१० वर्षांनंतर ‘OG’ हिमालयनचा नवा अवतार! रॉयल एनफिल्ड Himalayan 440 लाँच; ₹२.२९ लाखांत क्लासिक ॲडव्हेंचर बाईकची रिएंट्री

तब्बल १० वर्षांनंतर मूळ ‘OG’ हिमालयन नव्या अवतारात परतली आहे! ₹२.२९ लाखांत आलेली Himalayan 440 क्लासिक लूक कायम ठेवत आधुनिक इंजिन, फीचर्स आणि दमदार ऑफ-रोड क्षमता घेऊन पुन्हा ॲडव्हेंचरप्रेमींना आकर्षित करणार आहे.

रॉयल एनफिल्डने आपल्या ॲडव्हेंचर-टूरिंग प्रवासाची सुरुवात करणाऱ्या आयकॉनिक मोटरसायकलला पुन्हा एकदा नव्या रूपात सादर केले आहे. मूळ हिमालयनच्या लाँचिंगला बरोबर १० वर्षे पूर्ण झाल्याच्या निमित्ताने नवीन Himalayan 440 भारतात ₹२.२९ लाख (एक्स-शोरूम) या किमतीत लाँच करण्यात आली आहे. लडाख येथील पहिल्या ‘हिमालयन बेसकॅम्प’ इवेंट दरम्यान या बाईकचे अनावरण करण्यात आले असून ४ सप्टेंबर २०२६ पासून यासाठीचे बुकिंग सुरू झाले आहे.

नवीन डिझाइन आणि लूक

दिसायला Himalayan 440 ची रचना मूळ हिमालयनसारखीच ठेवण्यात आली आहे. यात उंच स्टान्स, गोल हेडलॅम्प, मोठे २४-इंची फ्रंट व्हील, स्पोक व्हील्स आणि रग्ड बॉडीवर्क पाहायला मिळते. १० व्या वर्धापनदिनाचे औचित्य साधून सुरुवातीच्या मॉडेल्सच्या फ्युल टाकीवर स्पेशल बॅज देण्यात आले आहे. ही बाईक सेला ब्लॅक, मस्टँग ब्राऊन आणि नेलाँग व्हाईट या तीन आकर्षक रंगांमध्ये उपलब्ध असेल.

Royal Enfield August 2026 Sales: ऑगस्ट २०२६ मध्ये रॉयल एनफिल्डचा धमाका! विक्रीत ११% वाढ, १.२६ लाख दुचाकींची विक्री

दमदार इंजिन आणि परफॉर्मन्स

या बाईकमध्ये ४४३ सीसीचे सिंगल-सिलेंडर, एअर-कूल्ड, लाँग-स्ट्रोक इंजिन देण्यात आले आहे, जे ६,२५० rpm वर २५.४ bhp पॉवर आणि ४,००० rpm वर ३४ Nm टॉर्क निर्माण करते. यात नवीन ६-स्पीड गियरबॉक्स जोडण्यात आला आहे, ज्यामुळे ट्रॅफिकमध्ये गाडी चालवणे आणि हायवेवर क्रूझिंग करणे अधिक सोपे होते. याशिवाय इंजिनचे व्हेब्रेशन्स आणि आवाज कमी करण्यात आल्यामुळे लांबचा प्रवास अधिक आरामदायी होईल.

चेसिस आणि ऑफ-रोडिंग क्षमता

बाईकमध्ये हाफ-ड्यूप्लेक्स स्प्लिट-क्रेडल फ्रेम वापरण्यात आली असून समोर ४१ मिमी टेलिस्कोपिक फोर्क्स (२०० मिमी ट्रॅव्हल) आणि मागे लिंकेज-टाईप मोनोशॉक (१८० मिमी ट्रॅव्हल) सस्पेंशन दिले आहे. २१-इंच फ्रंट आणि १७-इंच रिअर स्पोक व्हील्ससह २२० मिमी ग्राऊंड क्लिअरन्समुळे ही बाईक खराब रस्त्यांवर आणि कच्च्या वाटेवर उत्तम कामगिरी करते.

Royal Enfield Himalayan 450 VS Triumph Scrambler 400 X : ऑफ-रोडिंग आणि लाँग राइडसाठी कोणती बाईक अधिक भारी आहे?

फीचर्स आणि सुरक्षेची काळजी

सुरक्षेसाठी आणि सोयीसाठी यात नवीन LED हेडलॅम्प, डिजिटल-ॲनालॉग इन्स्ट्रुमेंट क्लस्टर, ट्रिपर नॅव्हिगेशन आणि टाईप-सी USB चार्जर दिले आहे. ब्रेकिंगसाठी समोर ३०० मिमी आणि मागे २४० मिमी डिस्क ब्रेक असून यात ड्युअल-चॅनेल ABS देण्यात आले आहे, जे गरजेनुसार मागील चाकासाठी बंद करता येते.

सोपा आणि सोयीस्कर प्रवास

८०० मिमी सीटची उंची, १९९ किलोग्रॅम वजन आणि १५ लिटरची इंधन टाकी असलेली ही बाईक चालवण्यासाठी अत्यंत सोपी आहे. सोबतच पॅनियर्स, टॉप बॉक्स, टूरिंग सीट्स आणि हँडगार्ड्स यांसारख्या अधिकृत ॲक्सेसरीजचा पर्यायही उपलब्ध करून देण्यात आला आहे.