“हे भारतीयांच्या रक्ताचे पैसे…”; पाकिस्तानी खेळाडूच्या खरेदीवरून Sunil Gavaskar संतापले, काव्या मारनवर डागली टीकेची तोफ

Sunil Gavaskar on Kavya Maran: भारताचे महान क्रिकेटपटू सुनील गावस्कर (Sunil Gavaskar) यांनी सन ग्रुपच्या मालकीण काव्या मारन आणि फ्रँचायझीवर अत्यंत बोचरी टीका केली आहे.

• “हे भारतीयांच्या रक्ताचे पैसे…”
• पाकिस्तानी खेळाडूच्या खरेदीवरून Sunil Gavaskar संतापले
• काव्या मारनवर डागली टीकेची तोफ

Sunil Gavaskar slams Kavya Maran: इंग्लंडमधील ‘द हंड्रेड’ (The Hundred) या क्रिकेट लीगच्या लिलावात ‘सनरायझर्स लीड्स’ संघाने पाकिस्तानी फिरकीपटू अबरार अहमदला १.९० लाख पाऊंड (सुमारे 2.34 कोटी रुपये) देऊन खरेदी केले आहे. या खरेदीमुळे भारतात संतापाची लाट उसळली असून, भारताचे महान क्रिकेटपटू सुनील गावस्कर (Sunil Gavaskar) यांनी सन ग्रुपच्या मालकीण काव्या मारन (Kavya Maran) आणि फ्रँचायझीवर अत्यंत बोचरी टीका केली आहे. “एखाद्या स्पर्धेचा करंडक जिंकणे हे भारतीयांच्या जीवापेक्षा मोठे आहे का?” असा संतप्त सवाल गावस्कर यांनी विचारला आहे.

काव्या मारन आणि सन ग्रुपवर टीकेची तोफ

‘सनरायझर्स लीड्स’चे मालकी हक्क ‘सन ग्रुप’कडे आहेत, जो आयपीएलमधील ‘सनरायझर्स हैदराबाद’ (SRH) या संघाचाही मालक आहे. लिलावावेळी सीईओ काव्या मारन स्वतः उपस्थित होत्या. भारत-पाकिस्तानमधील तणावपूर्ण संबंध आणि पाकिस्तान पुरस्कृत दहशतवादाच्या पार्श्वभूमीवर एका भारतीय मालकीच्या संघाने पाकिस्तानी खेळाडूवर कोट्यवधी रुपये खर्च केल्याने गावस्कर यांनी ‘मिड-डे’मधील आपल्या स्तंभातून संताप व्यक्त केला आहे.

See more

🚨 MASSIVE STATEMENT 🚨 Sunil Gavaskar Said That Pakistani Player Salary Indirectly Contributing to Harm India 😳 pic.twitter.com/02oBHD4r5M — Incognito Cricket (@Incognitocric) March 16, 2026

“हा भारतीयांच्या रक्ताचा पैसा” – गावस्कर

सुनील गावस्कर यांनी आपल्या लेखात अत्यंत गंभीर मुद्दे उपस्थित केले आहेत. ते म्हणतात “जेव्हा एखादा भारतीय मालक पाकिस्तानी खेळाडूला कोट्यवधी रुपये देतो, तेव्हा त्यातील मोठा हिस्सा कराच्या रूपाने (Tax) पाकिस्तान सरकारकडे जातो. याच पैशाचा वापर भारतविरोधी कारवाया आणि शस्त्र खरेदीसाठी केला जाऊ शकतो.” 2008 चा मुंबई हल्ला, 2019 चा पुलवामा आणि अलीकडील 2025 चा पहलगाम हल्ला यांसारख्या घटनांमुळे भारतीयांच्या भावना संवेदनशील आहेत. अशा परिस्थितीत पाकिस्तानी खेळाडूंना आर्थिक बळ देणे म्हणजे भारतीय जवानांच्या आणि नागरिकांच्या बलिदानाचा अपमान आहे.

प्रशिक्षकांच्या भूमिकेवरही प्रश्नचिन्ह

सनरायझर्स लीड्सचे मुख्य प्रशिक्षक डॅनियल व्हिटोरी आहेत. गावस्कर यांच्या मते, व्हिटोरी हे परदेशी असल्याने त्यांना भारताच्या या संवेदनशील भावना समजणार नाहीत. मात्र, भारतीय मालकांनी या गोष्टीचे भान ठेवायला हवे होते. “केवळ काही देशांचा सहभाग असलेल्या एका लीगचे जेतेपद मिळवणे हे भारतीय सैनिकांच्या जीवापेक्षा मौल्यवान आहे का?” असा रोकडा सवाल त्यांनी सन ग्रुपला विचारला आहे.

सोशल मीडियावर रोष आणि तांत्रिक अडथळे

अबरार अहमदच्या खरेदीनंतर ‘सनरायझर्स लीड्स’च्या अधिकृत ‘X’ (ट्विटर) अकाउंटवर भारतीयांनी मोठ्या प्रमाणात टीका केली. या विरोधानंतर काही काळासाठी संघाचे सोशल मीडिया अकाउंट बंद करण्यात आले होते. परिस्थिती शांत झाल्यानंतर ते पुन्हा सक्रिय झाले. प्रशिक्षक व्हिटोरी यांनी तर उस्मान तारिक या दुसऱ्या एका पाकिस्तानी फिरकीपटूवरही आमची नजर होती, असा खुलासा केल्याने आगीत तेल ओतण्याचे काम झाले आहे. गावस्कर यांच्या या विधानामुळे आता क्रिकेट जगतात आणि सोशल मीडियावर पुन्हा एकदा ‘राष्ट्रवाद विरुद्ध क्रिकेट’ हा वाद पेटला असून, काव्या मारन यांच्या निर्णयावर प्रश्नचिन्ह उपस्थित केले जात आहे.