LinkedIn चा मोठा निर्णय; आता तुमचा डेटा AI ट्रेनिंग आणि जाहिरातींसाठी वापरणार

प्रोफेशनल नेटवर्किंग प्लॅटफॉर्म लिंक्डइनने आपल्या गोपनीयतेच्या धोरणात मोठा बदल केला आहे. आता तुमचा डेटा एआय मॉडेल्सला प्रशिक्षण देण्यासाठी आणि जाहिरातींसाठी वापरला जाईल. तुम्ही हे कसे थांबवू शकता, जाणून घ्या.

• LinkedIn चा मोठा निर्णय
• आता तुमचा डेटा AI ट्रेनिंग आणि जाहिरातींसाठी वापरणार
• जाणून काय आहे ते…

मुंबई: जगातील सर्वात मोठे प्रोफेशनल नेटवर्किंग प्लॅटफॉर्म असलेल्या लिंक्डइनने (LinkedIn) आपल्या गोपनीयता धोरणामध्ये (Privacy Policy) मोठा बदल करण्याचा निर्णय घेतला आहे. कंपनीने घोषणा केली आहे की, ३ नोव्हेंबरपासून मायक्रोसॉफ्टला (Microsoft) वापरकर्त्यांचा डेटा वापरण्याची परवानगी असेल. या डेटाचा वापर केवळ एआय मॉडेल्सना प्रशिक्षण देण्यासाठीच नाही, तर वैयक्तिकृत जाहिरातींसाठीही केला जाणार आहे.

कोणत्या माहितीचा वापर केला जाणार?

लिंक्डइननुसार, वापरकर्त्यांचे प्रोफाइल, कामाचा अनुभव, शैक्षणिक तपशील, पोस्ट आणि कमेंट्स यांसारख्या माहितीवर प्रक्रिया केली जाईल. मात्र, कंपनीने स्पष्ट केले आहे की, खासगी संदेश (Private Messages) पूर्णपणे सुरक्षित राहतील आणि कोणत्याही परिस्थितीत शेअर केले जाणार नाहीत.

धोरणातील दोन मोठे बदल

• एआय ट्रेनिंग (AI Training): वापरकर्त्यांची माहिती आणि त्यांच्या क्रियाकलापांचा उपयोग कंटेंट-जनरेटिंग एआय मॉडेल्स (Content-generating AI models) अधिक चांगल्या प्रकारे विकसित करण्यासाठी केला जाईल.
• वैयक्तिकृत जाहिराती (Personalized Ads): मायक्रोसॉफ्ट आणि त्याच्या भागीदारांना वापरकर्त्याच्या माहितीचा ॲक्सेस मिळेल, जेणेकरून जाहिराती अधिक प्रभावी आणि वैयक्तिक बनवता येतील.

Xiaomi 17 Launched: दमदार फीचर्ससह Xiaomi चा नवा हँडसेट लाँच, Qualcomm चा पावरफुल प्रोसेसर आणि Leica कॅमेरा….

तुम्ही तुमचा डेटा कसा वाचवू शकता?

लिंक्डइनने वापरकर्त्यांना ‘ऑप्ट-आउट’ (Opt-Out) चा पर्याय दिला आहे. याचा अर्थ, तुम्हाला तुमचा डेटा एआय ट्रेनिंग किंवा जाहिरातींसाठी वापरला जाऊ नये असे वाटत असल्यास, तुम्ही ही सुविधा बंद करू शकता. परंतु, लक्षात ठेवा, ३ नोव्हेंबरपूर्वी शेअर केलेला डेटा तुम्ही ऑप्ट-आउट करेपर्यंत वापरला जात राहील.

एआय ट्रेनिंगमधून बाहेर पडण्याचा मार्ग:

1. लिंक्डइन अकाउंट उघडा आणि ‘Settings & Privacy’ मध्ये जा.
2. ‘Data Privacy’ सेक्शन निवडा.
3. ‘How LinkedIn uses your data’ वर क्लिक करा.
4. ‘Data for Generative AI improvement’ हा पर्याय टॉगल ऑफ करा.

जाहिरातींसाठी डेटा शेअरिंग थांबवण्याचा मार्ग:

1. ‘Settings’ मध्ये जा.
2. ‘Advertising Data’ सेक्शन उघडा.
3. तेथे असलेले डिफॉल्ट ‘ऑन’ असलेले पर्याय बंद करा.

कोणत्या देशांमध्ये लागू होईल नवीन पॉलिसी?

हे बदल फक्त युरोपियन युनियन (EU), ईईए (EEA), यूके (UK), स्वित्झर्लंड, कॅनडा आणि हाँगकाँगमध्ये लागू होतील. तर, अमेरिका आणि इतर देशांमध्ये मायक्रोसॉफ्टसोबत केवळ जाहिरात डेटा शेअरिंगचा बदल लागू होईल. EU आणि यूकेसारख्या देशांमधील कठोर गोपनीयता कायद्यांमुळे तेथे जाहिरातींसाठी डेटा शेअरिंगला परवानगी दिली जाणार नाही.