Goel Ganga Developments : ‘गोयल गंगा डेव्हलपमेंट्स’ची चार दशकांची भरीव कामगिरी; पुण्यातील ‘या’ भागात अनेक प्रकल्प

उद्योजक सुभाष गोयल यांनी सन १९८१ मध्ये ‘गोयल गंगा डेव्हलपमेंट्स’ची स्थापना केली. पुण्यात दर्जेदार आणि वेळेत घरे बांधण्यामुळे कंपनीने लवकरच विश्वासार्ह ओळख निर्माण केली.

पुणे : साधारणत: १९८१मध्ये पुणे हे मुख्यतः शिक्षणासाठी ओळखले जाणारे शहर होते. त्याच काळात एका छोट्या रिअल इस्टेट कंपनीने रास्ता पेठेत आपले पहिले बांधकाम पूर्ण केले. या साध्या सुरुवातीतून पुढे पुण्यातील अग्रगण्य रिअल इस्टेट ब्रँड उभा राहील, याची कल्पनाही कुणी केली नसती. जवळपास चार दशकांनंतर ‘गोयल गंगा डेव्हलपमेंट्स’ ही केवळ इमारती उभारणारी कंपनी राहिलेली नाही, तर भारतातील सर्वाधिक वेगाने विकसित होणाऱ्या महानगरांपैकी एक असलेल्या पुण्याच्या बदलत्या स्कायलाइनची महत्त्वाची शिल्पकार ठरली आहे.

वारशाची भक्कम पायाभरणी

उद्योजक सुभाष गोयल यांनी सन १९८१ मध्ये ‘गोयल गंगा डेव्हलपमेंट्स’ची स्थापना केली. रास्ता पेठ आणि इतर ऐतिहासिक पेठांमध्ये ‘त्रिमूर्ती’ आणि ‘गंगोत्री अपार्टमेंट्स’सारख्या निवासी प्रकल्पांद्वारे कंपनीने आपल्या प्रवासाला सुरुवात केली. जुन्या पुण्यात दर्जेदार आणि वेळेत घरे बांधण्यामुळे कंपनीने लवकरच विश्वासार्ह ओळख निर्माण केली. सन १९९७मध्ये ‘आयएसओ ९००१’ हे प्रमाणपत्र मिळवणारी पुण्यातील पहिली रिअल इस्टेट कंपनी होण्याचा मानही तिने मिळवला.

आज दुसऱ्या पिढीतील उद्योजक गुंजन गोयल आणि अनुराग गोयल यांच्या नेतृत्वाखाली कंपनीने १०५ हून अधिक निवासी आणि व्यावसायिक प्रकल्प पूर्ण केले आहेत. ३.५ कोटी चौरस फुटांहून अधिक बांधकाम पूर्ण झाले असून, आणखी सुमारे तीन कोटी चौरस फूट विकासकामे नियोजनाधीन आहेत. आज ४०,००० हून अधिक कुटुंबे ‘गोयल गंगा’च्या घरांमध्ये वास्तव्यास आहेत.

पुण्याला आकार देणारे प्रकल्प

रास्ता पेठ आणि नाना पेठेतील सुरुवातीच्या प्रकल्पांपासून आज शहरभर उभ्या असलेल्या भव्य इमारतींपर्यंत ‘गोयल गंगा’चा प्रवास म्हणजे पुण्याच्या विकासाचीच कहाणी आहे. नव्वदच्या दशकात ‘गंगा पुरम’ आणि ‘गंगा कॅस्केड’ या प्रकल्पांद्वारे कंपनीने विमाननगर आणि कोरेगाव पार्कमध्ये प्रवेश केला. या प्रकल्पांनी या भागांना उच्च दर्जाच्या निवासी परिसर म्हणून ओळख मिळवून देण्यात महत्त्वाची भूमिका बजावली. यानंतर कंपनीने औंध, बाणेर आणि कोंढवा यांसारख्या विकसित होत असलेल्या परिसरात विस्तार केला. खराडीतील ‘गंगा प्लॅटिनो’ हा सहा एकरांवरील सात टॉवरचा आलिशान निवासी प्रकल्प विशेष लक्षवेधी ठरला. बावधनमधील ‘गंगा युटोपिया’ हा सहा एकरांवरील चार २५ मजली टॉवरचा प्रकल्प असून, त्यामध्ये खासगी रेन फॉरेस्ट आणि अॅक्युप्रेशर वॉकिंग ट्रेल्ससारख्या वैशिष्ट्यपूर्ण सुविधा उपलब्ध आहेत.

व्यावसायिक क्षेत्रात पुणे विमानतळ रस्त्यावरील ‘गंगा ट्रुएनो’ हा आधुनिक बिझनेस पार्क आयटी कंपन्या, बहुराष्ट्रीय उद्योग आणि मोठ्या रिटेल ब्रँड्सच्या गरजा लक्षात घेऊन विकसित करण्यात आला आहे. दोन टॉवर आणि स्तंभविरहित कार्यालयीन जागा ही त्याची प्रमुख वैशिष्ट्ये आहेत. ‘गंगा इम्पेरिया’सारख्या ३० मजली, तीन टॉवरसच्या उंच प्रकल्पांनी पुण्याच्या स्कायलाइनमध्ये लक्षणीय बदल घडवून आणला आहे.

इमारतींपलीकडील विकासाची दृष्टी

‘गोयल गंगा डेव्हलपमेंट्स’ची ओळख केवळ इमारती उभारणारी कंपनी म्हणून नाही. कंपनीचे अध्यक्ष सुभाष गोयल म्हणतात, ‘गेल्या चार दशकांत पुणेकरांसोबत मिळून हे शहर घडवण्याचा सन्मान आम्हाला लाभला आहे. रिअल इस्टेटबरोबरच कंपनीने शिक्षण, लॉजिस्टिक्स, वेअरहाऊसिंग आणि पुनर्विकास या क्षेत्रांतही पाऊल टाकले आहे. शाश्वत विकास हा कंपनीच्या कार्यपद्धतीचा महत्त्वाचा भाग बनला आहे. पावसाचे पाणी साठवणूक व्यवस्था, सौरऊर्जा प्रकल्प, इलेक्ट्रिक वाहनांसाठी चार्जिंग सुविधा आणि हरित इमारत तंत्रज्ञानाचा वापर कंपनीच्या नव्या प्रकल्पांमध्ये सातत्याने केला जात आहे.’

हे सुद्धा वाचा : लोणावळ्यात बार्टीची पार्टी की कार्यशाळा? तब्बल 39 लाखांच्या खर्चाबाबत प्रश्नचिन्ह

पुढील वाटचालीविषयी

पुण्यात आयटी कॉरिडॉर, मेट्रो रेल्वे आणि रिंग रोड यांसारख्या पायाभूत सुविधांचा वेगाने विस्तार होत असताना ‘गोयल गंगा डेव्हलपमेंट्स’ही पायाभूत सुविधांवर आधारित विकासाला प्राधान्य देत आहे. वानवडीतील ‘गंगा संपत्ती’च्या पुढील टप्प्यांपासून वाकड आणि धानोरी येथील नव्या प्रकल्पांपर्यंत नियोजनबद्ध विकासाचा कंपनीचा प्रवास कायम आहे. रास्ता पेठेत घातलेल्या त्या पहिल्या पायापासून आज चार दशकांनंतर ‘गोयल गंगा डेव्हलपमेंट्स’ने केवळ पुण्यातच ठसा उमटवलेला नाही, तर शहराच्या विकासकथेचा अविभाज्य भाग बनत पुण्याच्या बदलत्या रूपाला आकार दिला आहे.