फोटो सौजन्य - सोशल मिडिया
अजिंक्य रहाणे आयपीएल २०२६ मध्ये कोलकाता नाईट रायडर्सचे (KKR) कर्णधारपद भूषवणार आहे, परंतु भारतीय क्रिकेट संघाचा माजी फलंदाज मोहम्मद कैफने केकेआरला त्यांच्या कर्णधारपदाबाबत काही महत्त्वाचा सल्ला दिला आहे. कैफच्या मते, केकेआरने रिंकू सिंगला भावी कर्णधार म्हणून तयार केले पाहिजे. या माजी क्रिकेटपटूच्या मते, ही केकेआरसाठी एक चांगली गुंतवणूक ठरेल. रहाणेने गेल्या हंगामातही संघाचे नेतृत्व केले होते, परंतु संघ प्लेऑफसाठी पात्र ठरू शकला नाही.
तीन वेळा आयपीएल चॅम्पियन ठरलेल्या केकेआर संघाला या हंगामात दुखापतींच्या समस्यांना तोंड द्यावे लागत आहे. हर्षित राणा आणि आकाश दीप स्पर्धेतून बाहेर पडले आहेत, तर मथिशा पाथिरानाला श्रीलंका क्रिकेट बोर्डाकडून अद्याप फिटनेसची परवानगी मिळालेली नाही. संघासमोर गोलंदाजी हे एक आव्हान आहे आणि कर्णधारपद हा देखील एक मोठा मुद्दा आहे. म्हणूनच कैफने म्हटले आहे की, यूपीचा कर्णधार रिंकू सिंग स्वतः चांगली कामगिरी करून एक नेता म्हणून संघाला पुढे नेऊ शकतो.
मोहम्मद कैफ आपल्या यूट्यूब चॅनलवर म्हणाले, ” केकेआरने रिंकू सिंगला आपला भावी कर्णधार म्हणून तयार केले पाहिजे. रिंकू सिंग हा सर्व फॉरमॅटमध्ये खेळणारा खेळाडू आहे. तो कसोटी संघात नसला तरी, सर्व फॉरमॅटमध्ये चांगली फलंदाजी करू शकतो. मी उत्तर प्रदेशचा आहे आणि तो उत्तर प्रदेशसाठी काय करतो हे मला माहीत आहे. अनेक फलंदाज धावा करतात, पण त्याच्या धावा विजयासाठी येतात. त्यामुळे, हा खेळाडू तयार आहे आणि उत्तर प्रदेशचे कर्णधारपद भूषवू शकतो.”
तो पुढे म्हणाला, “कर्णधारपद आणि फलंदाजी दोन्ही एकाच वेळी सांभाळण्याची मानसिक ताकद त्याच्यात आहे. त्यांच्याकडे एक तयार खेळाडू आहे. आता हे पाहायचे आहे की, रहाणेनंतर हंगामाच्या मध्यात ते त्याला कर्णधारपद देतात की उपकर्णधार बनवतात. त्याला फक्त संघात घ्या; ही केकेआरसाठी एक दीर्घकालीन गुंतवणूक असेल.” कैफ असेही म्हणाला की, रहाणेला कर्णधार म्हणून नियुक्त करण्याचा निर्णय केकेआरने थोडा उशिरा घेतला.
रहाणेबद्दल बोलताना कैफ म्हणाला, “तो निर्णय (रहाणेला कर्णधार बनवण्याचा) सुद्धा खूप उशिरा घेण्यात आला. रहाणेला लिलावाच्या शेवटी निवडण्यात आले, याचा अर्थ तो कर्णधारपदाच्या योजनांमध्ये नव्हता. जेव्हा त्यांनी व्यंकटेश अय्यरवर २३-२४ कोटी रुपये खर्च केले, तेव्हा असे वाटत होते की ते भावी कर्णधाराच्या शोधात होते, पण नंतर त्याच्या कर्णधारपदाच्या अनुभवामुळे त्यांनी रहाणेला निवडले.”
.png "Videos"){kind=small}
