फोटो सौजन्य - Social Media
भारत : Cummins India Limitedने आपल्या ‘नर्चरिंग ब्रिलियन्स’ या प्रमुख उपक्रमाची दोन दशके पूर्ण केल्याचा टप्पा गाठत 520 गुणवंत विद्यार्थ्यांना शिष्यवृत्ती प्रदान केली आहे. Cummins India Foundationच्या माध्यमातून राबवण्यात येणाऱ्या या उपक्रमाला यंदा 9,600 हून अधिक अर्ज प्राप्त झाले होते, ज्यातून कठोर निवड प्रक्रियेनंतर 520 विद्यार्थ्यांची निवड करण्यात आली. विशेष म्हणजे, या निवडीत 20 दिव्यांग विद्यार्थ्यांचाही समावेश असून उपक्रमाच्या समावेशकतेची झलक यातून दिसून येते.
गेल्या 20 वर्षांत ‘नर्चरिंग ब्रिलियन्स’ने अल्प उत्पन्न गटातील 3,100 हून अधिक विद्यार्थ्यांना सक्षम केले आहे. यामध्ये 52 टक्के विद्यार्थिनींचा सहभाग असून महिलांच्या सक्षमीकरणालाही या उपक्रमाने चालना दिली आहे. आर्थिक मदतीपुरता मर्यादित न राहता हा उपक्रम विद्यार्थ्यांना सर्वांगीण पाठबळ देतो. अभियांत्रिकी शिक्षणासाठी आवश्यक असलेले शुल्क, अभ्यास साहित्य आणि इतर खर्च भागवण्याबरोबरच विद्यार्थ्यांना करिअर घडवण्यासाठी आवश्यक कौशल्ये विकसित करण्यावर भर दिला जातो.
पुण्यातील कमिन्स इंडिया कॅम्पसमध्ये आयोजित विशेष कार्यक्रमात 2025-26 शैक्षणिक वर्षासाठी निवड झालेल्या विद्यार्थ्यांचा सत्कार करण्यात आला. या वेळी श्वेता आर्या आणि आशिष अग्रवाल यांच्या हस्ते विद्यार्थ्यांना सन्मानित करण्यात आले. या प्रसंगी श्वेता आर्या यांनी शिक्षण हे राष्ट्रनिर्मितीचे प्रभावी साधन असल्याचे सांगत, विद्यार्थ्यांच्या महत्त्वाकांक्षांना योग्य संधी मिळाल्यास ते देशाचे भविष्यातील नवप्रवर्तक आणि नेते बनू शकतात, असा विश्वास व्यक्त केला.
‘नर्चरिंग ब्रिलियन्स’ उपक्रम विद्यार्थ्यांच्या सर्वांगीण विकासासाठी डिझाइन करण्यात आला आहे. यामध्ये उद्योग क्षेत्रातील तज्ज्ञांचे मार्गदर्शन, सॉफ्ट स्किल्स प्रशिक्षण, रोजगारक्षमतेसाठी विशेष कार्यक्रम आणि करिअर मार्गदर्शनाचा समावेश आहे. तसेच विद्यार्थी आणि मार्गदर्शक यांचे मजबूत नेटवर्क तयार करून दीर्घकालीन व्यावसायिक प्रगतीसाठी आवश्यक वातावरण निर्माण केले जाते.
2006 मध्ये केवळ 13 विद्यार्थ्यांसह पुण्यात सुरू झालेला हा उपक्रम आज देशभर विस्तारला आहे. पुणे, फलटण, अहिल्यानगर, इंदौर, जमशेदपूर, धाराशिव, विदिशा, गुना आणि रांची यांसारख्या औद्योगिक केंद्रांमध्ये हा उपक्रम कार्यरत असून तरुण अभियंत्यांना त्यांच्या स्वप्नांना प्रत्यक्षात उतरवण्यासाठी संधी उपलब्ध करून देत आहे.
