Nvidia : ‘हनी ट्रॅप’मध्ये अडकले टेक जगताचे बादशहा; गुप्तचर यंत्रणांचा इशारा धुडकावून ट्रम्प यांनी जेन्सन हुआंगला का वाचवले?

Nvidia : एनव्हिडियाचे सीईओ जेन्सन यांचे एका कथित चिनी गुप्तहेरासोबत असलेल्या संबंधांची ट्रम्प प्रशासनाला आधीच माहिती होती. असे असूनही, कोणतीही कारवाई करण्यात आली नाही. आता, अमेरिकेच्या राष्ट्रीय सुरक्षेवर आणि या प्रकरणावरील सरकारच्या मौनावर प्रश्नचिन्ह उपस्थित केले जात आहे.

• जगभरात खळबळ उडवणारे प्रकरण
• ट्रम्प प्रशासनाच्या भूमिकेवर प्रश्नचिन्ह
• हुआंग यांचा राजीनामा आणि चौकशीची मागणी

जगातील सर्वात मोठी आणि शक्तिशाली आर्टिफिशियल इंटेलिजन्स (AI) चिप उत्पादक कंपनी ‘एनव्हिडिया’ (Nvidia) चे संस्थापक आणि माजी सीईओ जेन्सन हुआंग (Jensen Huang) सध्या एका अत्यंत गंभीर आणि संवेदनशील वादाच्या केंद्रस्थानी सापडले आहेत. हा वाद केवळ त्यांच्या वैयक्तिक आयुष्यापुरता मर्यादित राहिलेला नसून, तो थेट जगातील महासत्ता असलेल्या अमेरिकेच्या राष्ट्रीय सुरक्षेशी जोडला गेला आहे. एका कथित चिनी महिला गुप्तहेरासोबत जेन्सन हुआंग यांचे प्रेमसंबंध असल्याची ठोस माहिती अमेरिकेच्या गुप्तचर संस्थांनी राष्ट्राध्यक्ष डोनाल्ड ट्रम्प यांना खूप आधीच दिली होती. तरीही ट्रम्प प्रशासनाने यावर कोणतीही कारवाई का केली नाही, असा संतप्त सवाल आता अमेरिकेच्या राजकीय आणि संरक्षण वर्तुळात उपस्थित केला जात आहे.

अमेरिकेतील नामांकित वृत्तपत्र ‘द वॉल स्ट्रीट जर्नल’ (WSJ) आणि ‘द न्यूयॉर्क टाइम्स’ (NYT) यांनी या प्रकरणाचे धक्कादायक तपशील जगासमोर आणले आहेत. या अहवालांनुसार, ऑक्टोबरमध्ये सर्वप्रथम असे समोर आले की अमेरिकन गुप्तचर यंत्रणांना जेन्सन हुआंग यांचे ॲलिस हुआंग (Alice Huang) नावाच्या एका चिनी महिलेसोबत प्रेमसंबंध असल्याचा संशय होता.

ही महिला चीनच्या गुप्तचर संस्थेसाठी काम करत असल्याचा गंभीर आरोप आहे, मात्र चीन सरकारने हे सर्व आरोप स्पष्टपणे फेटाळून लावले आहेत. धक्कादायक बाब म्हणजे, राष्ट्राध्यक्ष ट्रम्प यांना या संभाव्य धोक्याची माहिती गेल्या वर्षीच पहिल्यांदा देण्यात आली होती, परंतु त्यांनी त्याकडे दुर्लक्ष केले. इतकेच नाही तर, सात महिन्यांनंतर मे महिन्यात जेव्हा जेन्सन हुआंग अमेरिका-चीन शिखर परिषदेसाठी बीजिंगला जाणार होते, त्यापूर्वी परराष्ट्र सचिव मार्को रुबियो (Marco Rubio) यांनीही ट्रम्प यांना या प्रकरणाचे गांभीर्य लक्षात आणून दिले होते. तरीही ट्रम्प यांनी स्वतः हुआंग यांना या महत्त्वाच्या दौऱ्यासाठी आमंत्रित केले.

व्हाईट हाऊसमध्ये प्रवेश आणि चिप्सच्या तस्करीचा संशय

जेन्सन हुआंग हे केवळ एक यशस्वी उद्योगपती नाहीत, तर ते डोनाल्ड ट्रम्प यांचे अत्यंत जवळचे सल्लागार मानले जातात. त्यांच्या ‘एनव्हिडिया’ कंपनीने बनवलेल्या अत्याधुनिक कॉम्प्युटर चिप्सशिवाय आजच्या जगातील प्रगत एआय प्रणाली तयार करणे जवळपास अशक्य आहे. ट्रम्प यांच्याशी असलेल्या जवळीकीमुळे हुआंग यांना व्हाईट हाऊस, ओव्हल ऑफिस, रुझवेल्ट रूम, मार-ए-लागो आणि अगदी राष्ट्राध्यक्षांचे अधिकृत विमान ‘एअर फोर्स वन’ मधील अत्यंत गोपनीय बैठकांमध्येही थेट प्रवेश होता. २९ सप्टेंबर रोजी व्हाईट हाऊसमध्ये झालेल्या एका महत्त्वाच्या एआय बैठकीत ते ट्रम्प यांच्या अगदी उजव्या बाजूला बसले होते.

जागतिक घडामोडी संबंधित बातम्या वाचण्यासाठी येथे क्लिक करा : Nvidia: 33 वर्षांच्या सुवर्णयुगाचा शेवट! एनव्हिडियाचे संस्थापक जेन्सन हुआंग यांचा राजीनामा; कोण आहेत नव्या अंतरिम CEO कोलेट क्रेस?

‘वॉल स्ट्रीट जर्नल’च्या अहवालात असा गंभीर संशय व्यक्त करण्यात आला आहे की, ॲलिस हुआंग हिने या जवळीकीचा फायदा घेत जेन्सन यांचे फोन कॉल्स, खाजगी संभाषणे आणि अमेरिकेच्या भविष्यातील एआय धोरणांच्या योजना पाहिल्या असाव्यात. सिंगापूरस्थित ‘मेगास्पीड’ (Megaspeed) या डेटा कंपनीशी संबंधित असलेल्या ॲलिसची कंपनी थेट चिनी गुप्तचर यंत्रणेशी जोडलेली असल्याचे मानले जाते. अमेरिकन यंत्रणांना असा संशय आहे की, याच कंपनीच्या माध्यमातून बंदी घातलेल्या प्रगत एनव्हिडिया चिप्स बेकायदेशीररीत्या चीनला पाठवण्यात आल्या होत्या. यापूर्वीच्या जो बायडेन प्रशासनाने चीनला या चिप्सच्या विक्रीवर कडक बंदी घातली होती. सुरुवातीला ट्रम्प प्रशासनाने हे नियम अधिक कठोर केले, परंतु नंतर अचानक त्यात बदल करत डिसेंबर २०२५ मध्ये हे निर्बंध मोठ्या प्रमाणात शिथिल केले.

चीनशी स्पर्धा करण्याच्या नावाखाली नियमांना विरोध आणि ट्रम्प यांचा बचाव

डोनाल्ड ट्रम्प यांनी नेहमीच अशी भूमिका घेतली आहे की, चीनविरुद्धची कृत्रिम बुद्धिमत्ता (AI) शर्यत जिंकण्यासाठी अमेरिकन टेक कंपन्यांवर अनावश्यक नियम लादले जाऊ नयेत. जो देश एआय तंत्रज्ञानात आघाडीवर राहील, तोच भविष्यातील लष्करी आणि जागतिक बाजारपेठेवर राज्य करेल, असे ट्रम्प यांचे मत आहे. याच धोरणामुळे कदाचित त्यांनी आपल्या मुख्य एआय सल्लागारावरील गंभीर आरोपांकडे दुर्लक्ष केले असावे. जेव्हा या प्रकरणावरून ट्रम्प यांना प्रश्न विचारण्यात आले, तेव्हा त्यांनी सांगितले की त्यांनी हुआंग यांना धीर देण्यासाठी फोन केला होता आणि ती महिला गुप्तहेर आहे का, असे विचारले असता हुआंग यांनी ते नाकारले.

या प्रकरणाचे गांभीर्य समजून घेण्यासाठी अमेरिकेतील चिनी हेरगिरीचा इतिहास पाहणे गरजेचे आहे. एफबीआयचे (FBI) संचालक क्रिस्टोफर रे यांनी २०२२ मध्ये स्पष्ट केले होते की, एफबीआय दररोज चीनशी संबंधित हेरगिरीची सरासरी दोन नवीन प्रकरणे दाखल करत आहे आणि अशी दोन हजारांहून अधिक प्रकरणे सुरू आहेत. ऑक्टोबर २०२३ मध्ये पाच देशांच्या गुप्तचर प्रमुखांनी सिलिकॉन व्हॅलीत बैठक घेऊन चीनवर एआय आणि क्वांटम कॉम्प्युटिंग तंत्रज्ञान चोरल्याचा थेट आरोप केला होता. अलीकडेच जानेवारी २०२६ मध्ये गुगलच्या एका अभियंत्याला एआय-संबंधित हेरगिरीप्रकरणी दोषी ठरवण्यात आले, तर ऑक्टोबर २०२५ मध्ये ‘द टाइम्स ऑफ लंडन’ने चिनी आणि रशियन एजंट्स ‘हनी ट्रॅप’ म्हणजेच प्रेमसंबंधांच्या जाळ्यात सिलिकॉन व्हॅलीतील मोठ्या अधिकाऱ्यांना अडकवत असल्याचा इशारा दिला होता.

जागतिक घडामोडी संबंधित बातम्या वाचण्यासाठी येथे क्लिक करा : Russia Ukraine War: पुतिन यांनी ट्रम्प यांच्या दूतांसोबत केली चार तास चर्चा, जाणून घ्या मग युक्रेनवर शांतता कराराला का दिला नकार?

जेन्सन हुआंग यांचा राजीनामा आणि अमेरिकन काँग्रेसमध्ये चौकशीची मागणी

हे प्रकरण माध्यमांमध्ये उघडकीस आल्यानंतर ९ नोव्हेंबर रोजी डोनाल्ड ट्रम्प यांनी उघडपणे जेन्सन हुआंग यांची पाठराखण केली होती. हुआंग यांनी काहीही चुकीचे केलेले नाही आणि मी माझ्या पुढील आशिया दौऱ्यावर त्यांना सोबत घेऊन जाईन, असे ट्रम्प म्हणाले होते. “प्रत्येकजण असे संबंध ठेवतो, हुआंग हे एक उत्तम आणि आदरणीय व्यक्ती आहेत, त्यामुळे कारवाई न केल्याचा मला कोणताही पश्चात्ताप नाही,” असे विधान ट्रम्प यांनी केले होते.

मात्र, कंपनीच्या संचालक मंडळाचा दबाव आणि इतरही काही वैयक्तिक प्रकरणे समोर आल्यानंतर अखेर १२ नोव्हेंबर २०२६ रोजी जेन्सन हुआंग यांनी एनव्हिडियाच्या सीईओ आणि अध्यक्षपदाचा तडकाफडकी राजीनामा दिला. ३३ वर्षे त्यांनी उभारलेल्या साम्राज्यातून त्यांना बाहेर पडावे लागले असून, कंपनीच्या मुख्य वित्तीय अधिकारी कोलेट क्रेस यांची हंगामी सीईओ म्हणून नियुक्ती करण्यात आली आहे. आता ‘वॉल स्ट्रीट जर्नल’सह अनेक तज्ज्ञांचे असे म्हणणे आहे की, केवळ हुआंग यांचा राजीनामा पुरेसा नाही. या संपूर्ण प्रकरणाची अमेरिकन काँग्रेसमध्ये सार्वजनिक सुनावणी आणि सखोल चौकशी झाली पाहिजे. ट्रम्प प्रशासनाला नेमकी कोणती माहिती होती आणि राष्ट्रीय सुरक्षेचा प्रश्न असूनही कारवाई का टाळली गेली, याचे सत्य जगासमोर आणण्यासाठी रिपब्लिकन आणि डेमोक्रॅटिक या दोन्ही पक्षांनी एकत्र येऊन पावले उचलणे गरजेचे आहे.