टीम इंडियाचा मुख्य प्रशिक्षक कोण? द्रविड, लक्ष्मणनंतर ऑस्ट्रेलियाच्या ‘या’ दिग्गज खेळाडूचासुद्धा नकार; बीसीसीआयपुढे मोठा प्रश्न; वाचा सविस्तर

Indian Team Head Coach : भारताचा मुख्य प्रशिक्षक राहुल द्रविडचा टी-20 वर्ल्डकपनंतर कार्यकाळ संपणार आहे. बीसीसीआयने भारतीय संघाच्या मुख्य प्रशिक्षकाची रिक्त होणारी जागा भरण्यासाठी अर्ज मागवले आहे. मात्र, एका पाठोपाठ एक दिग्गज माजी खेळाडू टीम इंडियाचा कोच होण्यास नकार देत आहेत.

भारतीय संघाचा प्रशिक्षक होण्यास नकार

राहुल द्रविडने या पदासाठी पुन्हा अर्ज करण्यास फारशी उत्सुकता दाखवली नाही. दुसरीकडे एनसीएचा प्रमुख व्हीव्हीएस लक्ष्मणनेदेखील भारतीय संघाचा प्रशिक्षक होण्यास नकार दिला आहे. आता ऑस्ट्रेलियाचा माजी प्रशिक्षक जस्टिन लँगरनेदेखील आपण रेसमध्ये नसल्याचे स्पष्ट केले.

जगातील एक मोठी जबाबदारी

भारतीय संघाचा प्रशिक्षक होणे ही जगातील एक मोठी जबाबदारी आहे. जस्टिन लँगर म्हणाला की, जर टायमिंग योग्य नसेल तर हा सर्वात थकवणारा जॉब असणार आहे. आयपीएलच्या यंदाच्या सत्रात जस्टिन लँगर हा लखनऊ सुपर जायंट्सच्या प्रमुख प्रशिक्षकपदाची जबबादारी सांभाळत आहे.

लँगरला अनेकवेळा भारतीय संघाचा प्रशिक्षक होणार का, असे विचारण्यात आले आहे. लँगर याबाबत बोलताना म्हणाला की, ‘भारतीय संघाचा मुख्य प्रशिक्षक होणे हे क्रिकेट जगतातील सर्वात मोठे काम आहे.’

आव्हानात्मक आणि रोमांचक जॉब

तो पुढे म्हणाला की, ‘एक तर एवढं जास्त क्रिकेट होत आहे आणि दुसरी गोष्ट म्हणजे अपेक्षांचे भले मोठे ओझे आहे. हा खूप आव्हानात्मक आणि रोमांचक जॉब आहे. त्यामुळे टायमिंग योग्य असणं गरजेचं आहे. मी ऑस्ट्रेलिया संघासोबत जवळपास चार वर्षे होतो. हा जॉब खूप थकवणारा आहे. राहुल द्रविड आणि रवी शास्त्रीदेखील माझ्या मताशी सहमत असतील.’

जस्टीन लँगर म्हणाला की, भारतीय संघावर जिंकण्याचा प्रचंड दबाव आहे. जो कोणी पुढचा प्रशिक्षक असेल तो खूप उत्साही असला पाहिजे.

बीसीसीआयने गौतम गंभीरशी साधला संपर्क
द्रविडचा उत्तराधिकारी म्हणून बीसीसीआय गौतम गंभीरकडे पाहत आहे. सध्या केकेआरचा मेंटॉर असलेल्या गंभीरशी बीसीसीआयने संपर्क साधल्याचे वृत्त क्रीडा जगतातील एका वृत्तवाहिनी इएसपीएन क्रिकइन्फोने दिले होते.