(फोटो सौजन्य-सोशल मीडिया)
मयुरेशने या स्पर्धेसाठी नाशिकच्या अस्मितेचे प्रतीक असलेल्या गोदाकाठचे मंदिर आणि वाडा यांचे जलरंगातील (Watercolor) सुंदर चित्र साकारले होते. नाशिकच्या प्राचीन वास्तुकलेचा वारसा आणि गोदावरीच्या काठावरील शांतता मयुरेशने आपल्या कुंचल्यातून कागदावर जिवंत केली. त्याच्या या कलाकृतीने आंतरराष्ट्रीय परीक्षकांचे लक्ष वेधून घेतले.
या स्पर्धेत जगभरातील ६ ते १९ वयोगटातील हजारो तरुण कलाकारांनी सहभाग घेतला होता. वॉटरकलर, एक्रेलिक, ऑइल आणि मिक्स्ड मीडिया अशा विविध माध्यमांचा वापर करण्याची मुभा असल्याने ही स्पर्धा अत्यंत आव्हानात्मक आणि स्पर्धात्मक होती. अशा अटीतटीच्या स्पर्धेत मयुरेशने आपल्या कौशल्याच्या जोरावर ९० ते १०० गुण मिळवून ‘स्टार आर्टिस्ट’ हा सर्वोच्च किताब पटकावला.
या स्पर्धेचे परीक्षण जागतिक दर्जाच्या तज्ज्ञांनी केले. यामध्ये युनायटेड किंगडमच्या द युनिव्हर्सिटी ऑफ डर्बी येथील व्हीनस बेहजाती आणि इजिप्तच्या हेलवान युनिव्हर्सिटीच्या डॉ. घादा एल झायात यांसारख्या दिग्गज कलाकारांचा समावेश होता. सर्जनशीलता, नावीन्य आणि सादरीकरण या ‘ICEPAPA’ निकषांवर मयुरेशची कलाकृती सरस ठरली.
या यशाचा भाग म्हणून मयुरेशच्या चित्राचे प्रकाशन पिकासो आर्ट कॉन्टेस्टच्या अधिकृत वेब प्लॅटफॉर्मवर केले जाणार आहे. तसेच, त्याला जागतिक स्तरावरील ‘हॉल ऑफ फेम’ मध्येही स्थान देण्यात आले आहे. मयुरेशने यापूर्वीही अनेक प्रदर्शने आणि स्पर्धांमध्ये आपल्या कलेचा ठसा उमटवला असून, त्याच्या या यशाबद्दल सर्व स्तरांतून कौतुक होत आहे.
.png "Videos"){kind=small}
