लॅपटॉपवर काम करून मान दुखू लागली; उपचाराऐवजी CA पोहोचली जपानला, उशीची किंमत ऐकून व्हाल थक्क!
विपनदीप कौर यांनी सांगितले की, कामानिमित्त त्यांना बराच वेळ लॅपटॉपसमोर बसावे लागते. त्याचबरोबर मोबाईल फोनचाही मोठ्या प्रमाणात वापर होतो. सततच्या या सवयींचा परिणाम त्यांच्या मानेवर झाला. हळूहळू मानदुखीचा त्रास जाणवू लागला. झोपेच्या बाबतीतही अडचणी निर्माण होऊ लागल्या. दिवसभर काम केल्यानंतर रात्री शांत आणि आरामदायी झोप मिळणे महत्त्वाचे असल्याचे त्यांच्या लक्षात आले. त्यामुळे नेहमीच्या उशीऐवजी शरीराच्या रचनेनुसार तयार केलेली विशेष उशी वापरण्याचा त्यांनी निर्णय घेतला.
या खास उशीसाठी विपनदीप यांनी जपानमधील निहोनबाशी परिसरातील निशिकावा (Nishikawa) या प्रसिद्ध दुकानाला भेट दिली. हे दुकान सुमारे ४०० वर्षे जुने असल्याचे सांगितले जाते. येथे ग्राहकांच्या झोपेच्या सवयी आणि शरीराच्या ठेवणीनुसार उशा तयार करण्याची विशेष प्रक्रिया आहे. या प्रक्रियेत सर्वप्रथम ग्राहकाच्या मानेची मापे घेतली जातात. त्यानंतर शरीराची ठेवण, झोपण्याची पद्धत आणि डोक्याला व मानेसाठी आवश्यक असलेला आधार यांचा अभ्यास केला जातो.
या उशीची निर्मिती करण्यापूर्वी ग्राहकांना वेगवेगळ्या उंचीच्या उशांवर झोपून पाहण्यास सांगितले जाते. यामुळे झोपताना डोके आणि मान कोणत्या स्थितीत राहतात, याचा अंदाज घेतला जातो. त्यानुसार उशीची उंची आणि आधार निश्चित केला जातो. या उशीमध्ये ब्लॅक बिन्चोटन चारकोल पाइप बीड्सचा वापर करण्यात येतो. हे छोटे कण उशीमध्ये भरले जातात. मानेच्या गरजेनुसार त्यांची मांडणी आणि प्रमाण ठरवले जाते. त्यामुळे ग्राहकाच्या शरीराच्या रचनेनुसार उशी तयार करता येते.
एका उशीसाठी तब्बल ४० हजार रुपये खर्च केल्यामुळे विपनदीप कौर यांच्या निर्णयाची सोशल मीडियावर चर्चा सुरू झाली आहे. मात्र, आपल्या निर्णयाचे समर्थन करताना त्यांनी झोप आणि आराम यांना प्राधान्य देणे आवश्यक असल्याचे सांगितले. त्यांच्या मते, यापूर्वी त्यांनी झोपेकडे फारसे लक्ष दिले नव्हते. मात्र, वय वाढत असताना झोपेच्या समस्या आणि मानदुखीचा त्रास जाणवू लागला. दिवसभर लॅपटॉप आणि मोबाईल वापरल्यामुळे मानेवर परिणाम होत असल्याचेही त्यांनी नमूद केले. त्यांना झोपायला खूप आवडते. त्यामुळे चांगल्या झोपेसाठी केलेला हा खर्च त्यांच्यासाठी एक चांगली गुंतवणूक आहे, असे त्यांचे म्हणणे आहे.
विपनदीप कौर यांनी या खास उशीबाबत सोशल मीडियावर पोस्ट शेअर केल्यानंतर ती मोठ्या प्रमाणात व्हायरल झाली. पोस्ट शेअर केल्यानंतर अवघ्या चार तासांत ती तीन लाखांहून अधिक वेळा पाहिली गेल्याचे सांगितले जात आहे. काही युजर्सनी त्यांच्या निर्णयाचे कौतुक केले. चांगली झोप आणि आरोग्यदायी जीवनशैलीसाठी खर्च करणे योग्य असल्याचे मत अनेकांनी व्यक्त केले. तर काहींनी एका उशीसाठी ४० हजार रुपये खर्च करणे कितपत योग्य आहे, असा प्रश्न उपस्थित केला. एका युजरने ‘माझ्याकडेही इतके पैसे असते तर किती छान झाले असते’, अशी प्रतिक्रिया दिली. दुसऱ्या युजरने हा खर्च वसूल असल्याचे म्हटले. तर आणखी एका युजरने मोबाईल वापरण्याची सवय कमी करून झोपण्यापूर्वी फोन बंद केला असता, तर एवढा खर्च करण्याची वेळ आली नसती, अशी मिश्किल टिप्पणी केली.
शरीराच्या ठेवणीनुसार योग्य उशी निवडल्यास झोपताना मानेला आधार मिळण्यास मदत होऊ शकते. मात्र, महागडी उशी घेतल्याने मानदुखी पूर्णपणे बरी होईलच, असे नाही. सतत मानदुखीचा त्रास होत असल्यास डॉक्टरांचा सल्ला घेणे आवश्यक आहे. चुकीची बसण्याची पद्धत, लॅपटॉपची उंची आणि मोबाईल वापरताना मानेची स्थिती याकडेही लक्ष देणे महत्त्वाचे आहे.
Amravati Viral Video : साधी रिक्षा,पण इंग्रजी एकदम भारी! अमरावतीच्या काकांची सोशल मीडियावर हवा
Ans: विपनदीप कौर असे या भारतीय चार्टर्ड अकाउंटंटचे नाव आहे. सतत लॅपटॉपवर काम आणि मोबाईल वापरामुळे त्यांना मानदुखीचा त्रास जाणवत होता.
Ans: त्यांनी जपानमधील निशिकावा या दुकानातून सुमारे ४० हजार रुपये किमतीची कस्टमाइज्ड उशी खरेदी केली.
Ans: ही उशी ग्राहकाच्या मानेची रचना, शरीराची ठेवण आणि झोपण्याच्या सवयीनुसार तयार केली जाते. यामध्ये ब्लॅक बिन्चोटन चारकोल पाइप बीड्स भरलेले असतात, जे मानेसाठी आधार देण्यासाठी वापरले जातात.
.png "Videos"){kind=small}
