पोलीस ठाण्यासमोरच दोन गटात हाणामारी; जयसिंगपुरमध्ये नेमकं काय घडलं?

जयसिंगपूर पोलीस ठाण्यासमोरच दोन गटामध्ये हाणामारी झाल्यामुळे जयसिंगपूर पोलीस ठाण्याचा धाक कमी झाल्याचे दिसून येत आहे.

• पोलीस ठाण्यासमोरच दोन गटात हाणामारी
• पोलिसांनी केली मोठी कारवाई
• नेमकं काय घडलं?

जयसिंगपूर : राज्यासह देशभरात गुन्हेगारीच्या घटनांमध्ये मोठी वाढ झाली आहे. दररोज वेगवेगळ्या भागातून, खून, हाणामाऱ्या, लुटमार यासारख्या घटना उघडकीस येत असतात. अशातच आता कोल्हापुर जिल्ह्यातून एक मोठी घटना समोर आली आहे. पोलीस ठाण्यासमोर उदगाव येथील दोन गटामध्ये झालेल्या भांडणाची तक्रार देण्यासाठी पोलीस ठाण्यासमोर आल्यानंतर परत वाद होऊन हाणामारी झाल्याचा प्रकार समोर आला आहे. यामुळे जयसिंगपूर पोलीस ठाण्यासमोरच दोन गटामध्ये हाणामारी झाल्यामुळे जयसिंगपूर पोलीस ठाण्याचा धाक कमी झाल्याचे दिसून येत आहे.

उदगाव येथील संशयित आरोपी माहेश्‍वरी राजेंद्र पाटील व श्रीवर्धन शिरीष वरेकर हे एकमेकांच्या विरोधात तक्रार देण्यासाठी पोलीस ठाण्यात आले होते. त्यावेळी त्यांनी आमच्या गावातील वाद आहे, आम्ही गावात जावून बैठक घेतो, असं सांगून पोलीस ठाण्यातून निघून गेले. यावेळी संशयित आरोपी राजेंद्र बंडू पाटील (वय ४२), युवराज राजेंद्र पाटील (वय २०), गंधराज राजेंद्र पाटील (वय १९), मंगल बंडू पाटील (वय ४०), शरद पांडूरंग लुगडे (वय ४२), शिरीष तुकाराम वरेकर (वय ६०), हेमलता वरेकर (सर्वजण, राहणार, माळवाडी उदगाव, ता. शिरोळ) एकमेकाशी वाद करून एकमेकाशी भांडण करीत असताना एकमेकांना शिवीगाळ करून हाताने व लाथाबुक्क्यांनी मारहाण करीत होते.

पोलिसांच्या समक्ष वादविवाद करून भांडण तंटा केला असल्याने पोलीस कॉन्स्टेबल फारूख अस्लम जमादार यांनी दिलेल्या फिर्यादीनुसार जयसिंगपूर पोलिसात गुन्हा दाखल करण्यात आला आहे. पोलीस निरीक्षक सत्यवान हाके यांच्या आदेशाने पोलीस हेड कॉन्स्टेबल कांबळे हे अधिक तपास करत आहेत.