चेन्नई सुपर किंग्ज विरुद्ध गुजरात टायटन्स सामन्यात ‘हे’ खेळाडू करतील सुपर कामगिरी; वाचा सविस्तर

IPL 2024 GT vs CSK Match : आयपीएल 2024 स्पर्धेतील 59वा सामना चेन्नई सुपर किंग्स विरुद्ध गुजरात टायटन्स यांच्यात होणार आहे. हा सामना चेन्नई सुपर किंग्ससाठी खूपच महत्त्वाचा आहे. तर गुजरात टायटन्स आता उर्वरित सामने आत्मसन्मानासाठी खेळणार आहेत. त्यामुळे या सामन्यात चेन्नई सुपर किंग्सला विजय सहजासहजी मिळणार नाही.

IPL 2024 स्पर्धेचा अंतिम टप्पा सुरू

आयपीएल 2024 स्पर्धेचा अंतिम टप्पा सुरू झाला असून, प्लेऑफसाठी लढत सुरू आहे. अजूनही कोणत्याही संघाने प्लेऑफमध्ये स्थान निश्चित केले नाही. गणिती भाषेत कोलकाता आणि राजस्थानचे स्थान पक्कं झाले आहे. पण, त्यातही टॉप 4 मध्ये दोलयामान स्थिती आहे. त्यामुळे प्रत्येक सामन्याचं महत्त्व वाढले आहे. आयपीएल स्पर्धेतील 59वा सामना गुजरात टायटन्स आणि चेन्नई सुपर किंग्स यांच्यात होत आहे.

चेन्नईसाठी विजय खूपच महत्त्वाचा

या सामन्यातील विजय चेन्नईसाठी खूपच महत्त्वाचा आहे. कारण प्लेऑफचं गणित सोडवायचं तर हा विजय आवश्यक आहे. पण चेन्नईला पराभवाचं तोंड पाहावं लागलं तर मात्र पुढचं खूपच कठीण होऊन बसेल. दुसरीकडे, गुजरात टायटन्सचं स्पर्धेतील आव्हान संपुष्टात आलं आहे. त्यामुळे उर्वरित सामने आत्मसन्मानासाठी लढताना दिसेल.

आयपीएल स्पर्धेत गुजरात टायटन्स आणि चेन्नई सुपर किंग्स सहा वेळा आमने-सामने आले आहेत. यात दोन्ही संघांनी एकमेकांना 3 वेळा पराभूत केलं आहे. चेन्नई सुपर किंग्स आणि गुजरात टायटन्स हे संघ या वर्षी 26 मार्चला भिडले होते. तेव्हा चेन्नईने 206 धावांचं आव्हान ठेवलं होतं. हा सामना गुजरातने 63 धावांनी गमावला होता. त्यामुळे नेट रनरेटवर फटका बसला होता.

हे खेळाडू सामना फिरवू शकतात

आता गुरुवारच्या सामन्यात गुजरात टायटन्सचे 4, तर चेन्नईचे 7 खेळाडू बेस्ट ठरतील. गुजरात टायटन्सकडून शुबमन गिल, डेविड मिलर, राशीद खान, साई सुदर्शन हे खेळाडू बाजी मारू शकतात. तर चेन्नईकडून ऋतुराज गायकवाड, एमएस धोनी, रवींद्र जडेजा, मोईन अली, शार्दुल ठाकुर, दीपक चहर आणि मथीसा पाथिराना हे खेळाडू सामना फिरवू शकतात.

अहमदाबादच्या नरेंद्र मोदी स्टेडियममध्ये हा सामना होणार आहे. या मैदानातील खेळपट्टी फलंदाज आणि गोलंदाजांना समान फायदा देणारी आहे. या ठिकाणी खेळला गेलेला शेवटचा आयपीएल सामन्यात सर्वोत्तम धावसंख्या झाली होती. गुजरातने आरसीबीला 200 धावांचं आव्हान दिलं होतं. मात्र हे आव्हान आरसीबीने 16 षटकात पूर्ण केलं होतं.

दोन्ही संघांची संभाव्य प्लेइंग 11
गुजरात टायटन्स : मॅथ्यू वेड (विकेटकीपर), शुभमन गिल (कर्णधार), साई सुदर्शन, डेव्हिड मिलर, शाहरुख खान, राहुल तेवतिया, राशिद खान, साई किशोर, नूर अहमद, मोहित शर्मा, संदीप वॉरियर.

इम्पॅक्ट प्लेयर: अभिनव मनोहर

चेन्नई सुपर किंग्स : रचिन रवींद्र, ऋतुराज गायकवाड (कर्णधार), डॅरिल मिशेल, शिवम दुबे, मोईन अली, समीर रिझवी, रवींद्र जडेजा, एमएस धोनी (विकेटकीपर), मिचेल सँटनर, शार्दुल ठाकूर, तुषार देशपांडे.

इम्पॅक्ट प्लेयर: सिमरजीत सिंग