सुझुकीची छोटी इलेक्ट्रिक कार e-Sky लाँच होणार! 310 किमी रेंज, किंमत सुमारे ₹12.97 लाख

सुझुकी e-Sky ही नवीन इलेक्ट्रिक केई कार जपानमध्ये 16 नोव्हेंबरपासून विक्रीसाठी येणार आहे. तिची किंमत सुमारे ₹12.97 लाख ते ₹17.07 लाख असून, 26 kWh बॅटरीच्या मदतीने WLTC चाचणीनुसार 310 किमीपर्यंत रेंज मिळण्याचा दावा आहे.

इलेक्ट्रिक कारच्या मार्केटमध्ये आता छोट्या आणि परवडेबल गाड्यांची स्पर्धा वाढत आहे. याच पार्श्वभूमीवर सुझुकीने आपली नवीन इलेक्ट्रिक कार e-Sky जपानमध्ये सादर करण्याची तयारी केली आहे. ही कार 16 नोव्हेंबरपासून जपानमध्ये विक्रीसाठी येणार असून, तिची सुरुवातीची किंमत सुमारे ₹12.97 लाख आहे. टॉप व्हेरिएंटची किंमत अंदाजे ₹17.07 लाखांपर्यंत जाते. कंपनीने ही कार युरोपमध्येही 2027 मध्ये आणण्याची योजना आखली आहे. पण भारतात लाँच करण्याबाबत अद्याप कोणतीही घोषणा करण्यात आलेली नाही.

छोटा आकार– मोठा धमाका, खास इलेक्ट्रिक प्लॅटफॉर्म

सुझुकी e-Sky ची लांबी 3,395 मिमी, रुंदी 1,475 मिमी आणि उंची 1,625 मिमी आहे. कारचा व्हीलबेस 2,460 मिमी असून ग्राउंड क्लिअरन्स 140 मिमी आहे. या कारसाठी कंपनीने Heartect-e नावाचा स्वतंत्र इलेक्ट्रिक प्लॅटफॉर्म विकसित केला आहे. यामुळे बॅटरी आणि मोटरसह इतर घटकांची जागा अधिक कार्यक्षम पद्धतीने वापरण्यास मदत होते.

सुझुकी V-Strom SX ला नवा अवतार! ₹2.02 लाखांत मिळणार ड्युअल-टोन कलर

कारमध्ये BB8A कोडनेम असलेली इलेक्ट्रिक मोटर देण्यात आली आहे. ही मोटर 47 kW म्हणजेच 63hp पॉवर आणि 133Nm टॉर्क निर्माण करते. मोटर, इन्व्हर्टर आणि रिडक्शन गिअर्स एकत्र असलेली eAxle सिस्टीम केवळ 47 किलो वजनाची आहे.

एका चार्जमध्ये 310 किमी रेंज

सुझुकी e-Sky मध्ये 26 kWh बॅटरी पॅक देण्यात आला आहे. ही बॅटरी बीवायडीशी संबंधित कंपनीकडून घेतली जात असल्याचे सांगितले जाते. कंपनीच्या माहितीनुसार, कारचा ऊर्जावापर 97 Wh/km इतका कमी आहे. त्यामुळे WLTC टेस्ट सायकलनुसार ती एका चार्जमध्ये 310 किमीपर्यंत अंतर कापू शकते. प्रत्यक्ष रेंज मात्र ड्रायव्हिंग स्टाइल, वेग, हवामान आणि एसीच्या वापरानुसार बदलू शकते.

न्यू रेनॉल्ट डस्टर स्ट्रॉन्ग हायब्रिड देणार तब्बल २९ किमी प्रति लीटरचे मायलेज! मिळाले ARAI-सर्टिफिकेशन !

चार्जिंग आणि फीचर्स

या कारमध्ये स्टँडर्ड स्वरूपात 6 kW एसी चार्जिंगची सुविधा मिळते. कमी बॅटरीचा इशारा मिळाल्यापासून पूर्ण चार्ज होण्यासाठी सुमारे 4.5 तास लागतात. टॉप व्हेरिएंटमध्ये 50 kW डीसी फास्ट चार्जिंगची सुविधा असून, 80% चार्ज होण्यासाठी सुमारे 25 मिनिटे लागतात.

फीचर्समध्ये 10.1-इंच टचस्क्रीन, 4.2-इंच ड्रायव्हर डिस्प्ले, एलईडी हेडलॅम्प्स, हीटेड फ्रंट सीट्स, हीटेड स्टिअरिंग व्हील आणि 6 स्पीकर्सचा समावेश आहे. सुरक्षेसाठी 6 एअरबॅग्स, 360-डिग्री कॅमेरा, लेन डिपार्चर वॉर्निंग, अडॅप्टिव्ह क्रूझ कंट्रोल आणि लेन कीपिंग असिस्ट यांसारखी फीचर्स मिळतात.

जपानमधील छोट्या कारच्या सेगमेंटमध्ये सुझुकी e-Sky ची स्पर्धा बीवायडी रॅको आणि होंडा N-One यांच्याशी होणार आहे. कमी आकार, कमी ऊर्जावापर आणि 310 किमीपर्यंतची दावा केलेली रेंज यामुळे ही कार लक्षवेधी ठरू शकते.