ट्रकचालकाचे नियंत्रण सुटले अन् होत्याचं नव्हतं झालं; मुंबई-बंगळुरू बाह्यवळण मार्गावरील धक्कादायक घटना

शुक्रवारी पहाटे भरधाव ट्रक एका वाहनावर आदळून ट्रक चालकाचा मृत्यू झाल्याची धक्कादायक घटना घडली आहे. या अपघातात ट्रकमधील दोन क्लिनर जखमी झाले आहेत.

• ट्रकचालकाचे नियंत्रण सुटले अन् होत्याचं नव्हतं झालं
• मुंबई-बंगळुरू बाह्यवळण मार्गावरील धक्कादायक घटना
• एकाचा मृत्यू, दोन जण जखमी

पुणे : राज्यासह देशभरात अपघाताच्या घटनांमध्ये मोठी वाढ झाली आहे. नवले पूल परिसरात सिग्नलवरील वाहनांना उडवून एका दुचाकीस्वाराला चिरडल्याची घटना ताजी असतानाच आणखी एक अपघात झाला असून, शुक्रवारी पहाटे मुंबई-बंगळुरू बाह्यवळण मार्गावर भरधाव ट्रक एका वाहनावर आदळून ट्रक चालकाचा मृत्यू झाल्याची धक्कादायक घटना घडली आहे. या अपघातात ट्रकमधील दोन क्लिनर जखमी झाले आहेत.

 

नासीर मोहम्मद शाह मोहम्मद चौधरी (वय ३६, सध्या रा. कुदळवाडी, मोशी रस्ता, चिखली, मूळ रा. कलवारीनानकार, जि. सिद्धार्थनगर, उत्तर प्रदेश) असे मृत्यू झालेल्या ट्रकचालकाचे नाव आहे. अपघातात ट्रकमधील मदतनीस अर्जुनकुमार मौर्या (वय २४, सध्या रा. मोरे चौक, अशोक काॅलनी, चिखली) याच्यासह आणखी एक जण जखमी झाला आहे. याबाबत मौर्या याने आंबेगाव पोलिस ठाण्यात तक्रार दिली आहे.

पोलिसांच्या माहितीनुसार, ट्रकचालक नासीर चौधरी हा शुक्रवारी पहाटे साडेतीनच्या सुमारास बाह्यवळण मार्गावरुन भरधाव निघाला होता. जांभुळवाडीत भरधाव ट्रकचालक चौधरीचे नियंत्रण सुटले आणि तो एका वाहनावर आदळला. त्याचा वेग इतका होता की, अपघातात ट्रकच्या केबीनचा चुराडा झाला. त्यात चालक चौधरीसह क्लिनर मौर्या आणि आणखी एक जण जखमी झाले.

अपघाताची माहिती मिळताच पोलिसांनी घटनास्थळी धाव घेत अपघातग्रस्त वाहने क्रेनच्या सहायाने बाजूला काढली. गंभीर जखमी झालेल्या चैाधरी याच्यासह तिघांना रुग्णालयात दाखल केले. मात्र, उपचारांपूर्वीच चौधरी याचा मृत्यू झाला होता. उपनिरीक्षक मारुती वाघमारे अधिक तपास करत आहेत.

हे सुद्धा वाचा : दर्शन घेऊन परतताना काळाचा घाला! नेपाळमध्ये भारतीय भाविकांची बस दरीत कोसळली; ७ पर्यटकांचा मृत्यू, अनेक जखमी

अवजड वाहनांनी शाळकरी मुलासह वृद्धाला चिरडले

मोबाईलवर बोलत चाललेल्या सिमेंट मिक्सर चालकाच्या बेदरकारपणामुळे मिक्सरची धडक बसून झालेल्या अपघातात सायकलस्वार शाळकरी मुलाचा बळी गेला आहे. ही घटना चिंचवड येथे एसकेएफ कंपनीजवळ गुरूवारी (दि. १२) दुपारी साडेबाराच्या सुमारास घडली आहे. तर, बुधवारी (दि. ११) रात्री पावणेदहाच्या सुमारास पुणे – आळंदी पालखी मार्गावर बोपखेल येथे ट्रेलरच्या धडकेत ७२ वर्षीय वृद्धाचा मृत्यु झाला आहे. या घटनांनी अवजड वाहनांमुळे निर्माण होणारी उद्योगनगरीतील अपघातांची गंभीर समस्या पुन्हा एकदा ऐरणीवर आली आहे. भरधाव ट्रक, डंपर, मिक्सर आणि कंटेनरमुळे दुचाकीसह इतर वाहनचालकांना आणि पादचार्‍यांना कायमच जीव मुठीत घेऊन रस्त्याने ये-जा करावी लागत आहे.