फोक्सवॅगन डुकाटीला पोर्टफोलिओमधून बाहेरचा रस्ता दाखवणार? कंपनीच्या भवितव्यावर प्रश्नचिन्ह

नफ्यात असूनही डुकाटीला फोक्सवॅगन ग्रुपच्या पोर्टफोलिओमधून बाहेरचा रस्ता दाखवला जाऊ शकतो, अशी चर्चा सुरू झाली आहे. 2025 मध्ये विक्री घटल्यानंतरही कंपनी नफ्यात होती; मग फोक्सवॅगनला डुकाटी का नको आहे, याकडे आता ऑटोविश्वाचे लक्ष लागले आहे.

• नफ्यात असूनही डुकाटीला फोक्सवॅगन ग्रुपच्या पोर्टफोलिओमधून बाहेर करण्याची शक्यता चर्चेत आली आहे.
• 2025 मध्ये डुकाटीच्या जागतिक मोटरसायकल विक्रीत मागील वर्षाच्या तुलनेत 7% घट झाली.
• फोक्सवॅगन ग्रुपला ऑपरेटिंग रिटर्न 8 ते 10% पर्यंत नेण्याचे महत्त्वाकांक्षी लक्ष्य साध्य करायचे आहे.

जगभरातील बाईकप्रेमींसाठी डुकाटी हे केवळ मोटरसायकल ब्रँड नसून परफॉर्मन्स आणि रेसिंगचे प्रतीक मानले जाते. मात्र, आता या प्रसिद्ध इटालियन ब्रँडच्या भवितव्याबाबत मोठी चर्चा सुरू झाली आहे. ब्लूमबर्गच्या अहवालानुसार, फोक्सवॅगन ग्रुप आपल्या पोर्टफोलिओमधून डुकाटीला वेगळे करण्याचा विचार करत असल्याची माहिती समोर आली आहे. विशेष म्हणजे डुकाटी नफ्यात असूनही हा निर्णय चर्चेत आला आहे.

डुकाटीची विक्री घटली, तरी कंपनी नफ्यात

2022 मध्ये फोक्सवॅगन ग्रुपच्या अंतर्गत डुकाटीने पहिल्यांदाच 60,000 मोटरसायकलींच्या विक्रीचा टप्पा ओलांडला होता. मात्र 2025 मध्ये कंपनीची जागतिक विक्री 50,895 युनिट्सवर आली. मागील वर्षाच्या तुलनेत ही सुमारे 7% घट आहे. असे असले तरी डुकाटीने 5.6% नफा नोंदवला आहे.

नेक्सॉन, ब्रेझाला टक्कर द्यायला येतेय फोक्सवॅगनची नवीन सब- कंपॅक्ट ४ मीटर SUV; कंपनीकडून अधिकृत घोषणा! 2027 मध्ये होणार लाँच!

फोक्सवॅगनला अधिक नफा हवा

फोक्सवॅगन ग्रुप सध्या आपल्या व्यवसायातील नफा वाढवण्यावर मोठा भर देत आहे. 2026 मध्ये ग्रुपचा ऑपरेटिंग प्रॉफिट मार्जिन सुमारे 3.8% राहण्याचा अंदाज आहे, जो मागील वर्षातील 4.2% पेक्षा कमी आहे. भविष्यात ऑपरेटिंग रिटर्न ऑन सेल्स 8 ते 10% पर्यंत नेण्याचे कंपनीचे उद्दिष्ट आहे. त्यामुळे अपेक्षित परतावा न देणाऱ्या व्यवसायांचे पुनर्मूल्यांकन केले जात असल्याचे दिसते.

फोक्सवॅगन ग्रुपचे ऑडीचे सीईओ गेर्नॉट डॉल्नर यांनी यापूर्वी डुकाटीसह सुमारे 600 व्यवसायांचा आढावा घेतला जात असल्याचे सांगितले होते. ग्रुप आपल्या व्यवसायांची संख्या जवळपास एक-तृतीयांशने कमी करण्याचा विचार करत असल्याची चर्चा आहे. त्यामुळे डुकाटी या प्रक्रियेत प्रभावित होण्याची शक्यता व्यक्त केली जात आहे.

Skoda Auto फॉक्सवॅगन इंडियामध्ये मोठे बदल! पियूष अरोरा यांच्याकडे सोपवली ‘ही’ अतिरिक्त मोठी जबाबदारी

डुकाटीची लोकप्रियता मात्र कायम

डुकाटी मॉन्स्टर आणि पॅनिगेल V4 सारख्या दमदार मोटरसायकलींसाठी प्रसिद्ध आहे. मोटोजीपीमध्येही डुकाटीने 2020 पासून सलग 6 चॅम्पियनशिप जिंकत आपले वर्चस्व दाखवले आहे. त्यामुळे हा ब्रँड विकला किंवा वेगळा केला गेल्यास त्याची धुरा कोण सांभाळणार, हा मोठा प्रश्न आहे. सध्या फोक्सवॅगनकडून अंतिम निर्णयाची अधिकृत घोषणा झालेली नाही.