क्रिकेटच्या वाढत्या कक्षा लक्षात घेऊन ICC ने वर्ल्ड कपचा विस्तार करण्याचा निर्णय घेतला. हा बदल २०२९ मध्ये होणाऱ्या वर्ल्ड कपपासून लागू होईल.

उभरत्या संघांना नवी संधी

ICC च्या या ऐतिहासिक निर्णयामुळे महिला क्रिकेटला नवे आयाम मिळतील. या विस्तारामुळे उदयोन्मुख संघांना आंतरराष्ट्रीय स्तरावर आपली क्षमता दाखवण्याची आणि क्रिकेटच्या सर्वोच्च स्तरावर खेळण्याची मोठी संधी मिळणार आहे.

हे देखील वाचा: Women’s ODI World Cup 2025: भारतीय महिला क्रिकेटला मिळाली नवसंजीवनी; ‘या’ विश्वचषकाच्या विजेतेपदाने काय दिले?