मंगळवार, 10 नोव्हेंबर 2026
राम नवमीचा मुहूर्तावर 'या' आंतरराष्ट्रीय विमानतळा'चे होणार उद्घाटन (Photo Credit- X)
विमानतळाच्या उद्घाटनाच्या पार्श्वभूमीवर, नोएडा इंटरनॅशनल एअरपोर्टच्या वरिष्ठ अधिकाऱ्यांनी मंगळवारी उत्तर प्रदेशचे मुख्यमंत्री योगी आदित्यनाथ यांची भेट घेतली. या बैठकीचे नेतृत्व विमानतळाचे मुख्य कार्यकारी अधिकारी (CEO) क्रिस्टोफ श्नेलमान यांनी केले. या भेटीदरम्यान प्रकल्पाच्या सद्यस्थितीचा आढावा घेण्यात आला आणि उद्घाटनाच्या नियोजनावर चर्चा झाली.
बैठकीत अधिकाऱ्यांनी मुख्यमंत्री योगी आदित्यनाथ यांना केंद्र सरकारकडून जारी करण्यात आलेले ‘एयरोड्रोम लायसन्स’ सुपूर्द केले. विमानतळ कार्यान्वित करण्यापूर्वी हे सर्वात महत्त्वाचे तांत्रिक आणि नियामक प्रमाणपत्र मानले जाते. या परवान्यामुळे आता व्यावसायिक उड्डाणांसाठीचा मोठा अडथळा दूर झाला आहे.
विमानतळ प्रशासनाच्या माहितीनुसार, सर्व प्रमुख प्रक्रिया पूर्ण झाल्या असून आता केवळ अंतिम सुरक्षा मंजुरी मिळणे बाकी आहे. विमानतळाचा ‘एयरोड्रोम सिक्युरिटी प्रोग्राम’ सध्या नागरी विमान वाहतूक सुरक्षा ब्युरो (BCAS) कडे मंजुरीसाठी पाठवण्यात आला आहे. ही मंजुरी मिळताच विमानतळावरून व्यावसायिक उड्डाणांचे वेळापत्रक अधिकृतपणे जाहीर केले जाईल.
नोएडा आंतरराष्ट्रीय विमानतळ सुरू झाल्यानंतर ते उत्तर भारतातील सर्वात मोठ्या विमानतळांपैकी एक ठरेल. यामुळे दिल्लीतील इंदिरा गांधी आंतरराष्ट्रीय विमानतळावरील वाढता ताण कमी होण्यास मोठी मदत होणार आहे. या विमानतळामुळे पश्चिम उत्तर प्रदेश आणि दिल्ली-NCR मधील आर्थिक विकासाला तसेच पर्यटनाला मोठी गती मिळण्याचा अंदाज वर्तवण्यात येत आहे. २६ मार्चला राम नवमी आणि नवरात्रीचा उत्सव असल्याने, याच शुभ मुहूर्तावर हा ऐतिहासिक प्रकल्प देशाला समर्पित करण्याची तयारी केंद्र आणि राज्य सरकारकडून युद्धपातळीवर सुरू आहे.
