भारतीय रेल्वेचा हायटेक निर्णय! आता TTE च्या गणवेशावर दिसणार ‘बॉडी कॅमेरा’; तिकीट तपासणीत येणार पारदर्शकता

Indian Railway Body Camera: भारतीय रेल्वे आता तिकीट तपासणीसाठी TTE ला 'बॉडी कॅमेरे' देणार आहे. मुंबईसह काही विभागांत याची सुरुवात झाली असून, यामुळे प्रवासी आणि रेल्वे कर्मचारी यांच्यातील वाद मिटण्यास मदत होईल.

• भारतीय रेल्वेचा हायटेक निर्णय!
• आता TTE च्या गणवेशावर दिसणार ‘बॉडी कॅमेरा’
• तिकीट तपासणीत येणार पारदर्शकता

Indian Railway Body Camera: भारतीय रेल्वे (Indian Railway) आपल्या कार्यप्रणालीमध्ये सातत्याने आधुनिक तंत्रज्ञानाचा वापर करत असून, आता तिकीट तपासणी यंत्रणा पूर्णपणे ‘हायटेक’ करण्याची तयारी सुरू झाली आहे. लवकरच रेल्वेगाड्यांमध्ये तिकीट तपासणारे TTE (Travelling Ticket Examiner) आपल्या कर्तव्यावर असताना ‘बॉडी कॅमेरा’ परिधान केलेले दिसणार आहेत. या नव्या प्रणालीमुळे प्रवासी आणि रेल्वे कर्मचारी यांच्यातील वादांना आळा बसेल आणि सुरक्षा व्यवस्था अधिक मजबूत होईल, असा विश्वास रेल्वे प्रशासनाने व्यक्त केला आहे.

चुकीच्या तक्रारींना आळा बसणार

विवाद आणि गैरप्रकारांना लागणार लगाम रेल्वेच्या या नवीन उपक्रमांतर्गत, तिकीट तपासणी दरम्यान होणारी प्रत्येक हालचाल कॅमेऱ्यात कैद होईल. अनेकदा रेल्वेमध्ये तिकीट तपासताना प्रवासी आणि TTE यांच्यात बाचाबाची किंवा गैरवर्तनाचे प्रकार घडतात. आता अशा घटनांचे संपूर्ण व्हिडिओ चित्रीकरण पुराव्या म्हणून उपलब्ध राहणार आहे. यामुळे चुकीच्या तक्रारींना आळा बसेल आणि तिकीट तपासणी प्रक्रियेत पारदर्शकता येईल.

कसा असेल हा ‘बॉडी कॅमेरा’ आणि त्याची वैशिष्ट्ये?

• HD रेकॉर्डिंग: उच्च दर्जाचे व्हिडिओ आणि ऑडिओ रेकॉर्डिंगची सुविधा.
• नाईट व्हिजन: रात्रीच्या वेळी किंवा अंधारातही स्पष्ट चित्रीकरण करण्याची क्षमता.
• बॅटरी बॅकअप: या कॅमेऱ्यांना सुमारे २० तासांचा बॅटरी बॅकअप मिळेल, ज्यामुळे लांब पल्ल्याच्या गाड्यांमध्येही रेकॉर्डिंग सुरू राहील.
• टॅम्पर-प्रूफ सिस्टम: रेकॉर्डिंगमध्ये कोणताही फेरफार किंवा छेडछाड करता येणार नाही, अशा पद्धतीने हे कॅमेरे डिझाइन केले आहेत.

New Railway Projects:  २०३० पर्यंत रेल्वेचे जाळे ९०१ किमीने विस्तारणार; २३,४३७ कोटींच्या ३ रेल्वे प्रकल्पांना केंद्राची मंजुरी

मुंबईसह ‘या’ शहरांत पायलट प्रोजेक्टला सुरुवात

रेल्वेने सध्या ही व्यवस्था प्रायोगिक तत्त्वावर (काही ठराविक विभागांमध्ये सुरू केली आहे. यामध्ये मुंबई, वॉल्टेयर आणि रायपूर या विभागांचा समावेश आहे. या विभागांमधील TTE ला कॅमेरा वापरण्याचे विशेष प्रशिक्षणही देण्यात आले आहे. येथील निकाल सकारात्मक लागल्यास ही यंत्रणा देशभरातील सर्व रेल्वे गाड्यांमध्ये लागू करण्याचा प्रशासनाचा विचार आहे.

प्रवासी आणि रेल्वे कर्मचाऱ्यांना दुहेरी फायदा

रेल्वे अधिकाऱ्यांच्या मते, तिकीट तपासणी दरम्यान अनेकदा बनावट तक्रारी केल्या जातात. आता कॅमेरा रेकॉर्डिंग अशा प्रकरणांमध्ये ठोस पुरावा म्हणून काम करेल. यामुळे प्रामाणिक कर्मचाऱ्यांचे संरक्षण होईल आणि प्रवाशांच्या तक्रारींचीही योग्य चौकशी करता येईल. रेल्वेतील शिस्त आणि सुरक्षितता वाढवण्यासाठी हे एक मोठे पाऊल मानले जात आहे.

तंत्रज्ञानाकडे रेल्वेची वेगवान झेप

गेल्या काही वर्षांत भारतीय रेल्वेने ऑनलाईन टिकटिंग, AI आधारित देखरेख आणि स्मार्ट स्टेशन्स यांसारख्या अनेक तंत्रज्ञानाचा अवलंब केला आहे. आता ‘बॉडी कॅमेरा’ प्रणालीचा वापर करून रेल्वेने आपली सेवा अधिक विश्वासार्ह आणि आधुनिक बनवण्याच्या दिशेने प्रगती केली आहे.

रेल्वेला उशीर झाल्याने विमान चुकले; प्रवाशाची थेट कोर्टातच धाव, 1.3 लाखाच्या नुकसानभरपाईचे आदेश