Triumph Bonneville T40 vs T4: इंजिन तेच, दम तोच; मग ₹25,000 जास्त कशासाठी? जाणून घ्या पूर्ण हिशोब!

ट्रायम्फ बॉनव्हिल टी4, टी40 आणि टी40 ब्लॅक या एंट्री-लेव्हल क्लासिक बाईक्समध्ये 349cc इंजिन, 6-स्पीड गिअरबॉक्स आणि समान सस्पेन्शन सेटअप आहे. टी4 ची एक्स-शोरूम किंमत ₹2.55 लाख, तर टी40 आणि टी40 ब्लॅकची किंमत ₹2.80 लाख आहे.

ट्रायम्फने आपल्या एंट्री-लेव्हल बॉनव्हिल सीरिजमध्ये टी4, टी40 आणि टी40 ब्लॅक असे ऑप्शन दिले आहेत. या बाईक्स दिसायला क्लासिक असल्या तरी त्यांच्यातील फीचर्स आणि किंमतीमुळे खरेदीदारांसमोर निवडीचा प्रश्न निर्माण होतो. ट्रायम्फ बॉनव्हिल टी4 ची एक्स-शोरूम किंमत ₹2.55 लाख आहे, तर टी40 आणि टी40 ब्लॅकसाठी ₹2.80 लाख मोजावे लागतात. म्हणजेच टी40 साठी ₹25,000 जास्त खर्च करावा लागतो. पण या जास्त किमतीत नेमके काय मिळते? चला बघुयात.

इंजिन आणि परफॉर्मन्समध्ये फरक नाही

ट्रायम्फ बॉनव्हिल टी4 आणि टी40 या दोन्ही बाईक्समध्ये 349cc लिक्विड-कूल्ड, सिंगल-सिलेंडर इंजिन आहे. हे इंजिन 7,000 rpm वर 29 PS पॉवर आणि 5,500 rpm वर 31 Nm टॉर्क देते. यासोबत 6-स्पीड गिअरबॉक्स आणि असिस्ट-अँड-स्लिपर क्लच मिळतो. दोन्ही बाईक्सचा दावा केलेला टॉप स्पीड 132 किमी प्रतितास आहे. इंजिन, ब्रेक्स, सस्पेन्शन आणि चेसिसमध्ये समानता असल्यामुळे परफॉर्मन्सच्या बाबतीत मोठा फरक अपेक्षित नाही.

ट्रायम्फच्या 3 बाइक्सचा नवा अवतार! Tiger 1200, Tiger 900 आणि Street Triple 798 मध्ये मोठे अपडेट्स

₹25,000 जास्त दिल्यावर कोणते फीचर्स मिळतात?

टी40 मध्ये गोलाकार TFT इन्स्ट्रुमेंट डिस्प्ले, क्रूझ कंट्रोल, कॉर्नरिंग ड्युअल-चॅनल ABS आणि गरजेनुसार सेट करता येणारे ट्रॅक्शन कंट्रोल मिळते. टी4 मध्ये कलर LCD डिस्प्ले असून टर्न-बाय-टर्न नेव्हिगेशनची सुविधा आहे. दोन्ही मॉडेल्समध्ये ट्रॅक्शन कंट्रोल, नेव्हिगेशन, USB चार्जिंग आणि रायडिंग मोड्स मिळतात. त्यामुळे टी40 ची जास्त किंमत मुख्यतः अतिरिक्त रायडर-असिस्ट फीचर्स आणि TFT डिस्प्लेसाठी आहे.

डिझाइन आणि हार्डवेअरमध्ये समानता

दोन्ही बाईक्समध्ये ट्युब्युलर स्टील फ्रेम, 43 मिमी फ्रंट फोर्क आणि 7-स्टेप प्रीलोड अ‍ॅडजस्टमेंट असलेले मागचे ट्विन शॉक अ‍ॅब्झॉर्बर्स आहेत. पुढे 310 मिमी आणि मागे 255 मिमी डिस्क ब्रेक दिले आहेत. दोन्हींची लांबी 2,140 मिमी, सीटची उंची 790 मिमी आणि वजन 195 किलो आहे. फ्युल टँकची कॅपसिटी 14 लिटर आहे.

ट्रायम्फची नवी 350cc बोनव्हिल T40 लाँच! ₹2.80 लाखांत मिळणार रेट्रो लूकसह जबरदस्त फीचर्स

रंगांमध्येही वेगळी ओळख

टी4 फँटम ब्लॅक, कार्निव्हल रेड आणि कॉम्पिटिशन ग्रीन रंगांत मिळते. टी40 मध्ये एजियन ब्लू-फ्युजन व्हाइट, मेरिडेन ब्लू-टँजरीन ऑरेंज आणि न्यू इंग्लंड व्हाइट-जेट ब्लॅक असे ड्युअल-टोन रंग आहेत. टी40 ब्लॅकमध्ये मॅट ग्रे-ब्लॅक फिनिश, काळे इंजिन पार्ट्स आणि ब्राऊन सीट मिळते.

कमी किंमतीत समान इंजिन आणि हार्डवेअर हवे असल्यास टी4 योग्य ठरू शकते. तर TFT, क्रूझ कंट्रोल आणि कॉर्नरिंग ABS सारखी फीचर्स महत्त्वाची वाटत असल्यास टी40 चा विचार करता येईल. टी40 ब्लॅकची निवड प्रामुख्याने त्याच्या वेगळ्या लूकसाठी करता येईल.