Modi invited to Brazil dinner Jinping upset BRICS tension rises
PM Narendra Modi Brazil : आगामी BRICS शिखर परिषदेला सुरुवात होण्याच्या पार्श्वभूमीवर एक मोठी राजनैतिक घडामोड समोर आली आहे. ब्राझीलने पंतप्रधान नरेंद्र मोदी यांना विशेष राज्य डिनरसाठी आमंत्रण दिले आहे. या विशेष निमंत्रणामुळे चीन नाराज झाल्याचे वृत्त आहे. परिणामी, चीनचे अध्यक्ष शी जिनपिंग यांनी स्वतः शिखर परिषदेला उपस्थित राहण्याचा कार्यक्रम रद्द केला आहे. या परिषदेला आता चीनचे पंतप्रधान ली क्यांग उपस्थित राहणार आहेत. यावर्षी ब्राझीलमध्ये होणाऱ्या BRICS (ब्राझील, रशिया, भारत, चीन, दक्षिण आफ्रिका) शिखर परिषदेसाठी सर्व देशांचे प्रतिनिधी एकत्र येणार होते. मात्र, वाढत्या आंतरराष्ट्रीय तणावाच्या पार्श्वभूमीवर चीन आणि रशियाचे अध्यक्ष अनुपस्थित राहण्याची शक्यता निर्माण झाली आहे.
ब्राझील सरकारने भारतीय पंतप्रधान नरेंद्र मोदी यांना राजकीय सन्मान म्हणून खास डिनरचे आमंत्रण दिले आहे. या निमंत्रणाला विशेष महत्त्व प्राप्त झाले असून, त्यामुळे चीनच्या राजकीय वर्तुळात अस्वस्थता निर्माण झाली आहे. हॉंगकॉंगस्थित ‘साउथ चायना मॉर्निंग पोस्ट’**ने यासंदर्भात वृत्त प्रसिद्ध केले असून, या वृत्तानुसार चीनचे अध्यक्ष शी जिनपिंग आता स्वतः उपस्थित न राहता त्यांच्या विश्वासू पंतप्रधान ली क्यांग यांना पाठवणार आहेत. ही बाब राजनैतिक दृष्टीने मोठी आहे, कारण गेल्या दशकात प्रथमच जिनपिंग BRICS शिखर परिषदेला गैरहजर राहणार आहेत.
जागतिक घडामोडी संबंधित बातम्या वाचण्यासाठी येथे क्लिक करा : ‘फक्त ‘या’ दोन गोष्टी केल्या तर…’ इराण अणुशक्ती बनण्यापासून दोन पावलं दूर, पेंटागॉनचा खळबळजनक अहवाल समोर
केवळ चीनच नव्हे, तर रशियाचे अध्यक्ष व्लादिमीर पुतिन यांचाही कार्यक्रम बदलला आहे. रशियाकडून अधिकृत माहिती देण्यात आली आहे की, पुतिन या परिषदेला व्हिडिओ कॉन्फरन्सिंगद्वारे सहभागी होतील, तर रशियाचे परराष्ट्र मंत्री सर्गेई लावरोव्ह प्रत्यक्ष उपस्थित राहतील. रशियन परराष्ट्र सल्लागार युरी उशाकोव्ह यांनी मॉस्कोमध्ये दिलेल्या माहितीनुसार, अंतरराष्ट्रीय गुन्हेगारी न्यायालयाच्या अटक वॉरंटमुळे पुतिन परदेश दौऱ्यांपासून सावधगिरी बाळगत आहेत. याच कारणामुळे त्यांनी २०२३ मध्ये दक्षिण आफ्रिकेतील ब्रिक्स परिषद देखील टाळली होती.
ब्राझील सध्या BRICS समूहाचे अध्यक्षस्थान भूषवत आहे, आणि ६-७ जुलै २०२५ रोजी रिओ दि जानेरो येथे १७ वी नियमित BRICS परिषद आयोजित केली जात आहे. या परिषदेमध्ये यंदा इजिप्त, इथिओपिया, इराण, सौदी अरेबिया आणि युएई हे नवे सदस्य सहभागी होणार आहेत. त्यामुळे BRICS चा विस्तार हा देखील यंदाच्या परिषदेचा केंद्रबिंदू ठरणार आहे.
मोदींसाठी दिलेल्या विशेष निमंत्रणामुळे ब्राझीलने भारताशी वाढत्या जवळीकीचा संकेत दिला आहे. दुसरीकडे, जिनपिंग आणि पुतिन यांची अनुपस्थिती ही BRICS अंतर्गत असलेल्या राजनैतिक मतभेदांची आणि सत्ता संघर्षाची झलक दाखवत आहे. अमेरिकेच्या जागतिक वर्चस्वाला पर्याय म्हणून तयार झालेला BRICS आता नव्या युगात प्रवेश करत आहे. या बदलत्या परिस्थितीत, भारताची भूमिका अधिक महत्त्वाची ठरत आहे, आणि ब्राझीलने यावर शिक्कामोर्तब केल्याचे या निमंत्रणातून स्पष्ट होते.
जागतिक घडामोडी संबंधित बातम्या वाचण्यासाठी येथे क्लिक करा : हिंद महासागरात रचला जातोय मृत्यूचा सापळा? भारतासाठी सावधानतेचा इशारा, ‘या’ तीन देशांचे मिळून मोठे षडयंत्र
मोदींसाठी ब्राझीलने दिलेल्या डिनर आमंत्रणाने BRICS परिषदेच्या राजकीय रंगतला एक नवा आयाम दिला आहे. चीनची नाराजी, जिनपिंग यांचा गैरहजर कार्यक्रम, आणि रशियाच्या संकोचपूर्ण भूमिकेमुळे यंदाची BRICS परिषद गणितांच्या आणि नजरा वळवणाऱ्या घटनांची साक्षीदार ठरणार आहे.
.png "Videos"){kind=small}
