Mercor AI : अवघ्या 23 व्या वर्षी 40,000 कोटींचे मालक; हार्वर्ड सोडून बनले अब्जाधीश, आदर्श हिरेमठ अन् सूर्य मिधा यांची भन्नाट कहाणी

Mercor AI : भारतीय वंशाचे आदर्श हिरेमठ आणि सूर्य मिधा वयाच्या 23 व्या वर्षी अब्जाधीश कसे झाले? मर्कोरच्या २० अब्ज डॉलर्सच्या मूल्यांकनाबद्दल आणि त्यांच्या यशोगाथेबद्दल जाणून घ्या.

• २३ व्या वर्षी अब्जाधीश
• ‘मर्कोर’ला मोठी गुंतवणूक
• दिग्गज कंपन्यांना सेवा

ज्या वयात सर्वसामान्य तरुण आपले पदवीचे शिक्षण पूर्ण करून चांगल्या पगाराच्या नोकरीच्या शोधात असतात, त्याच वयात भारतीय वंशाच्या दोन तरुणांनी जागतिक तंत्रज्ञान विश्वात एक नवा इतिहास रचला आहे. आदर्श हिरेमठ (Adarsh Hiremath) आणि सूर्य मिधा (Surya Midha) या अवघ्या २३ वर्षांच्या दोघा मित्रांनी कृत्रिम बुद्धिमत्तेच्या (AI) जगात अशी काही झेप घेतली आहे की, आज ते सुमारे ४०,००० कोटी रुपयांच्या (४.२ अब्ज डॉलर्स) एकत्रित संपत्तीचे मालक बनले आहेत. या दोघांची संपत्ती अवघ्या काही महिन्यांतच जवळपास दुप्पट झाली असून, या चमत्काराचे संपूर्ण श्रेय त्यांच्या ‘मर्कोर’ (Mercor AI) या एआय स्टार्टअपला जाते.

मर्कोरने नुकत्याच पार पडलेल्या गुंतवणूक फेरीत तब्बल ७५० दशलक्ष डॉलर्स (सुमारे ६,७०० कोटी रुपये) इतका अफाट निधी उभारला आहे. या नवीन गुंतवणुकीमुळे कंपनीचे एकूण बाजारमूल्य (Valuation) थेट २० अब्ज डॉलर्सवर (अंदाजे १.८ लाख कोटी रुपये) पोहोचले आहे. जागतिक स्तरावरील प्रतिष्ठित ‘फोर्ब्स’ (Forbes) मासिकाच्या अंदाजानुसार, आदर्श हिरेमठ आणि सूर्य मिधा यांची वैयक्तिक संपत्ती झपाट्याने वाढली आहे. विशेष म्हणजे, ऑक्टोबर २०२५ मध्ये मर्कोरचे मूल्यांकन १० अब्ज डॉलर्स होते, तेव्हा या दोघांची एकत्रित संपत्ती २.२ अब्ज डॉलर्स (अंदाजे २०,७०० कोटी रुपये) होती. मात्र, अवघ्या एका वर्षात कंपनीची किंमत दुप्पट झाल्याने जगातील सर्वात तरुण स्वयंनिर्मित अब्जाधीशांच्या यादीत या तरुणांनी आपले स्थान अधिकच भक्कम केले आहे.

शाळेतील वादविवाद स्पर्धांपासून सुरू झालेली मैत्री

आदर्श हिरेमठ आणि सूर्य मिधा यांच्या यशाची बीजे त्यांच्या शालेय जीवनातच रोवली गेली होती. या दोघांची पहिली ओळख आणि घट्ट मैत्री अमेरिकेतील कॅलिफोर्निया येथील ‘बेलारमाइन कॉलेज प्रिपरेटरी स्कूल’मध्ये झाली. ही केवळ मुलांची शाळा असून, दोघेही शाळेच्या वादविवाद (Debate) संघाचे सक्रिय सदस्य होते. या दोघांची बौद्धिक क्षमता आणि तार्किक विचार करण्याची ताकद इतकी जबरदस्त होती की, त्यांनी आपल्या शाळेच्या इतिहासात एक अनोखा विक्रम प्रस्थापित केला. एकाच शैक्षणिक वर्षात देशातील तिन्ही प्रमुख राष्ट्रीय धोरण वादविवाद स्पर्धा जिंकणारा त्यांचा संघ शाळेच्या इतिहासातील पहिला संघ ठरला.

जागतिक घडामोडी संबंधित बातम्या वाचण्यासाठी येथे क्लिक करा : Elon Musk : अवकाश इतिहासात नवा अध्याय! स्पेसएक्सच्या ‘चॉपस्टिक्स’ भुजांनी हवेतच झेलले 400 फुटी महाकाय रॉकेट, VIDEO VIRAL

सूर्य मिधा यांचा जन्म कॅलिफोर्नियातील माउंटन व्ह्यू येथे झाला आणि त्यांचे बालपण सॅन होजे शहरात गेले. त्यांचे आई-वडील नवी दिल्लीहून अमेरिकेत स्थायिक झाले होते, त्यामुळे सूर्य हे दुसऱ्या पिढीतील भारतीय-अमेरिकन आहेत. शालेय शिक्षणानंतर सूर्य यांनी प्रतिष्ठित जॉर्जटाउन युनिव्हर्सिटीच्या ‘स्कूल ऑफ फॉरेन सर्व्हिस’मध्ये प्रवेश घेतला होता. परंतु, स्वतःचा व्यवसाय सुरू करण्याच्या जिद्दीने त्यांनी २०२३ मध्ये महाविद्यालयातून रजा घेतली. दुसरीकडे, भारतीय-अमेरिकन कुटुंबातील आदर्श हिरेमठ यांनी जगप्रसिद्ध हार्वर्ड विद्यापीठात संगणकशास्त्राचे (Computer Science) शिक्षण घेतले. मात्र, आपल्या स्टार्टअपवर पूर्ण वेळ लक्ष केंद्रित करण्यासाठी त्यांनी दोन वर्षांनंतर हार्वर्डचे शिक्षण अर्धवट सोडण्याचा धाडसी निर्णय घेतला.

या तिन्ही सह-संस्थापकांच्या प्रतिभेची दखल जगप्रसिद्ध अब्जाधीश गुंतवणूकदार पीटर थिल (Peter Thiel) यांनी घेतली. त्यांची प्रतिष्ठित ‘थिल फेलोशिप’ (Thiel Fellowship) साठी निवड झाली. या कार्यक्रमांतर्गत, पारंपरिक महाविद्यालयीन शिक्षण सोडून स्वतःचा नाविन्यपूर्ण व्यवसाय सुरू करणाऱ्या तरुण उद्योजकांना १,००,००० डॉलर्सचे आर्थिक पाठबळ दिले जाते.

मार्क झुकरबर्गलाही टाकले मागे: कसे बनले सर्वात तरुण अब्जाधीश?

मर्कोर या कंपनीची स्थापना तीन तरुणांनी मिळून केली आहे ब्रेंडन फूडी (Brendan Foody), आदर्श हिरेमठ आणि सूर्य मिधा. यामध्ये ब्रेंडन फूडी कंपनीचे मुख्य कार्यकारी अधिकारी (CEO) आहेत, आदर्श हिरेमठ मुख्य तंत्रज्ञान अधिकारी (CTO) म्हणून जबाबदारी सांभाळतात, तर सूर्य मिधा हे संचालक मंडळाचे अध्यक्ष (Chairman) आहेत. या तिन्ही सह-संस्थापकांची कंपनीमध्ये प्रत्येकी सुमारे २१ टक्के इतकी हिस्सेदारी आहे.

जागतिक घडामोडी संबंधित बातम्या वाचण्यासाठी येथे क्लिक करा : Elon Musk : अवकाश इतिहासात नवा अध्याय! स्पेसएक्सच्या ‘चॉपस्टिक्स’ भुजांनी हवेतच झेलले 400 फुटी महाकाय रॉकेट, VIDEO VIRAL

२०२५ मध्ये, या तिघांनी अवघ्या २२ व्या वर्षी जगातील सर्वात तरुण स्वयंनिर्मित अब्जाधीश बनण्याचा ऐतिहासिक विक्रम आपल्या नावावर केला. त्यांनी यापूर्वी २७ व्या वर्षी हा मान मिळवणाऱ्या ‘पॉलीमार्केट’चे सीईओ शेन कोपलान यांना मागे टाकले. तुलना करायची झाल्यास, फेसबुकचे संस्थापक मार्क झुकरबर्ग हे वयाच्या २३ व्या वर्षी अब्जाधीश झाले होते, मात्र मर्कोरच्या या त्रिकुटाने त्याहीपेक्षा कमी वयात हा पल्ला गाठला आहे. विशेष म्हणजे, तिन्ही मित्रांमध्ये सूर्य मिधा हे सर्वात लहान असून ते इतर दोघांपेक्षा सुमारे दोन महिन्यांनी लहान आहेत.

मर्कोर (Mercor) नेमके काय काम करते?

२०२३ मध्ये जेव्हा मर्कोरची सुरुवात झाली, तेव्हा ते एक सामान्य रिक्रूटमेंट प्लॅटफॉर्म होते. भारत आणि इतर देशांतील प्रतिभावान फ्रीलान्स सॉफ्टवेअर डेव्हलपर्सना अमेरिकन कंपन्यांशी जोडण्याचे काम हे प्लॅटफॉर्म करत असे. मात्र, बदलत्या काळाची पावले ओळखून या तरुणांनी आपल्या व्यवसायाचा विस्तार कृत्रिम बुद्धिमत्ता (AI) क्षेत्राकडे वळवला.

आज मर्कोरचे प्लॅटफॉर्म जगातील आघाडीच्या एआय कंपन्यांना वैद्यकशास्त्र, कायदा, वित्त (Finance) आणि अभियांत्रिकी यांसारख्या अत्यंत क्लिष्ट क्षेत्रांतील उच्चशिक्षित तज्ज्ञांशी जोडते. हे तज्ज्ञ एआय मॉडेल्सना अधिक हुशार बनवण्यासाठी अचूक डेटा तयार करतात, त्यांच्या क्षमतांचे मूल्यांकन करतात आणि मॉडेल्समधील तांत्रिक त्रुटी सुधारण्यास मदत करतात. आज ओपनएआय (OpenAI) आणि अँथ्रोपिक (Anthropic) यांसारख्या जगातील सर्वात मोठ्या एआय लॅब्स मर्कोरच्या सेवांचा वापर करत आहेत.

७५० दशलक्ष डॉलर्सचा निधी कोठून आला आणि कंपनीची पुढील योजना काय?

१० नोव्हेंबर रोजी कंपनीने आपल्या ‘सीरिज-डी’ (Series-D) फंडिंग राउंडची घोषणा केली. यामध्ये सिलिकॉन व्हॅलीतील दिग्गज गुंतवणूकदार संस्था जसे की बेंचमार्क, जनरल कॅटॅलिस्ट, एनव्हिडिया (Nvidia), सेल्सफोर्स, फेलिसिस, अपोलो-संबंधित फंड आणि झूम (Zoom) यांनी मोठ्या प्रमाणावर गुंतवणूक केली आहे.

कंपनीचे सीईओ ब्रेंडन फूडी यांनी दिलेल्या माहितीनुसार, मर्कोरचा वेग थक्क करणारा आहे. कंपनीने अवघ्या २७ महिन्यांत आपला वार्षिक महसूल (Run-rate Revenue) १ दशलक्ष डॉलर्सवरून थेट ३ अब्ज डॉलर्सपर्यंत नेला आहे. अलीकडच्या एका महिन्यात कंपनीने २५० दशलक्ष डॉलर्सची विक्रमी विक्री नोंदवली असून, त्यांच्या ग्राहकांची संख्या एका वर्षात दुप्पट होऊन १०० च्या पार गेली आहे. नवीन मिळालेल्या निधीचा वापर कंपनी आपल्या AI मॉडेल मूल्यांकन व्यवसायाचा विस्तार करण्यासाठी आणि विविध कंपन्यांना त्यांच्या स्वतःच्या डेटावर आधारित खास ‘AI एजंट्स’ तयार करून देण्यासाठी करणार आहे.

एआय कंपन्यांच्या जागतिक शर्यतीत मर्कोर कुठे उभी आहे?

२० अब्ज डॉलर्सच्या मूल्यांकनासह मर्कोर आज जगातील सर्वात मौल्यवान खाजगी एआय कंपन्यांच्या यादीत सामील झाली आहे. या क्षेत्रात ‘स्केल एआय’ (Scale AI) सारख्या काही बड्या कंपन्या अजूनही पुढे आहेत जून २०२५ मध्ये मेटाने स्केल एआयमध्ये ४९ टक्के हिस्सा खरेदी केला तेव्हा तिचे मूल्यांकन २९ अब्ज डॉलर्स होते, तर प्रतिस्पर्धी ‘सर्ज एआय’चे (Surge AI) मूल्यांकन २४ अब्ज डॉलर्स इतके आहे. असे असले तरी, भारतीय वंशाच्या दोन २३ वर्षीय तरुणांनी उभारलेली मर्कोर ज्या वेगाने प्रगती करत आहे, ते पाहता येत्या काळात ती जगातील सर्वात मोठी एआय पायाभूत सुविधा कंपनी ठरल्यास आश्चर्य वाटायला नको.