पुण्यात सायबर चोरट्यांचा धुमाकूळ; ज्येष्ठाला अटक करण्याची भिती दाखवली अन्…

मुलाला अत्याचाराच्या गुन्ह्यात अटक करण्याची भीती दाखवून सायबर चोरट्यांनी ज्येष्ठ नागरिकाची अडीच लाख रुपयांची फसवणूक केली आहे.

संग्रहित फोटो

Follow Us:

Follow Us:

पुणे : मुलाला अत्याचाराच्या गुन्ह्यात अटक करण्याची भीती दाखवून सायबर चोरट्यांनी ज्येष्ठ नागरिकाची अडीच लाख रुपयांची फसवणूक केली आहे. सायबर चोरट्यांनी आता नवीन क्लुप्ती वापरण्यास सुरूवात केली असल्याचे यावरून दिसत आहे. याप्रकरणी अज्ञात सायबर चोरट्यांवर सहकारनगर पोलीस ठाण्यात गुन्हा दाखल केला आहे. याबाबत ७१ वर्षीय ज्येष्ठ नागरिकाने तक्रार दिली आहे.

तक्रारदार पर्वती भागात राहायला आहेत. चोरट्यांनी त्यांच्या मोबाइलवर २७ ऑगस्ट रोजी संपर्क साधला. धीरज कुमार असे नाव सांगत केंद्रीय गुन्हे अन्वेषण विभागात (सीबीआय) अधिकारी असल्याची बतावणी केली. तुमच्या मुलाला अत्याचाराच्या गुन्ह्यात अटक करण्यात येणार असून, मुलासह नातेवाईकांचे नावही गुन्ह्यात टाकण्यात येणार आहे. कारवाई टाळण्यासाठी तातडीने पैसे जमा करा असे सांगितले. नंतर ज्येष्ठ नागरिकाने वेळोवेळी चोरट्यांनी सांगितलेल्या खात्यावर २ लाख ४९ हजार रुपये जमा केले. परंतु, सातत्याने पैश्यांची मागणी होत असल्याने त्यांनी याबाबत इतरांशी चर्चा केली. तेव्हा त्यांना फसवणूक झाल्याचे लक्षात आले.

हे सुद्धा वाचा : पुणे पोलिसांची मोठी कारवाई; जैन मंदिरात घुसून चोऱ्या करणाऱ्याला घेतले ताब्यात

गुंतवणुकीच्या आमिषाने २३ लाखांची फसवणूक

शेअर बाजारातील गुंतवणुकीच्या आमिषाने सायबर चोरट्यांनी दोन तरुणांची फसवणूक केली. याप्रकरणी चतु:शृंगी आणि चंदननगर पोलीस ठाण्यात गुन्हे दाखल केले आहेत. गोखलेनगर भागातील २७ वर्षीय तरुणाला गुंतवणुकीचे आमिष दाखवून चोरट्यांनी १६ लाख रुपये उकळले. तसेच वडगाव शेरी भागातील ३४ वर्षीय व्यक्तीची गुंतवणुकीच्या आमिषाने सहा लाख रुपयांची फसवणूक करण्यात आल्याचा प्रकार उघडकीस आला आहे.

फसवणुकीचे प्रमाण वाढले

पुण्यात फसवणूकीचे प्रमाण मोठ्या प्रमाणात वाढले आहे. गेल्या काही महिन्याखाली सायबर चोरट्यांनी वेगवेगळ्या घटनेत दोन ज्येष्ठ नागरिकांच्या बँक खात्यातून ७० लाख रुपये ऑनलाइन पद्धतीने पळविल्याचे समोर आले आहे. याबाबत ६७ वर्षीय ज्येष्ठ नागरिकाने चतु:शृंगी पोलीस ठाण्यात तक्रार दिली आहे. तक्रारदार पाषाण भागात राहायला आहेत. सायबर चोरट्यांनी सप्टेंबर महिन्यात त्यांना सोशल मिडीयाच्या माध्यमातून एक मॅसेज पाठविला. त्यात त्यांना एका गुन्ह्यात तुमचे नाव असल्याचे सांगत आम्ही पोलीस असल्याची बतावणी केली. पोलीस दलाचे बनावट ओळखपत्र देखील पाठविले. त्यामुळे त्यांचा विश्वास बसला. त्यांना तुमच्या बँक खात्यातून मनी लाँड्रिंगचा व्यवहार झाला आहे, असे सांगत याप्रकरणी कारवाई करण्यात येणार असल्याची भिती दाखवली. गुन्हा दाखल न करणे तसेच तपासात मदत करण्यासाठी सायबर चोरट्यांनी त्यांना तात्काळ पैसे जमा करावे लागतील, असे सांगितले. नंतर त्यांच्या बँक खात्याची गोपनीय माहिती घेतली. या माहितीचा गैरवापर करुन खात्यातून ४५ लाख रुपये ट्रान्सफर करून घेत त्यांची फसवणूक केली.

दुसऱ्या घटनेत टिळक रस्ता येथील एका ८४ वर्षीय ज्येष्ठ नागरिकाला देखील अशाच पद्धतीने २५ लाख रुपयांना गंडा घातला आहे. त्यांच्या मोबाइलवर संपर्क साधत त्यांच्या बँक खात्याची माहिती घेतली. चोरट्यांनी २५ लाख ४० हजार रुपये चोरले. चोरट्याने वेगवेगळ्या बँक खात्यात चोरलेली रक्कम हस्तांतरित केली आहे. गुन्हे शाखेचे पोलीस निरीक्षक मोरे तपास करत आहेत.

Web Title: A person has been cheated by showing fear of arrest in pune nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com