YouTube सध्या एका नवीन फीचरची चाचणी करत आहे. हे फीचर लाईव्ह स्ट्रीमिंगदरम्यान तुम्हाला पैसे कमवण्याची संधी देईल, ज्यामुळे कमाई आणि प्रेक्षकांचा सहभाग दोन्ही वाढेल. ‘गिफ्ट गोल्स’ (Gift Goals) नावाचे हे नवीन फीचर सध्या चाचणीच्या टप्प्यात आहे. यामुळे क्रिएटर्सना लाईव्ह स्ट्रीमदरम्यान त्यांच्या प्रेक्षकांकडून थेट कमाई करण्याचा एक नवा मार्ग उपलब्ध होईल.
या सुविधेमुळे क्रिएटर्स लाईव्ह स्ट्रीममध्ये प्रेक्षकांशी अधिक जोडले जाऊ शकतात आणि कमाईसाठी एक विशिष्ट ‘गोल’ सेट करू शकतात. यापूर्वी हा ‘गोल’ फक्त सुपर चॅटसाठी सेट करता येत होता, पण आता तो गिफ्टसाठीही सेट करता येईल. चला, हे फीचर कसे काम करेल ते जाणून घेऊया.
YouTube ने नोव्हेंबर 2024 मध्ये या फीचरची घोषणा केली होती, ज्यात अमेरिकेतील काही निवडक क्रिएटर्सना मर्यादित ट्रायल आणि बीटा ॲक्सेस देण्यात आला होता. आता 2025 मध्ये, YouTube ही सुविधा अधिक पात्र क्रिएटर्ससाठी उपलब्ध करून देणार आहे.
YouTube वर पाठवलेली गिफ्ट्स डायमंड्समध्ये रूपांतरित होतात आणि प्रत्येक डायमंडचे मूल्य एक सेंट असते. क्रिएटर्सना प्रत्येक 100 डायमंडवर 1 डॉलर मिळतो. क्रिएटर्स हे फीचर YouTube स्टुडिओमधील ‘Earn’ टॅबमधून चालू करू शकतात. हे फीचर वापरण्यासाठी क्रिएटर्सना व्हर्च्युअल आयटम मॉड्यूल स्वीकारणे आवश्यक असेल.
एक महत्त्वाची गोष्ट म्हणजे, जे क्रिएटर्स त्यांच्या व्हर्टिकल लाईव्ह स्ट्रीमवर गिफ्ट्स चालू करतील, ते सुपर स्टिकर्सचा वापर करू शकणार नाहीत. YouTube पहिल्या तीन महिन्यांत पात्र क्रिएटर्सना गिफ्ट्समधून होणाऱ्या कमाईवर 50% बोनस देखील देणार आहे. या फीचरमुळे क्रिएटर्सना त्यांच्या कंटेंटमधून कमाई करण्यासाठी एक नवा आणि प्रभावी मार्ग मिळेल.
.png "Videos"){kind=small}
