अमेरिकन वैमानिक आमच्या ताब्यात; बचाव हेलिकॉप्टरही पाडले... इराणचा मोठा दावा! (Photo Credit- X)
इराणने केवळ फायटर जेटच पाडले नाही, तर कोसळलेल्या विमानाच्या वैमानिकाला वाचवण्यासाठी आलेल्या अमेरिकन ताफ्यावरही हल्ला चढवला. प्राप्त माहितीनुसार, अमेरिकेने आपल्या वैमानिकाच्या सुटकेसाठी एक C-130 मालवाहू विमान आणि चार ‘ब्लॅक हॉक’ (Black Hawk) हेलिकॉप्टर्स इराणच्या हद्दीत पाठवली होती. मात्र, इराणने याला घुसखोरी मानून कारवाई केली आणि हे हेलिकॉप्टर्सदेखील पाडल्याचा दावा केला आहे.
‘तस्नीम’ न्यूज एजन्सीच्या रिपोर्टनुसार, F-15 जेटला लक्ष्य केल्यानंतर वैमानिकाने ‘इजेक्ट’ केले आणि तो इराणच्या भूमीवर उतरला. या वैमानिकाच्या सद्यस्थितीबाबत दोन वेगळे दावे केले जात आहेत. काही स्थानिक रिपोर्टनुसार, इराणच्या सैन्याने वैमानिकाला जिवंत पकडून बंदी बनवले आहे. तर दुसरीकडे, ‘प्रेस टीव्ही’ आणि ‘IRIB’ सारख्या सरकारी माध्यमांनी असा दावा केला आहे की, विमानाचा स्फोट इतका भीषण होता की वैमानिक वाचण्याची शक्यता अत्यंत कमी आहे.
इराणच्या ‘खतम अल-अंबिया’ लष्करी मुख्यालयाने दिलेल्या माहितीनुसार, हे अमेरिकेचे दुसरे ‘F-35’ विमान आहे जे मध्य इराणच्या आकाशात पाडण्यात आले. मात्र, काही आंतरराष्ट्रीय संरक्षण तज्ञांच्या मते हे विमान ‘F-15E’ असू शकते. अमेरिकेने अद्याप अधिकृतपणे आपले विमान पाडल्याचे मान्य केलेले नाही, मात्र इराणने आपल्या नव्या एअर डिफेन्स सिस्टमच्या शक्तीचे प्रदर्शन करत हे यश मिळाल्याचे म्हटले आहे.
यापूर्वी १९ मार्च रोजीदेखील इराणने एका अमेरिकन F-35 जेटला लक्ष्य केल्याचा दावा केला होता. ‘CNN’ च्या रिपोर्टनुसार, त्या वेळी विमानाचे नुकसान झाले होते आणि त्याने आपत्कालीन लँडिंग केले होते, ज्यात वैमानिक सुरक्षित होता. मात्र, ताज्या घटनेत इराणने अधिक आक्रमक पवित्रा घेतला आहे. IRGC च्या दाव्यानुसार, आज पहाटे 2:50 च्या सुमारास ही कारवाई करण्यात आली. इराणने आतापर्यंत अमेरिका आणि इस्रायलचे १२५ पेक्षा जास्त ड्रोन पाडल्याचेही जाहीर केले आहे. सध्या या खळबळजनक दाव्यांची अधिकृत किंवा स्वतंत्रपणे पुष्टी झालेली नाही, मात्र यामुळे जागतिक राजकारणात युद्धाचे ढग अधिक गडद झाले आहेत.
