Kenya News : ‘कुत्रा आमच्यावर सोडल्यासारखे’; परदेशी व्यापाऱ्यांवर कारवाईने भीतीचे वातावरण

Kenya News : केनियाचे राष्ट्राध्यक्ष विल्यम रुटो यांनी छोट्या व्यवसायांमध्ये परदेशी नागरिकांच्या सहभागावर कठोर कारवाई सुरू केल्यानंतर स्थलांतरित समुदायांमध्ये भीती निर्माण झाली आहे. नैरोबीतील अनेक बुरुंडी नागरिक मायदेशी परतण्याची तयारी करत असून, या कारवाईमुळे झेनोफोबियाची चिंता वाढली आहे.

• रूटो सरकारचा नेमका निर्णय काय ?
• बुरुंडी नागरिकांमध्ये सर्वाधिक चिंता
• कारवाईमुळे झेनोफोबियाची भीती वाढली

Kenya News : केनियाचे राष्ट्राध्यक्ष विल्यम रूटो यांनी देशातील छोट्या व्यवसायांमध्ये परदेशी नागरिकांच्या सहभागावर कठोर कारवाई सुरु करण्याचे आदेश दिल्यानंतर परदेशी व्यापारी आणि स्थलांतरित समुदायांमध्ये भीतीचे वातावरण निर्माण झाले आहे .

छोट्या दुकाने , फेरीविक्री आणि किरकोळ व्यापार करणाऱ्या परदेशी नागरिकांना लक्ष केले जात असल्याने अनेकांनी आपले व्यवसाय बंद करण्यास किंवा देश सोडण्याची तयारी सुरु केली आहे . काही व्यापाऱ्यांनी या कारवाईची तुलना एखाद्या कुत्र्याला आमच्या अंगावर सोडल्यासारखी असल्याचे सांगत परिस्थितीबद्दल चिंता व्यक्त केली आहे .

रूटो सरकारचा नेमका निर्णय काय ?

रूटो सरकारचा दावा आहे कि केनियातील छोट्या व्यवसायामध्ये स्थानिक नागरिकांना प्राधान्य मिळाले पाहिजे . परदेशी नागरिकांनी मोठ्या गुंतवणुकीच्या क्षेत्रात व्यवसाय करावा . मात्र कमी भांडवलाच्या फेरीविक्री आणि छोट्या किरकोळ व्यवसायांमध्ये त्यांनी स्थानिक व्यापाऱ्यांशी स्पर्धा करू नये , अशी सरकारची भूमिका आहे .

७ सप्टेंबर पासून परेदशी नागरिकांकडून चालवले जाणारे काही छोटे व्यवसाय बंद करण्याची कारवाई सुरु करण्यात आली . त्याचबरोबर सरकारने परदेशी व्यापाऱ्यांच्या परवाने ,वर्क परमिट आणि व्यावसायिक कागदपत्रांची तपासणीही वाढवली आहे . मात्र कायदेशीर कागदपत्रे असलेल्या परदेशी नागरिकांना संरक्षण दिले जाईल , असे सरकारकडून स्पष्ट करण्यात आले आहे .

Russia-Ukraine War : मियामीत पुतिनला भेटायला झेलेन्स्की तयार! G20 मध्ये थेट चर्चेची तयारी

बुरुंडी नागरिकांमध्ये सर्वाधिक चिंता

या कारवाईचा परिणाम बुरुंडी , काँगो आणि इतर आफ्रिकी देशांमधून आलेल्या छोट्या व्यापाऱ्यांवर जाणवत आहे , नैरोबीतील बुरुंडी दूतावासाबाहेर मोठ्या संख्येने नागरिक जमा झाले असून काही जण परत मायदेशी जाण्यासाठी प्रवासाची कागदपत्रे मिळवण्याचा प्रयत्न करत आहेत .

काही स्थलांतरितांना व्यवसाय बंद होण्याबरोबरच छळ किंवा हिंसाचाराची भीती वाटत आहे , त्यामुळे रोजच्या व्यवसायावरही परिणाम झाला आहे . दुसरीकडे स्थानिक व्यापाऱ्यांमधील काही वर्ग सरकारच्या निर्णयाचे समर्थन करत असून , परदेशी नागरिकांमुळे स्थानिक रोजगार आणि छोट्या व्यवसायांवर दबाव वाढत असल्याचा त्यांच्या दावा आहे .

Hamza Bin Laden: अल-कायदाने 9/11च्या स्मृतिदिनानिमित्त अमेरिकेला दिली नवी वॉर्निंग? लादेनच्या मुलाचा 50 मिनिटांचा VIDEO VIRAL

कारवाईमुळे झेनोफोबियाची भीती वाढली

सरकारने ही मोहीम परदेशी नागरिकांविरोधात नसून कायद्याचे पालन आणि स्थानिक व्यापाऱ्यांचे संरक्षण करण्यासाठी असल्याचे म्हंटले आहे . परदेशी नागरिकांकडे आवश्यक परवाने आणि कागदपत्रे असल्यास त्यांना व्यवसाय करण्याची परवानगी राहील , असेही स्पष्ट करण्यात आले आहे .

मात्र कारवाईची पद्धत आणि निर्माण झालेली भीती यामुळे झेनोफोबिया म्हणजे परदेशी नागरिकांविरोधात द्वेष वाढवण्याची चिंता व्यक्त केली जात आहे . काही नागरिकांना देश सोडण्याचा विचार करावा लागत असल्याने केनियाच्या प्रतिमेवरही परिणाम होण्याची शक्यता आहे . सरकारने स्थानिक रोजगारांचे संरक्षण करताना परदेशी नागरिकांच्या सुरक्षेची हमी देणे हे आता मोठे आव्हान ठरणार आहे .