ड्रोनसोबत फिरणार अमेरिकन सैनिक! पेंटागॉनच्या क्रांतिकारी निर्णयाने लष्करात नवा युगारंभ

Pentagon drone dominance : अमेरिकेच्या संरक्षण मंत्रालय अर्थात पेंटागॉनने आपल्या लष्करासाठी एक ऐतिहासिक आणि क्रांतिकारी निर्णय घेतला आहे.

Pentagon drone dominance : अमेरिकेच्या संरक्षण मंत्रालय अर्थात पेंटागॉनने आपल्या लष्करासाठी एक ऐतिहासिक आणि क्रांतिकारी निर्णय घेतला आहे. या निर्णयानुसार, आता प्रत्येक अमेरिकन सैनिकाच्या खांद्यावर बंदुकीप्रमाणे ड्रोन लटकलेले दिसतील. लष्करी युद्धपद्धतीत होत असलेल्या तांत्रिक बदलांमुळे पेंटागॉनने आपल्या सर्व जवानांना किमान २० पौंड वजनाचे ड्रोन नेहमी सोबत ठेवण्याचे आदेश दिले आहेत. या आदेशामुळे अमेरिकेच्या युद्धशक्तीचा चेहरामोहरा बदलणार असल्याचे संकेत आहेत.

ड्रोनचा नवा अध्याय: पेंटागॉनच्या आदेशाचा अर्थ काय?

‘द वॉर झोन’ या आंतरराष्ट्रीय वृत्तसंस्थेच्या माहितीनुसार, पेंटागॉनचे प्रमुख पीटर हेगसेथ यांनी या निर्णयाचे जोरदार समर्थन केले आहे. त्यांच्या मते, “युद्धभूमीवर ड्रोनची भूमिका आता केवळ साहाय्यक नसून, निर्णायक ठरत आहे.” अशा स्थितीत प्रत्येक सैनिकाला ड्रोनसारखी अत्याधुनिक उपकरणे बरोबर ठेवावी लागणार आहेत. ड्रोन वापरामुळे सैनिक केवळ शत्रूवर हल्ला करू शकतात असे नाही, तर पाळत ठेवणे, सुरक्षा वाढवणे आणि रणनीती आखणे यासाठीही ते उपयुक्त ठरतात. त्यामुळेच आता अमेरिकन लष्करात प्रत्येक जवानासाठी ड्रोन अनिवार्य केला जात आहे.

जागतिक घडामोडी संबंधित बातम्या वाचण्यासाठी येथे क्लिक करा : ‘काझमी बनले सीता, अश्मन झाले राम…’ पाकिस्तानच्या सभागृहात दुमदुमला नामघोष जय श्री राम

कसले असतील हे ड्रोन?

• पेंटागॉनच्या नव्या आदेशानुसार, प्रत्येक सैनिकाला २० पौंड (सुमारे ९ किलो) वजनाचे ड्रोन दिले जाणार आहेत.
• हे ड्रोन १२०० फूट उंचीपर्यंत सहजपणे उड्डाण करू शकतात.
• लवकरच याचे वजन २५ पौंडांपर्यंत वाढवले जाईल, अशी माहितीही समोर आली आहे.
• हे ड्रोन वापरण्यापूर्वी सैनिकांना विशेष प्रशिक्षण देण्यात येणार आहे.

सध्या अमेरिकेत ९ लाख ५० हजाराहून अधिक सैनिक आहेत, यापैकी ४.५० लाख सक्रिय कर्तव्यावर आहेत. याचाच अर्थ, भविष्यात लाखो ड्रोन अमेरिकन लष्कराच्या ताफ्यात दाखल होणार आहेत.

ड्रोन वापर मागची प्रमुख कारणं:

1. युद्धपद्धतीत झालेला बदल:
   युक्रेन-रशिया युद्धात ड्रोनचा जबरदस्त वापर झाला. कमी खर्चात अधिक परिणाम देणाऱ्या या यंत्रणेने विनाशाची नवी व्याख्या मांडली. त्याच धर्तीवर अमेरिका आता स्वतःच्या लष्करी धोरणात बदल करत आहे.
2. स्वसंरक्षणाची क्षमता:
   ड्रोनमुळे सैनिकांना शत्रूच्या हालचालींची कल्पना आधीच मिळू शकते. यामुळे हल्ल्याची तयारी करता येते आणि स्वतःचे रक्षण करता येते. गनिमी युद्धात हे फारच प्रभावी ठरते.
3. व्यावसायिक दृष्टीकोन:
   डोनाल्ड ट्रम्प यांनी अलीकडेच सांगितले होते की “अमेरिका लाखो ड्रोन तयार करणार आहे.” यामागे एक व्यावसायिक हेतूही आहे – जगभर ड्रोन वापराची मागणी वाढवून अमेरिकेच्या ड्रोन कंपन्यांना चालना देणे.

ड्रोनसह शस्त्रबळ: अमेरिकेचा जागतिक प्रभाव वाढणार

पेंटागॉनचा हा निर्णय म्हणजे केवळ लष्करी रणनीती नसून एक प्रकारचा जागतिक दबाव निर्माण करण्याचाही भाग आहे. अमेरिकेप्रमाणे इतर देशांनीही जर आपापल्या लष्करात ड्रोनचा वापर वाढवला, तर त्या देशांना अमेरिकेकडून ड्रोन खरेदी करावा लागेल. त्यामुळे अमेरिकेचा जागतिक बाजारपेठेतील दबदबा आणि आर्थिक फायदाही वाढेल.

जागतिक घडामोडी संबंधित बातम्या वाचण्यासाठी येथे क्लिक करा : डोनाल्ड ट्रम्पची ‘FIFA Club World Cup’मध्ये एन्ट्री अन् उडाला गोंधळ… पहा VIRAL VIDEO

पेंटागॉनचा हा निर्णय

पेंटागॉनचा हा निर्णय भविष्यातील युद्धशैलीचे स्पष्ट संकेत देतो आहे. शस्त्रांबरोबरच आता माहिती, गुप्तचर आणि स्वसंरक्षणासाठी ड्रोन अत्यंत आवश्यक ठरत आहेत. लष्कराचा प्रत्येक जवान हा आता केवळ सैनिक नसून एक ‘हवाई तळ’ असणार आहे. हा बदल केवळ अमेरिकेसाठी नाही, तर जगभरातील लष्करी तंत्रज्ञानाच्या नव्या पर्वाची सुरुवात मानली जात आहे.