Who will be the next President of Russia Putin announces plan for successor
Next President of Russia : रशियाचे अध्यक्ष व्लादिमीर पुतिन हे जगातील सर्वात प्रभावशाली आणि वादग्रस्त नेत्यांपैकी एक मानले जातात. त्यांच्या एका विधानाने पुन्हा एकदा आंतरराष्ट्रीय चर्चेला हवा मिळवून दिली आहे. पुतिन यांनी नुकतेच स्पष्ट केले की रशियाचे भविष्यातील नेतृत्व हे युक्रेनच्या युद्धभूमी पाहिलेल्या सैनिकांच्या हाती असावे. म्हणजेच रशियाचा पुढचा राष्ट्रपती किंवा सर्वोच्च नेता असा कोणी असेल ज्याने युद्धात प्रत्यक्ष सहभाग घेतलेला असेल.
रशियन संसदेत (ड्यूमा) विविध पक्षांच्या नेत्यांशी बोलताना पुतिन म्हणाले की, “देशासाठी ज्यांनी आपले जीवन धोक्यात घातले आहे, त्यांनीच पुढे राजकारणात आणि सत्तेत स्थान मिळवले पाहिजे.” पुतिन यांच्या या विधानातून असे दिसते की भविष्यातील राजकीय वारस म्हणून युद्धातून तयार झालेले सैनिक आणि अधिकारी समोर येतील. आजपर्यंत रशियाच्या इतिहासात ‘योद्धा-नेते’ ही परंपरा फारशी ठळक नव्हती. पण पुतिन यांनी आता स्पष्ट केले आहे की युक्रेनच्या युद्धाने जे लोक घडवले आहेत, तेच रशियाच्या राजकीय भविष्याचा पाया घालतील.
जागतिक घडामोडी संबंधित बातम्या वाचण्यासाठी येथे क्लिक करा : Pakistan Saudi deal: ‘रियाधला अणु कवच मिळणार नाही…’; पाकिस्तानच्या संरक्षणमंत्र्यांनी स्वतःच सांगितली सौदी कराराची खरी कहाणी
रशियामध्ये गेल्या काही वर्षांपासून विरोधाचा आवाज जवळजवळ थांबला आहे. पुतिन यांचा युनायटेड रशिया पक्ष प्रचंड वर्चस्व गाजवत आहे. निवडणुकांमध्येही विरोधकांना फारसा वाव दिला जात नाही. पुतिन यांच्या ताज्या विधानावरून स्पष्ट होते की पुढे रशियाचे राजकारण आणखी कट्टर राष्ट्रवादी भूमिकेतून चालेल. याचा अर्थ असा की, पुतिन यांची कारकीर्द संपल्यानंतरही त्यांच्या विचारसरणीचे वारस तयार झालेले असतील आणि तेच देशाच्या सत्तेची सूत्रे हाताळतील.
फेब्रुवारी २०२२ मध्ये रशियाने युक्रेनवर आक्रमण केले आणि तेव्हापासून युद्धाचा फैलाव प्रचंड वाढला आहे. रशियाने लाखो सैनिकांना आघाडीवर पाठवले आहे. कैद्यांनाही तुरुंगातून सोडून युद्धात झोकून दिले आहे. अधिकृत आकडेवारी रशिया जाहीर करत नसला, तरी बीबीसी आणि स्वतंत्र माध्यमांच्या मते आतापर्यंत किमान १,३०,००० रशियन सैनिक युद्धात मृत्युमुखी पडले आहेत. फक्त मृत्यूच नाही तर परतणाऱ्या सैनिकांपैकी अनेकजण मानसिक व शारीरिकदृष्ट्या खचलेले आहेत. त्यांच्यात हिंस्र प्रवृत्ती वाढत असून समाजात गुन्हेगारी, हिंसाचार आणि तणाव वाढत आहे. अहवाल सांगतात की २०२५ च्या सुरुवातीपर्यंत अंदाजे १५ लाख रशियन नागरिक या युद्धात सामील होतील.
युद्धामुळे रशियाच्या समाजात अस्थिरता निर्माण झाली आहे. एकीकडे राष्ट्रवादी विचारांचा प्रभाव प्रचंड वाढला आहे, तर दुसरीकडे लोकांना आर्थिक आणि सामाजिक तणावांना सामोरे जावे लागत आहे. कुटुंबातील तरुण पुरुष युद्धात गमावल्यामुळे हजारो घरांचे भविष्य उद्ध्वस्त झाले आहे.
या सगळ्या पार्श्वभूमीवर पुतिन यांचे विधान खूप महत्त्वाचे आहे. त्यांनी युद्धातून तयार झालेले सैनिक भविष्यातील राजकारणात आणण्याचा विचार जाहीर केला आहे. याचा अर्थ रशियामध्ये अशी एक पिढी उभी राहील जी राष्ट्रवाद, लढाईचा अनुभव आणि कठोर शिस्त या मूल्यांवर चालेल. पुतिन यांना वाटते की अशा लोकांनाच देश चालवण्याचा अधिकार मिळावा, कारण त्यांनी ‘रशियासाठी प्राण धोक्यात घातले आहेत.’ परंतु या भूमिकेमुळे रशियाचे राजकारण आणखी आक्रमक व कट्टर होण्याची शक्यता आहे.
जागतिक घडामोडी संबंधित बातम्या वाचण्यासाठी येथे क्लिक करा : India US Trade Deal : भारतीय उद्योगांसाठी सुवर्णकाळ येणार? मुख्य आर्थिक सल्लागारांचा ‘Trump Tariff’ वर धाडसी दावा
युद्ध अजून संपलेले नाही. अमेरिकेचे राष्ट्राध्यक्ष डोनाल्ड ट्रम्प शांतता करार घडवून आणण्याचा प्रयत्न करत आहेत, पण त्यांना अजून कोणतेही मोठे यश मिळालेले नाही. रशिया युक्रेनचा पाचवा भाग ताब्यात घेतल्यानंतर युद्धबंदीऐवजी थेट कराराची मागणी करत आहे. रशियाची अट अशी आहे की युक्रेनने नाटोमध्ये सामील होऊ नये आणि काही प्रदेश रशियाला द्यावेत. मात्र, युक्रेन याला मान्य नाही. त्यांचा दावा आहे की रशिया त्यांचे सार्वभौमत्व नष्ट करून त्यांना पूर्णपणे गिळंकृत करण्याचा प्रयत्न करत आहे.
पुतिन यांच्या या विधानामुळे आंतरराष्ट्रीय राजकारणात नवा प्रश्न निर्माण झाला आहे “रशियाचा पुढचा नेता कोण?” जर तो युद्धातून आलेला सैनिक असेल, तर रशियाची धोरणे अधिक आक्रमक, राष्ट्रवादी आणि कट्टरवादी असतील का? रशियाच्या भविष्यातील नेत्याचा चेहरा अजून अस्पष्ट आहे, पण एवढे मात्र नक्की की पुतिन यांनी ‘वारसाची बीजे’ आधीच पेरली आहेत. आता जगभरातील तज्ज्ञांचे लक्ष या गोष्टीकडे लागले आहे की, पुतिननंतर रशिया आणखी आक्रमक होईल की शांततेकडे वळेल?
.png "Videos"){kind=small}
