राम नवमीचा मुहूर्तावर ‘या’ आंतरराष्ट्रीय विमानतळा’चे होणार उद्घाटन; पंतप्रधान मोदी करणार लोकार्पण

विमानतळाच्या उद्घाटनाच्या पार्श्वभूमीवर, नोएडा इंटरनॅशनल एअरपोर्टच्या वरिष्ठ अधिकाऱ्यांनी मंगळवारी उत्तर प्रदेशचे मुख्यमंत्री योगी आदित्यनाथ यांची भेट घेतली.

• राम नवमीचा मुहूर्तावर ‘या’ आंतरराष्ट्रीय विमानतळा’चे होणार उद्घाटन
• पंतप्रधान मोदी करणार लोकार्पण
• केवळ ‘सिक्युरिटी क्लियरेंस’ची प्रतीक्षा

Noida International Airport: नोएडा आणि दिल्ली-NCR मधील नागरिकांसाठी एक अत्यंत आनंदाची बातमी समोर आली आहे. जेवर (गौतमबुद्ध नगर) येथे उभारण्यात आलेल्या नोएडा आंतरराष्ट्रीय विमानतळाच्या (Noida International Airport) उद्घाटनाची तारीख अखेर निश्चित झाली आहे. मिळालेल्या माहितीनुसार, येत्या २६ मार्च रोजी राम नवमीच्या शुभ मुहूर्तावर पंतप्रधान नरेंद्र मोदी (PM Narendra Modi) या भव्य विमानतळाचे लोकार्पण करण्याची शक्यता आहे.

मुख्यमंत्री योगी आदित्यनाथ यांच्यासोबत उच्चस्तरीय बैठक

विमानतळाच्या उद्घाटनाच्या पार्श्वभूमीवर, नोएडा इंटरनॅशनल एअरपोर्टच्या वरिष्ठ अधिकाऱ्यांनी मंगळवारी उत्तर प्रदेशचे मुख्यमंत्री योगी आदित्यनाथ यांची भेट घेतली. या बैठकीचे नेतृत्व विमानतळाचे मुख्य कार्यकारी अधिकारी (CEO) क्रिस्टोफ श्नेलमान यांनी केले. या भेटीदरम्यान प्रकल्पाच्या सद्यस्थितीचा आढावा घेण्यात आला आणि उद्घाटनाच्या नियोजनावर चर्चा झाली.

‘एयरोड्रोम लायसन्स’ प्राप्त; महत्त्वाची प्रक्रिया पूर्ण

बैठकीत अधिकाऱ्यांनी मुख्यमंत्री योगी आदित्यनाथ यांना केंद्र सरकारकडून जारी करण्यात आलेले ‘एयरोड्रोम लायसन्स’ सुपूर्द केले. विमानतळ कार्यान्वित करण्यापूर्वी हे सर्वात महत्त्वाचे तांत्रिक आणि नियामक प्रमाणपत्र मानले जाते. या परवान्यामुळे आता व्यावसायिक उड्डाणांसाठीचा मोठा अडथळा दूर झाला आहे.

चिकलठाणा विमानतळ विस्तारीकरणाचा मार्ग मोकळा! ७५० शेतकऱ्यांना नोटिसा; धावपट्टी १२ हजार फुटांपर्यंत वाढणार

केवळ ‘सिक्युरिटी क्लियरेंस’ची प्रतीक्षा

विमानतळ प्रशासनाच्या माहितीनुसार, सर्व प्रमुख प्रक्रिया पूर्ण झाल्या असून आता केवळ अंतिम सुरक्षा मंजुरी मिळणे बाकी आहे. विमानतळाचा ‘एयरोड्रोम सिक्युरिटी प्रोग्राम’ सध्या नागरी विमान वाहतूक सुरक्षा ब्युरो (BCAS) कडे मंजुरीसाठी पाठवण्यात आला आहे. ही मंजुरी मिळताच विमानतळावरून व्यावसायिक उड्डाणांचे वेळापत्रक अधिकृतपणे जाहीर केले जाईल.

उत्तर भारतातील सर्वात मोठे ‘एअर ट्रॅफिक हब’

नोएडा आंतरराष्ट्रीय विमानतळ सुरू झाल्यानंतर ते उत्तर भारतातील सर्वात मोठ्या विमानतळांपैकी एक ठरेल. यामुळे दिल्लीतील इंदिरा गांधी आंतरराष्ट्रीय विमानतळावरील वाढता ताण कमी होण्यास मोठी मदत होणार आहे. या विमानतळामुळे पश्चिम उत्तर प्रदेश आणि दिल्ली-NCR मधील आर्थिक विकासाला तसेच पर्यटनाला मोठी गती मिळण्याचा अंदाज वर्तवण्यात येत आहे. २६ मार्चला राम नवमी आणि नवरात्रीचा उत्सव असल्याने, याच शुभ मुहूर्तावर हा ऐतिहासिक प्रकल्प देशाला समर्पित करण्याची तयारी केंद्र आणि राज्य सरकारकडून युद्धपातळीवर सुरू आहे.

Noida International Airport: नोएडा आंतरराष्ट्रीय विमानतळाला मिळाला एअरोड्रम परवाना; लवकरच सुरू होणार उड्डाणे