‘मी त्याच दिवशी रडेन जेव्हा…’, इस्रायली हल्ल्यात मारल्या गेलेल्या मेजरच्या पत्नीने खामेनेईंना काय म्हटले?

इस्रायलच्या हवाई हल्ल्यात 4 इराणी सैनिकही मारले गेले. दरम्यान हल्ल्यात ठार झालेल्या मेजरच्या पत्नीने इराणचे सर्वोच्च नेते अयातुल्ला अली खामेनेई यांची भेट घेतली. आपल्या शौर्यशील पतीच्या बलिदानाबद्दल कृतज्ञता व्यक्त केली.

इस्रायलने 26 ऑक्टोबरला इराणवर हवाई हल्ला करून इराणच्या लष्करी तळांवर लक्ष केंद्रीत केले, ज्यामध्ये चार इराणी सैनिक शहीद झाले. यामध्ये शहीद झालेल्या जवानांपैकी एक म्हणजे मेजर हमजे जहाँ होते. आपल्या देशासाठी त्यांनी हौतात्म्य पत्करले आणि त्यांच्या मागे पत्नी, तीन महिन्यांचे मूल, आणि सात वर्षांची मुलगी असा कुटुंब आहे. मेजर हमजे जहाँ यांच्या पत्नीने इराणचे सर्वोच्च नेते अयातुल्ला अली खामेनी यांची भेट घेतली आणि आपल्या शौर्यशील पतीच्या बलिदानाबद्दल कृतज्ञता व्यक्त केली.

या भेटीदरम्यान मेजर हमजे जहाँ यांच्या पत्नीने अत्यंत धैर्याने आपले विचार मांडले. ती म्हणाली, “माझ्या नेत्या, मी शहीद मेजर हमजे जहाँची पत्नी आहे. माझ्या पतीचा मृतदेह तुकड्या-तुकड्यांमध्ये माझ्यापर्यंत पोहोचला. माझ्या पतीने इस्लामिक रिपब्लिक आणि इस्लामसाठी बलिदान दिले आहे. माझी मुले आता त्यांच्या वडिलांना पुन्हा कधीही पाहू शकणार नाहीत.” तिच्या या बोलण्यामधून तिच्या अंतःकरणातील वेदना आणि देशाभिमानाचा ठसा उमटतो.

पत्नीचा भावनिक संदेश

मेजर हमजे जहाँ यांच्या पत्नीने या प्रसंगी आपल्या पतीला दिलेले वचनही सांगितले. ती म्हणाली, “मी माझ्या पतीला वचन दिले होते की, मी त्यांच्या हौतात्म्यावर अश्रू ढाळणार नाही. ज्या दिवशी मला अल-अक्सा मशिदीत जाऊन प्रार्थना करता येईल, त्या दिवशी मी माझे अश्रू गाळेन.” तिचे हे शब्द तिच्या देशप्रेम आणि धैर्याचे प्रतीक आहेत. तिच्या पतीच्या हौतात्म्यानंतर, इराणमधील असंख्य सैनिक त्यांच्या कार्यासाठी सज्ज झाले आहेत, आणि ती विश्वास व्यक्त करते की हे शूर सैनिक इस्रायलचा नाश करतील.

हे देखील वाचा : इराण आणि इस्रायलमधील तणावामुळे होणार मोठे युद्ध? पुढील 24 तास अत्यंत महत्त्वाचे

देशभक्तीची भावना

तिच्या या शब्दांनी इराणमधील लोकांच्या मनामध्ये एक प्रकारचा प्रेरणा संचारला आहे. तिचे धैर्य, पतीच्या बलिदानाबद्दल तिचा अभिमान, आणि तिच्या मुलांबद्दलची तत्त्वनिष्ठा हे सर्व इराणमधील लोकांसाठी एक उदाहरण बनले आहे. ती म्हणाली होती की, गरज पडल्यास ती आपल्या मुलांनाही इराणसाठी बलिदान देण्यास तयार आहे. तिच्या या विधानाने तिच्या देशभक्तीची भावना अधोरेखित होते.

हे देखील वाचा : अमेरिकेच्या राष्ट्राध्यक्ष पदासाठीचा कौल नक्की कोणाच्या बाजूने? जाणून घ्या सविस्तर

तणाव अधिक वाढला

अशा घटनांमुळे इराण आणि इस्रायलमधील तणाव अधिक वाढला आहे. इस्रायलने इराणवर केलेल्या हल्ल्याने जागतिक पातळीवर चिंतेचे वातावरण निर्माण केले आहे. या हल्ल्यानंतर इराणने देखील भविष्यात इस्रायलविरोधात कठोर भूमिका घेण्याची शक्यता वर्तवली आहे. इराणमध्ये मेजर हमजे जहाँ आणि त्यांच्यासारख्या शूर सैनिकांचे बलिदान संपूर्ण देशाला अभिमान वाटणारे आहे. त्यांच्या बलिदानाची आठवण आणि त्यांच्या पत्नीकडून मिळालेली प्रेरणा हे इराणच्या जनतेला एकजूट आणि दृढता देणारे आहेत.