लघुशंकेच्या कारणावरून दोन गटात हाणामारी, नेमकं काय काय घडलं?

लघुशंका करण्याच्या किरकोळ वादातून दोन गटात तुंबळ हाणामारी झाली आहे. ही घटना दिनांक १६ डिसेंबर रोजी सांगोला शहरातील मुजावर गल्ली येथे घडली आहे.

सांगोला : लघुशंका करण्याच्या किरकोळ वादातून दोन गटात तुंबळ हाणामारी झाली आहे. ही घटना दिनांक १६ डिसेंबर रोजी सांगोला शहरातील मुजावर गल्ली येथे घडली आहे. याबाबत, फिरदोस अल्लारखा खतीब (रा. मुजावर गल्ली, सांगोला) व पंडित बळीराम सुरवसे (रा. कडलास नाका, सांगोला) यांनी गुरुवार दिनांक १ जानेवारी रोजी सांगोला पोलिसात परस्परविरोधी फिर्याद दिली. याप्रकरणी पोलिसांनी पंडित सुरवसे, अमित सुरवसे, सुधीर वर्मा यांच्यासह दोघा अज्ञातांवर तसेच मोहसीन खतीब, अल्लारखा खतीब, मोहम्मद मुलाणी यांच्यासह पाच अज्ञातांवर गुन्हा दाखल केला.

पंडित सुरवसे यांनी दिलेल्या फिर्यादीनुसार दिनांक १६ डिसेंबर रोजी रात्री ११:३० वाजण्याच्या सुमारास संशयित मोहसीन खतीब, त्याचा भाऊ अल्लारखा खतीब, मोहमद मुलाणी इतर ४ ते ५ जणांनी जातीवाचक शिवीगाळ करत तुला बघून घेतो असे सुरवसे यांना व त्यांचा मुलगा अमित सुरवसे यांना लोखंडी सळईने, हातांनी, लाथाबुक्क्यांनी मारहाण केली.

तर फिरदोस अल्लारखा खतीब यांनी दिलेल्या फिर्यादीनुसार खतीब यांच्या घराच्या बाजूला पंडित सुरवसे यांचा कामगार सुधीर वर्मा हा लघुशंका करीत होता. त्यावेळी खतीब यांच्या पतीने त्याला जाब विचारला असता पंडित सुरवसे, अमित सुरवसे, सुधीर वर्मा व अज्ञात दोघांनी शिवीगाळ करून लाथाबुक्क्यांनी मारहाण केली असल्याचे फिर्यादीत म्हटले आहे.

हे सुद्धा वाचा : चोरट्याने ‘ॲपल’चे घड्याळ चोरले अन् घबाडच…; सासवड पोलिसांची धडक कारवाई

जेलमधून बाहेर आला अन् तिघांना तोडला

पुण्यात गुन्हेगारीचे प्रमाण मोठ्या प्रमाणात वाढले आहे. पुण्यातील वेगवेगळ्या भागातून दररोज गुन्हेगारीच्या घटना उघडकीस येत असतात. टोळक्यांकडून वाहनांची तोडफोड व दहशत माजविण्याच्या घटना घडू लागल्या आहेत. अशातचं गेल्या काही दिवसाखाली कारागृहात राहून आलेल्या सराईत गुन्हेगार व त्याच्या साथीदारांनी तीन तरुणांवर किरकोळ वादातून तीक्ष्ण शस्त्राने वार करून त्यांना जीवे ठार मारण्याचा प्रयत्न केल्याची घटना मुंढवा परिसरात घडली. एक महिन्यापुर्वीच सराईत कारागृहातून बाहेर आला होता. याप्रकरणी मुंढवा पोलीस ठाण्यात महेश गजसिंह उर्फ दाद्या उर्फ डी याच्यासह दोन ते तीन अनोळखी साथीदारांवर गुन्हा नोंद करण्यात आला आहे. या हल्यात अजय हनुमंत पवार (वय ३१), अमित राजेश परदेशी (वय २६) व सोहेश अलमले (वय २६) हे तिघे जखमी झाले आहेत. याबाबत तुषार मेमाणे (वय २८) यांनी तक्रार दिली आहे.