ऑफिस, रिटेल, F&B अन् अर्बन लॉजिस्टिक्स एकाच छताखाली; ठाण्यात उभारतेय भारतातील पहिले एकात्मिक शहरी व्यावसायिक केंद्र (फोटो सौजन्य-ChatGPT)
सध्या WTC ठाणेमधील सुमारे 30 टक्के जागा भाडेतत्त्वावर देण्यात आल्या आहेत. प्रकल्पातील कामकाज 2026 च्या अखेरपर्यंत सुरू होण्याची अपेक्षा व्यक्त करण्यात आली आहे.
ठाण्यातील वागळे इस्टेट येथे विकसित होत असलेले WTC ठाणे हे भारतातील अशा प्रकारचे पहिले एकात्मिक शहरी व्यावसायिक केंद्र म्हणून विकसित केले जात असल्याचा वेल्स्पन वनचा दावा आहे. एकाच विकास प्रकल्पात ग्रेड A कार्यालये, अनुभव केंद्रे, फूड अँड बेव्हरेज (F&B) सुविधा आणि अर्बन डिस्ट्रिब्युशन सेंटर्स (UDCs) यांचा समावेश करण्यात आला आहे. त्यामुळे पारंपरिक कार्यालयीन जागांच्या पलीकडे व्यवसाय, रिटेल, ग्राहक अनुभव आणि शहरी लॉजिस्टिक्सचे एकत्रित केंद्र म्हणून हा प्रकल्प उभा राहणार आहे.
मोठ्या कंपन्यांना कार्यालयीन जागा उपलब्ध करून देण्यासोबतच 50 हून अधिक ब्रँड्सची रिटेल अनुभव केंद्रे आणि F&B आस्थापने सामावून घेण्याच्या दृष्टीने या प्रकल्पाची रचना करण्यात आली आहे. विशेषतः मोठ्या आकाराच्या अनुभव केंद्रांसाठी आवश्यक असलेल्या नियमांनुसार अनुरूप जागा उपलब्ध करून देण्यावर भर देण्यात आला आहे. ‘डेस्टिनेशन-थीम’वर आधारित रिटेल संकल्पना हे या प्रकल्पाचे एक महत्त्वाचे वैशिष्ट्य असणार आहे.
वर्ल्ड ट्रेड सेंटर ब्रँडचा परवानाधारक म्हणून WTC ठाणेमधील वापरकर्त्यांना WTC सदस्यत्वाशी संबंधित लाभ मिळणार आहेत. त्याद्वारे जवळपास 100 देशांमध्ये असलेल्या 300 हून अधिक वर्ल्ड ट्रेड सेंटर प्रॉपर्टीजच्या व्यापक जागतिक व्यावसायिक नेटवर्कशी संपर्क आणि नेटवर्किंगच्या संधी उपलब्ध होणार असल्याचे सांगण्यात आले आहे. त्यामुळे WTC ठाणे केवळ स्थानिक व्यावसायिक केंद्र न राहता उद्योग आणि कंपन्यांना जागतिक व्यावसायिक नेटवर्कशी जोडणारा दुवा म्हणूनही काम करेल, अशी अपेक्षा आहे.
WTC ठाणे प्रकल्पाची रचना प्रसिद्ध आर्किटेक्ट हफीज कॉन्ट्रॅक्टर यांनी केली आहे. लोक आणि वस्तूंची कार्यक्षम वाहतूक सुनिश्चित करण्याच्या दृष्टीने मोठ्या आकाराच्या जागा आणि आवश्यक पायाभूत सुविधांचा प्रकल्पात समावेश करण्यात आला आहे. ऑटोमेशन आणि हरित इमारत संकल्पनेवरही विशेष भर देण्यात आला आहे. आधुनिक व्यावसायिक कार्यालयांच्या गरजांसोबतच रिटेल आणि लॉजिस्टिक्ससाठी आवश्यक सुविधा एकाच ठिकाणी निर्माण करण्याचा प्रयत्न प्रकल्पातून करण्यात आला आहे.
वेल्स्पन वनचे मुख्य ग्राहक अधिकारी नीरज बलानी यांच्या मते, WTC ठाणे हे एकाच एकात्मिक विकास प्रकल्पात कार्यस्थळ, अनुभवाधारित रिटेल आणि शहरी लॉजिस्टिक्स यांचा मेळ घालणारे शहरी व्यावसायिक केंद्र म्हणून विकसित होत आहे. ठाण्यासारख्या वेगाने विकसित होणाऱ्या शहरी बाजारपेठेत व्यवसाय, ब्रँड्स आणि ग्राहकांच्या बदलत्या गरजा पूर्ण करणाऱ्या व्यावसायिक जागांची निर्मिती कशी करता येईल, यासाठी हा प्रकल्प नवा मापदंड प्रस्थापित करण्याच्या दिशेने सज्ज असल्याचे बलानी यांनी म्हटले आहे.
APMC Market Building : वापर शून्य, तरीही 5.94 कोटींचा दणका! एपीएमसी बाजार समिती पुढे मोठा आर्थिक पेच
आदित्य बिर्ला समूहाने अलीकडेच WTC ठाणेमध्ये आपल्या व्हॉल्ट ऑपरेशन्ससाठी जागा भाडेतत्त्वावर घेतली आहे. त्याचबरोबर वेल्स्पन समूहानेही या विकास प्रकल्पात सहभागी होण्यासाठी करार केला आहे. सध्या विविध जागांच्या भाडेकरारासंदर्भातील कागदोपत्री प्रक्रिया सुरू असून आगामी काळात आणखी भाडेकरूंची नावे जाहीर होण्याची अपेक्षा आहे.
‘WTC ठाणे x वेल्स्पन लिव्हिंग मीडिया ईव्हनिंग’ या कार्यक्रमात या विकास प्रकल्पाचे अनावरण करण्यात आले. यावेळी वेल्स्पन लिव्हिंगतर्फे विशेष सादरीकरण करण्यात आले. डिझाइन, लाइफस्टाइल आणि व्यावसायिक रिअल इस्टेट या तीन क्षेत्रांचा संगम या कार्यक्रमातून अधोरेखित करण्यात आला.
वागळे इस्टेट परिसर आधीच ठाण्यातील महत्त्वाचे व्यावसायिक केंद्र म्हणून ओळखला जातो. आता ₹1,000 कोटींहून अधिक एकत्रित गुंतवणूक अपेक्षित असलेल्या WTC ठाणे प्रकल्पामुळे या परिसरातील आधुनिक कार्यालये, रिटेल आणि शहरी लॉजिस्टिक्सच्या पायाभूत सुविधांमध्ये आणखी भर पडण्याची अपेक्षा आहे.
.png "Videos"){kind=small}
