रविवार, 15 नोव्हेंबर 2026
20 वर्षांपूर्वी 'या' भारतीयने केले होते जगातील महागडे लग्न; गिनीज बुकमध्ये आहे रेकॉर्ड!
भारतातील सर्वात श्रीमंत उद्योजक मुकेश अंबानी यांचा मुलगा अनंत अंबानी आणि राधिका मर्चेंट यांच्या शाही विवाहाची सध्या चर्चा रंगली आहे. आज हे लग्न होत आहे. त्यासाठी बॉलिवूड आणि हॉलिवूड सहित अनेक दिग्गज हजेरी लावणार आहेत. या लग्नाविषयीचे अनेक कार्यक्रम गेल्या काही दिवसांपासून सुरु आहेत. सध्या या लग्नाच्या खर्चाची चर्चा सुरु आहे. तर अनेकांना या ग्रँड लग्नाची खबरबात माहिती करुन घ्यायची आहे. पण जगातील सर्वात महागडे लग्न कोणते आहे, हे तुम्हाला माहिती आहे का? एका भारतीयाच्या नावे हे महागडे लग्न आहे. या शाही विवाहाची नोंद गिनीज बुकमध्ये पण करण्यात आली आहे.
‘या’ लग्नाची जगभर चर्चा
जगातील अनेक लग्न हे महागडे असल्याचा दावा करण्यात येतो. प्रिंस चार्ल्स आणि डायना यांच्या शाही विवाहाची चर्चा रंगली होती. या लग्नासाठी 110 दशलक्ष डॉलर खर्च आल्याचा दावा करण्यात येतो. याशिवाय रशियातील सैद गुत्सेरिव्ह आणि खादिजा उझाखोव्स यांच्या लग्नाला पण महागड्या विवाहाचा टॅग लागला होता. इतर पम अनेक लग्न शाही असल्याचा दावा करण्यात आला आहे. पण या लग्नाच्या खर्चाची अधिकृत माहिती समोर आलेली नाही. पण जगातील सर्वात महागडं लग्न कोणते झाले तुम्हाला माहिती आहे का?
गिनीज बुकात झाली नोंद
देशातील एका महागड्या लग्नाची 20 वर्षांपूर्वी अशीच चर्चा झाली होती. त्याची गिनीज बुकमध्ये नोंद झाली आहे. एका भारतीयाने जगातील सर्वात महागडे लग्न केले होते. जगातील सर्वात महागड्या लग्नाचा रेकॉर्ड हा स्टील किंग लक्ष्मी निवास मित्तल यांची मुलगी वनिषा मित्तल हिच्या नावावर आहे. वनिषा मित्तल हिने 2004 मध्ये बँकर अमित भाटिया सोबत लग्न केले होते. हे लग्न भारतात नाही तर फ्रान्समध्ये झाले होते.
किती झाला होता खर्च
गिनीज बुकीनुसार, लक्ष्मी निवास मित्तल यांची मुलीचा विवाह सोहळा हा व्हर्सायमध्ये 6 दिवस चालला होता. या लग्नाचे आणखी एक वैशिष्ट्ये म्हणजे हा सोहळा व्हर्सायच्या राजवाड्यात झाला होता. या राजवाड्यात हा एकमेव खासगी सोहळा झाला होता. या लग्नात परदेशी पाहुण्यांची आणि बॉलिवूडमधील स्टारची रेलचेल होती. या लग्नात 55 दशलक्ष डॉलर खर्च झाले होते. भारतीय चलनात या लग्नासाठी 450 कोटी रुपये खर्च आला होता.
