‘इंटरनॅशनल कौन्सिल ऑन क्लीन ट्रान्सपोर्टेशन’ च्या ‘ग्लोबल ऑटोमेकर रेटिंग्स २०२५’ अहवालानुसार, टाटा मोटर्स आणि महिंद्रा या भारतीय कंपन्या जगातील सर्वात जास्त एनर्जी एफीशीयंट ऊर्जा-कार्यक्षम इलेक्ट्रिक वाहन उत्पादक म्हणून समोर आल्या आहेत. या शर्यतीत त्यांनी टेस्ला आणि BYD सारख्या जागतिक टायकून कंपन्यांनाही मागे टाकले आहे.
या रेटिंगमध्ये जगभरातील २२ मोठ्या वाहन उत्पादक कंपन्यांचे मूल्यमापन करण्यात आले. या अहवालात कंपन्यांचा इलेक्ट्रिक व्हेईकल क्षेत्रातील बदल, ईव्हेंची विक्री, उत्पादनातील कार्बन उत्सर्जन कमी करण्याचे प्रयत्न आणि बॅटरी इलेक्ट्रिक व्हेईकलची कार्यक्षमता या घटकांचा अभ्यास करण्यात आला.
ऊर्जा कार्यक्षमतेत भारतीय कंपन्यांचा दबदबा
ऊर्जा कार्यक्षमतेच्या तुलनेत टाटा मोटर्सने जागतिक स्तरावर प्रथम स्थान पटकावले आहे. ICCT च्या मते, टाटा मोटर्सचे प्रति किलोमीटर विजेचा वापर दर्शवणारे प्रमाण अवघे १०६ Wh/km (वॉट-अवर प्रति किलोमीटर) नोंदवले गेले, जे सर्व उत्पादकांमध्ये सर्वोत्कृष्ट आहे. या यादीत ११३ Wh/km सह महिंद्रा ऑटोमोटिव्ह दुसऱ्या स्थानावर आहे.
ग्लोबल सरासरी १३१ Wh/km असताना, भारतीय कंपन्यांनी टेस्ला आणि BYD च्या तुलनेत खूपच कमी वीज वापर नोंदवला आहे. प्रति किलोमीटर कमी वीज वापराचा अर्थ असा की, ही वाहने कमी विजेत जास्त अंतर कापतात, ज्यामुळे वाहनाची कार्यक्षमता वाढते आणि ग्राहकांचा रनिंग कॉस्ट कमी होतो. टाटा मोटर्सने BYD च्या १२० Wh/km च्या तुलनेत १०६ Wh/km अशी उत्तम कामगिरी करून आघाडी घेतली.
टाटा मोटर्सचा इव्ही क्षेत्रातील वाढता विस्तार
२०२४ मध्ये टाटाने नवीन ईव्ही मॉडेल्स सादर करून आपला पोर्टफोलिओ वाढवला आहे. यासोबतच टाटा आणि तिची उपकंपनी ‘जॅग्वार लँड रोव्हर’ने मुख्य बाजारांमध्ये बॅटरी रिसायकलिंगवर भर द्यायला सुरुवात केली आहे.
मलेशियाच्या बाजारात प्रवेश
टाटा मोटर्स लवकरच मलेशियाच्या ऑटोमोबाईल बाजारात प्रवेश करण्याच्या तयारीत असून, तिथल्या प्रमुख ऑटो ग्रुपसोबत मजबूत नेटवर्क तयार करण्यावर काम करत आहे. यासंदर्भातील अधिकृत माहिती २०२६ च्या चौथ्या तिमाहीपूर्वी जाहीर केली जाईल असे सांगितले जात आहे.
.png "Videos"){kind=small}
