EPFO Whatsapp Service : PF खातेधारकांसाठी मोठी खुशखबर! आता WhatsApp वर मिळणार पीएफ बॅलन्स; निष्क्रिय खात्यांतील पैसेही मिळणार परत
कर्मचारी भविष्य निर्वाह निधी संघटनेने (EPFO) पीएफ खातेधारकांसाठी दोन महत्त्वाच्या सुविधा सुरू केल्या आहेत. केंद्रीय कामगार आणि रोजगार तसेच युवा कार्यक्रम व क्रीडामंत्री डॉ. मनसुख मांडविया (Dr. Mansukh Mandaviya) यांनी रविवारी ईपीएफओच्या 74 व्या स्थापना दिनानिमित्त या नव्या सेवांची घोषणा केली. यापुढे पीएफ खातेधारकांना व्हॉट्सॲपच्या माध्यमातून (EPFO Whatsapp Service)पीएफ शिल्लक, अलीकडील व्यवहार आणि पासबुकची माहिती मिळवता येणार आहे. तसेच आधार पडताळणी पूर्ण असलेल्या आणि एक हजार रुपयांपर्यंत शिल्लक असलेल्या निष्क्रिय पीएफ खात्यांचा स्वयंचलित निपटारा करण्यात येणार आहे.
नवी दिल्लीतील डॉ. आंबेडकर इंटरनॅशनल सेंटर येथे ईपीएफओचा स्थापना दिन सोहळा पार पडला. यावेळी या दोन्ही सुविधांची माहिती देण्यात आली. नव्या निर्णयामुळे सुमारे 1 लाख खातेधारकांना फायदा होण्याची अपेक्षा असून, त्यांच्या खात्यांमध्ये सुमारे पाच कोटी रुपये जमा होण्याची शक्यता आहे.
ईपीएफओच्या नव्या सुविधेनुसार सदस्यांना अधिकृत आणि पडताळणी केलेल्या व्हॉट्सॲप सेवेच्या माध्यमातून पीएफ खात्याशी संबंधित माहिती मिळवता येईल. यामध्ये पीएफ खात्यातील शिल्लक, अलीकडील व्यवहार आणि पासबुकचे तपशील यांचा समावेश आहे. त्यामुळे पीएफची माहिती मिळवण्यासाठी वारंवार कार्यालयात जाण्याची किंवा विविध प्रक्रिया करण्याची गरज कमी होणार आहे.
ईपीएफओने दुसरी महत्त्वाची सुविधा म्हणून निष्क्रिय खात्यांच्या स्वयंचलित निपटाऱ्याची घोषणा केली आहे. आधार पडताळणी झालेल्या आणि एक हजार रुपयांपर्यंत शिल्लक असलेल्या निष्क्रिय खात्यांमधील रकमेचा स्वयंचलित निपटारा केला जाणार आहे. या निर्णयाचा फायदा जवळपास एक लाख खातेधारकांना होणार असून, सुमारे 5 कोटी रुपये संबंधित खात्यांमध्ये पोहोचण्याची अपेक्षा आहे.
डॉ. मनसुख मांडविया यांनी सांगितले की, गेल्या 74 वर्षांत ईपीएफओने एका सामान्य भविष्य निर्वाह निधी संस्थेपासून देशातील महत्त्वाच्या सामाजिक सुरक्षा संस्थांपर्यंत मजल मारली आहे. आज ईपीएफओशी 8 कोटींहून अधिक सदस्य आणि ८५ लाख पेन्शनधारक जोडले गेले आहेत. संस्था सुमारे 32 लाख कोटी रुपयांच्या निवृत्ती निधीचे व्यवस्थापन करत आहे.
कामगार आणि पेन्शनधारकांचा विश्वास हीच ईपीएफओची सर्वात मोठी ताकद असल्याचे त्यांनी नमूद केले. कामगारांच्या समस्या केवळ प्रशासकीय प्रक्रियेतून नव्हे, तर संवेदनशीलतेने आणि सन्मानाने सोडविणे आवश्यक असल्याचेही त्यांनी सांगितले.
ईपीएफओच्या तांत्रिक सुधारणांमुळे पीएफ दाव्यांच्या निपटाऱ्याचा कालावधी कमी झाला आहे. ऑक्टोबर 2026 मध्ये दाव्यांच्या निपटाऱ्यासाठी लागणारा सरासरी वेळ 2.57 दिवसांवर आला आहे. सीटीज 2.01 या तांत्रिक उपक्रमामुळे सदस्यांना पीएफशी संबंधित सेवा अधिक वेगाने आणि सोप्या पद्धतीने मिळत असल्याचे संस्थेने सांगितले.
दरम्यान, कामगार आणि रोजगार मंत्रालयाचे सचिव डॉ. चंद्र भूषण कुमार यांनी सामाजिक सुरक्षा योजनांचा लाभ असंघटित क्षेत्रातील कामगारांपर्यंतही पोहोचविण्याची गरज व्यक्त केली. डिजिटल युगात संस्थांनी तंत्रज्ञानानुसार स्वतःमध्ये सातत्याने बदल करणे आवश्यक असल्याचे त्यांनी सांगितले.
ईपीएफओच्या 74 व्या स्थापना दिनानिमित्त सामाजिक सुरक्षा, प्रशासकीय सुधारणा, न्यायालयीन निर्णय आणि हिंदी साहित्याशी संबंधित सात महत्त्वपूर्ण प्रकाशनांचेही लोकार्पण करण्यात आले. उत्कृष्ट कामगिरी करणाऱ्या विभागीय कार्यालये, अधिकारी आणि कर्मचाऱ्यांना भविष्य निधी पुरस्कार 2026 देऊन गौरविण्यात आले.
Ans: ईपीएफओने व्हॉट्सॲपवर पीएफ खात्याची माहिती मिळवण्याची सुविधा आणि एक हजार रुपयांपर्यंत शिल्लक असलेल्या पात्र निष्क्रिय खात्यांचा स्वयंचलित निपटारा या दोन सुविधा सुरू केल्या आहेत.
Ans: पीएफ खातेधारकांना खात्यातील शिल्लक, अलीकडील व्यवहार आणि पासबुकशी संबंधित तपशील मिळवता येणार आहेत.
Ans: आधार पडताळणी पूर्ण असलेल्या आणि एक हजार रुपयांपर्यंत शिल्लक असलेल्या निष्क्रिय पीएफ खात्यांचा स्वयंचलित निपटारा केला जाणार आहे.
.png "Videos"){kind=small}
