हरियाणा : सध्या सोशल मीडियावर हरियाणाच्या गुरुग्राममधील एक व्हिडिओ सोशल मीडियावर तुफान व्हायरल होत आहे. यामध्ये हॉटेलमध्ये आलेल्या काही लोकांना रक्ताच्या उलट्या होत असल्याचे दिसून येत आहे. जेवणानंतर देण्यात येणाऱ्या माऊथ फ्रेशनरमुळे या पाच जणांना त्रास झाला आहे. हॉटेलकडून माऊथ फ्रेशनर ऐवजी ड्राय आईस दिला आणि तो खाल्ल्यामुळे ग्राहकांच्या तोंडातून रक्त येऊ लागले. हे ग्राहक गंभीर जखमी झाले आहेत.
मीडिया रिपोर्टनुसार, तीन जोडप्यांचा ग्रुप वाढदिवस साजरा करण्यासाठी हरियाणाच्या गुडगावमधील एका रेस्टॉरंटमध्ये गेला होता. त्यांच्या जेवणानंतर, वेट्रेसने ग्रुपला माउथ फ्रेशनर ऑफर केले, परंतु त्याऐवजी त्यांना कोरड्या बर्फाचे दाणे दिले, ज्यामुळे त्यांची जीभ आणि टाळू खराब झाले, असे पोलिस आणि रेस्टॉरंटने सांगितले. माऊथ फ्रेशनर म्हणून सर्व्ह केलेल्या ड्राय आईस म्हणजे कोरड्या बर्फामुळे ग्राहकांच्या तोंडातून रक्त आले. वेट्रेसने ग्राहकांना चुकून ड्राय आईस दिल्याचं सांगितलं जात आहे.
अंकित कुमार नावाच्या व्यक्तीने रेस्टॉरंटविरोधात आरोप केले असून या घटनेची माहिती पोलिसांना दिली आहे. याप्रकरणी विषबाधा करून नुकसान केल्याच्या आरोपाखाली वेट्रेसवर गुन्हा दाखल करण्यात आला आहे. मात्र सोशल मीडियावर हा व्हिडिओ व्हायरल झाल्यानंतर अनेक उलट सुलट प्रतिक्रिया आल्या आहेत. हॉटेलमध्ये माऊथ फ्रेशनर घेण्याआधी तपासून घ्या व सतर्क राहा अशा आशयाचे मेसेज केले जात आहेत.
.png "Videos"){kind=small}
