SCO summit 2027 : पाकिस्तान 2027 मध्ये SCO शिखर परिषदेचे आयोजन करणार; शाहबाज शरीफ यांची घोषणा

SCO summit : तियानजिन SCO शिखर परिषदेत पाकिस्तानने सिंधू पाणी कराराचा मुद्दा उपस्थित केल्यानंतर दोन आठवड्यांनी ही घोषणा करण्यात आली. SCOओने पहलगाम आणि बलुचिस्तान दहशतवादी हल्ल्यांचा तीव्र निषेध केला.

• पाकिस्तान २०२७ मध्ये शांघाय सहकार्य संघटनेचे (SCO) शिखर परिषदेचे आयोजन करणार.

• चीनच्या तियानजिन परिषदेनंतर शाहबाज शरीफ यांची मोठी घोषणा.

• SCO सदस्यांनी पहलगाम व बलुचिस्तान दहशतवादी हल्ल्यांचा तीव्र निषेध केला.

Pakistan SCO summit 2027 : पाकिस्तानचे पंतप्रधान शाहबाज शरीफ यांनी शनिवारी मोठी घोषणा केली. २०२७ मध्ये पाकिस्तान शांघाय सहकार्य संघटनेच्या (SCO) शिखर परिषदेचे आयोजन करणार आहे. रावळपिंडीतील एका रस्ते विकास प्रकल्पाच्या उद्घाटनप्रसंगी त्यांनी ही घोषणा केली. इस्लामाबादला आंतरराष्ट्रीय दर्जाचे स्वरूप देण्यासाठी आतापासून तयारी सुरू करण्याची सूचना शरीफ यांनी दिली. यापूर्वी चीनच्या तियानजिन येथे नुकतीच SCO परिषद झाली होती. त्यानंतर केवळ दोन आठवड्यांत पाकिस्तानने पुढील शिखर परिषदेबाबत तयारी दाखवून दिली आहे. या तियानजिन परिषदेच्या वेळी पाकिस्तानने सिंधू पाणी कराराचा मुद्दा मांडला होता. एप्रिल महिन्यात जम्मू-काश्मीरमधील पहलगाम येथे झालेल्या दहशतवादी हल्ल्यानंतर भारताने हा करार स्थगित केला होता. त्या हल्ल्यात २६ जणांचा बळी गेला होता.

दहशतवादाविरुद्ध कडक भूमिका

तियानजिन परिषदेनंतर SCO सदस्य देशांनी एकत्रित जाहीरनामा प्रसिद्ध करत दहशतवादाचा तीव्र निषेध केला. पहलगाम दहशतवादी हल्ल्याबरोबरच पाकिस्तानमधील बलुचिस्तान प्रांतातील खुजदार आणि जाफर एक्सप्रेसवरील हल्ल्यांनाही कठोर शब्दांत धिक्कारले गेले.
भारताची “दहशतवादाविरुद्ध लढाईत दुहेरी निकष अस्वीकार्य आहेत” ही भूमिका संघटनेने मान्य केली. यामुळे प्रादेशिक पातळीवर दहशतवादविरोधी सहकार्य अधिक मजबूत होणार असल्याचे मानले जात आहे.

जागतिक घडामोडी संबंधित बातम्या वाचण्यासाठी येथे क्लिक करा : 50% Tariff : मोदीजी अ‍ॅक्शन मोडमध्ये! ट्रम्पच्या 50% टॅरिफवर करणार पुढचा हल्ला; रशियाचे उपपंतप्रधान करणार भारत दौरा

पाकिस्तानचा मागील अनुभव

पाकिस्तानने यापूर्वी २०२४ मध्ये SCO सरकारप्रमुखांच्या परिषदेचे आयोजन केले होते. त्या वेळी शाहबाज शरीफ यांनी या प्रदेशातील परस्पर कनेक्टिव्हिटी व आर्थिक सहकार्य वाढवण्यासाठी गुंतवणुकीवर भर द्यावा अशी सूचना केली होती. या परिषदेसाठी पाकिस्तान सरकारने तीन दिवसांची सार्वजनिक सुट्टी जाहीर केली होती.

SCO म्हणजे काय?

शांघाय सहकार्य संघटनेची (SCO) स्थापना जून २००१ मध्ये चीनमधील शांघाय शहरात झाली. प्रारंभी फक्त ६ देशांचा समावेश असलेल्या या संघटनेचा विस्तार आज २६ देशांपर्यंत झाला आहे. सध्या यात १० सदस्य, २ निरीक्षक आणि १४ संवाद भागीदार आहेत. चीन, रशिया आणि भारत यांसारखे महत्त्वाचे देश याचे सदस्य आहेत. आज या संघटनेत जगाच्या जवळजवळ अर्ध्या लोकसंख्येचे प्रतिनिधित्व आहे. तसेच जागतिक अर्थव्यवस्थेच्या जवळपास २५% हिश्श्याचे प्रतिनिधित्वही SCO करते. त्यामुळे या संघटनेच्या शिखर परिषदा केवळ प्रादेशिक नाहीत तर जागतिक पातळीवर प्रभाव टाकणाऱ्या ठरतात.

जागतिक घडामोडी संबंधित बातम्या वाचण्यासाठी येथे क्लिक करा : Diella : भ्रष्टाचाराविरुद्ध डिजिटल शस्त्र! ‘या’ देशाच्या सरकारने नियुक्त केली जगातील पहिली AI मंत्री, पहा VIDEO

पाकिस्तानसाठी आव्हान आणि संधी

२०२७ मधील शिखर परिषद पाकिस्तानसाठी मोठा राजनैतिक व आर्थिक टप्पा ठरणार आहे. या आयोजनातून पाकिस्तान जगासमोर आपली आंतरराष्ट्रीय प्रतिमा उंचावण्याचा प्रयत्न करणार आहे. मात्र त्याचवेळी देशातील सुरक्षा, दहशतवाद आणि आर्थिक संकट ही मोठी आव्हाने असतील. शाहबाज शरीफ यांच्या विधानानुसार, “इस्लामाबादला सुंदर बनवण्याची” गरज केवळ पायाभूत सुविधा उभारण्यापुरती मर्यादित नाही, तर देशाच्या एकंदर स्थैर्य आणि प्रतिमेचा प्रश्न आहे. त्यामुळे पुढील दोन वर्षांत पाकिस्तान सरकारने मोठे राजनैतिक आणि सुरक्षा प्रयत्न करावे लागतील.