IIT Kanpur MBBS Admission: आयआयटी कानपूर रचणार इतिहास! आता इंजिनिअरिंगच नव्हे तर MBBS चेही शिक्षण देणार

IIT Kanpur MBBS Admission: आयआयटी कानपूरमध्ये इंजिनिअरिंगसोबतच एमबीबीएस (MBBS) आणि पीएचडी प्रोग्राम सुरू होणार असून, असे करणारे ते देशातील पहिले आयआयटी ठरणार आहे. कॅम्पसमध्ये ४५० खाटांचे सुपर स्पेशालिटी रुग्णालय एप्रिल २०२७ पासून तर एमबीबीएस प्रवेश २०२९ पासून सुरू होतील.

• आयआयटी कानपूरमध्ये एमबीबीएस (MBBS) अभ्यासक्रम सुरू होणार 
• कॅम्पसमधील सुपर स्पेशालिटी रुग्णालय कधी सुरू होईल?
• नॉन-क्लिनिकल आणि मेडिकल इंजिनिअरिंगचे कोर्सेस लवकरच सुरू 

IIT Kanpur MBBS Admission: आयआयटी कानपूर (IIT Kanpur) देशाच्या शैक्षणिक इतिहासात एक नवीन पर्व सुरू करणार आहे. देशातील प्रमुख तांत्रिक संस्थांपैकी एक असलेल्या आयआयटी कानपूरमध्ये आता इंजिनिअरिंगसोबतच वैद्यकीय शिक्षण म्हणजेच एमबीबीएस (MBBS) आणि पीएचडी (PhD) प्रोग्रामची सुविधा देखील उपलब्ध होणार आहे. संस्थेच्या ६७ व्या स्थापना दिवसानिमित्त आयोजित पत्रकार परिषदेत संचालक प्रा. मणींद्र अग्रवाल यांनी आगामी योजना आणि उपलब्धींची माहिती दिली. त्यांनी सांगितले की, आयआयटी कानपूर कॅम्पसमध्ये ४५० खाटांचे सुपर स्पेशालिटी रुग्णालय एप्रिल २०२७ पासून सुरू होईल. त्यानंतर २०२९ च्या सत्रापासून संस्थेत एमबीबीएस आणि पीएचडी अभ्यासक्रमांसाठी प्रवेश प्रक्रिया सुरू करण्याची तयारी आहे.

एप्रिल २०२७ पासून रुग्णालय सुरू होणार

आयआयटी कानपूरच्या परिसरात ‘गंगवाल स्कूल ऑफ मेडिकल सायन्सेस अँड टेक्नॉलॉजी’ अंतर्गत उभारले जात असलेले सुपर स्पेशालिटी रुग्णालय जवळपास तयार झाले आहे. संचालकांच्या मते, यावर्षी मुसळधार पाऊस आणि बांधकाम कंपन्यांमधील वादानंतर कामाला थोडा उशीर झाला, मात्र आता एप्रिल २०२७ मध्ये त्याचे उद्घाटन होऊन रुग्णांसाठी सेवा सुरू केली जाईल. हे रुग्णालय सुरू झाल्यामुळे कानपूरसह जवळपास १० जिल्ह्यांतील रुग्णांना गंभीर आजारांच्या उपचारासाठी दिल्ली आणि मुंबईसारख्या मोठ्या शहरांमध्ये जावे लागणार नाही.

२०२९ पासून सुरू होणार कोर्सेस

आयआयटी कानपूरमध्ये क्लिनिकल कोर्सेस २०२९ पासून सुरू होणार आहेत, परंतु विशेष म्हणजे २०२७ च्या सत्रापासूनच आयआयटी कानपूरमध्ये वैद्यकीय क्षेत्राशी संबंधित नॉन-क्लिनिकल विषय आणि मेडिकल इंजिनिअरिंगचे एम.टेक व पीएचडी प्रोग्राम सुरू केले जातील.

RITES Recruitment 2026: रेल्वे मंत्रालयांतर्गत सरकारी नोकरीची सुवर्णसंधी! ‘राईट्स’मध्ये ‘या’ पदांसाठी भरती जाहीर

युपी सरकारच्या डेटा सेंटरला आयआयटी देणार सायबर सुरक्षा

उत्तर प्रदेश सरकार राज्यातील विविध विभागांमधील डेटा सुरक्षित ठेवण्यासाठी लखनऊमध्ये एक आधुनिक डेटा सेंटर स्थापन करत आहे. या सरकारी डेटा सेंटरच्या सायबर सुरक्षेची जबाबदारी आयआयटी कानपूरकडे सोपवण्यात आली आहे. प्रा. मणींद्र अग्रवाल यांनी सांगितले की, संस्थेने एक प्रगत सायबर सुरक्षा ऑपरेशन सिस्टीम विकसित केली आहे, जी कोणत्याही प्रकारच्या सायबर हल्ल्यांना तोंड देण्यास सक्षम आहे. स्वदेशी तंत्रज्ञानाच्या माध्यमातून लखनऊ डेटा सेंटरला सुरक्षा प्रदान केली जाईल.

QS World University Rankings 2027: भारतातील विद्यापीठांचा आशियात डंका; जाणून घ्या देशातील टॉप १० संस्थांची यादी

नोएडा आणि लखनऊमध्ये ‘यू हब’ स्थापन होणार

उत्तर प्रदेशमध्ये ‘डीपटेक’ क्षेत्रातील स्टार्टअप्सना चालना देण्यासाठी सरकार ‘यू हब’ स्थापन करणार आहे. या अंतर्गत राज्यात दोन केंद्र तयार करण्यात आली आहेत. पहिले केंद्र आयआयटी कानपूरच्या नोएडा कॅम्पसमध्ये असेल, तर दुसरे केंद्र IIIT लखनऊमध्ये असेल. या दोन्ही केंद्रांचे उद्घाटन याच महिन्याच्या अखेरीस होण्याची शक्यता आहे. डीपटेक क्षेत्रात काम करणाऱ्या नवीन स्टार्टअप्सना आवश्यक सुविधा उपलब्ध करून देणे हा यामागील मुख्य उद्देश आहे.