World Finance News :शांत बसतील ते ट्रम्प कसले; प्रशासनाचा ‘परप फ्युचर्स’ला हिरवा कंदील; आर्थिक बाजारात संघर्षाची चिन्हे

World Finance News : ट्रम्प प्रशासनाने अमेरिकेत क्रिप्टो आणि कंपन्यांच्या शेअर्सवरील परप फ्युचर्स व्यवहारांना प्रोत्साहन दिले आहे. मात्र, या निर्णयामुळे CME, Cboe आणि Citadel यांसारख्या पारंपरिक वित्तीय संस्थांनी विरोधाची भूमिका घेतली असून कायदेशीर संघर्ष सुरू झाला आहे .

• नेमके काय आहेत परप फ्युचर्स ? व्यवहाराला वेळेचे बंधन नाही
• क्रिप्टोपासून आता कंपन्यांच्या शेअर्सपर्यंत विस्तार
• वॉल स्ट्रीटचा विरोध ; कायदेशीर लढाईमुळे संघर्ष टोकावर

World Finance News : अमेरिकेचे राष्ट्राध्यक्ष डोनाल्ड ट्रम्प यांच्या प्रशासनाने क्रिप्टोकरन्सी आणि शेअर बाजाराशी संबंधित परप ( Perpetual Futures ) या नव्या आर्थिक व्यवहारांना प्रोत्साहन देण्यास सुरवात केली आहे . मात्र सरकारच्या या निर्णयामुळे वॉल स्ट्रीट मधील पारंपरिक आर्थिक संस्थांमध्ये अस्वस्थता निर्माण झाली आहे . नव्या ट्रेडिंग प्लॅटफॉर्ममुळे पारंपरिक शेअर बाजार आणि डेरिव्हेटीव्ह व्यवहारांवरील त्यांचे वर्चस्व कमी होण्याची भीती व्यक्त केली जात आहे . या नव्या आर्थिक उत्पादनामुळे बाजारातील जोखीम वाढू शकते .

असा इशाराही वित्तीय क्षेत्रातील दिग्गजांनी दिला आहे . मध्यावधी निवडणुकीत सपाटून मार खाल्यानंतर काही काळासाठी ट्रम्प शांत बसतील अशी चर्चा आणि तसे वातावरण असताना ट्रम्प यांनी सगळ्यांच्या भाकितांवर पाणी फेरले आहे . पण मिळालेल्या माहिती नुसार हा निर्णय अजून अमलात आणला गेला नाही . यासाठी त्याला सिनेट मध्ये काँग्रेसचे समर्थन घ्यावे लागेल कि नाही हे अजून स्पष्ट झाले नाही .

नेमके काय आहेत परप फ्युचर्स ? व्यवहाराला वेळेचे बंधन नाही

परप फ्युचर्स म्हणजे असे आर्थिक करार , ज्यांना पारंपरिक फ्युचर्स व्यवहारांप्रमाणे ठराविक समाप्ती तारीख नसते . त्यामुळे गुंतवणूकदारांना आपली ट्रेडिंग पोझिशन दीर्घकाळ कायम ठेवता येते . क्रिप्टोकरन्सी बाजारात या प्रकारच्या व्यवहारांना मोठी लोकप्रियता मिळाली आहे .

अनेक प्लॅटफॉर्मवर मोठ्या प्रमाणात लिव्हीरेजची सुविधाही दिली जाते . त्यामुळे कमी भांडवलात मोठ्या रकमेच्या व्यवहारांमध्ये सहभागी होता येते . मात्र बाजारातील किंमत उलट दिशेने गेल्यास नुकसानही अनेक पटींनी वाढू शकते . २०२५ मध्ये जागतिक क्रिप्टो परप व्यवहारांचे प्रमाण तब्बल ६१.७ ट्रिलियन डॉलरपर्यंत पोहचले होते .

Climate Change News : जीवघेण्या उष्णतेच्या लाटा आणि महापूर, हवामान बदलाचा धोका; जागतिक नेते एकत्र येणार

क्रिप्टोपासून आता कंपन्यांच्या शेअर्सपर्यंत विस्तार

अमेरिकेच्या कमोडिटी फ्युचर्स ट्रेडिंग कमिशनने या नवीन आर्थिक उत्पादनांना देशांतर्गत नियंत्रित बाजारपेठेत प्रवेश देण्याचा मार्ग खुला केला आहे . यापूर्वी बिटकॉइनसारख्या डिजिटल मालमत्ताशी संबंधित परप फ्युचर्सना परवानगी देण्यात आली होती .

आता ३ नोव्हेंबर २०२६ पासून वैयक्तिक कंपन्यांच्या शेअर्सवर आधारित परप फ्युचर्स व्यवहारांनाही मान्यता मिळाली आहे . CFTC चे अध्यक्ष मायकेल सेलिंग यांच्या मते , अशा व्यवहारांना अमेरिकेच्या नियामक चौकटीत आणल्यामुळे गुंतवणूकदारांना अधिक सुरक्षित वातावरण मिळू शकते . मात्र या निर्णयामुळे पारंपरिक शेअर बाजारातील व्यवहारांची रचना बदलण्याची शक्यता आहे .

Diwali In USA: ‘मामदानींनी रांगोळी काढली, अब्दुल सय्यद यांनी दिवा लावला’, अमेरिकन मुस्लिम नेत्यांची मोठ्या उत्साहात दिवाळी साजरी

वॉल स्ट्रीटचा विरोध ; कायदेशीर लढाईमुळे संघर्ष टोकावर

ट्रम्प प्रशासनाच्या या निर्णयाला पारंपरिक वित्तीय संस्थांकडून विरोध होत आहे . CME ग्रुपने यापूर्वी क्रिप्टो परप फ्युचर्सच्या मंजुरीविरोधात न्यायालयात धाव घेतली होती . त्यानंतर Cboe आणि citadel securities यांसारख्या दिग्गज कंपन्यांच्या पाठिंब्याने Capital Markets Alliance या संघटनेने शेअर्सवरील परप फ्युचर्सच्या मंजुरीला आव्हान दिले आहे .

तर दुसरीकडे नव्या प्लॅटफॉर्मचे म्हणणे आहे की अमेरिकेत नियमबद्ध व्यवहारांना परवानगी दिल्यास गुंतवणूकदारांना परदेशातील अनियंत्रित बाजारपेठांवर अवलंबून राहावे लागणार नाही . आता या संघर्षात न्यायालय काय निर्णय देते आणि पारंपरिक वॉल स्ट्रीट कंपन्यांना नव्या स्पर्धेचा किती फटका बसतो , याकडे जागतिक आर्थिक क्षेत्राचे लक्ष लागले आहे .