पुणे हादरलं! रुपाली बॉयफ्रेंडकडं राहायला गेली अन् रात्री 11 वाजताच्या सुमारास…

राजगुरूनगर शहराजवळील शिरोली येथे अनैतिक संबंधातून विवाहित महिलेचा धारदार हत्याराने गळा चिरून निघृण खून केल्याची धक्कादायक घटना उघडकीस आली आहे.

• राज्यासह देशभरात गुन्हेगारीच्या घटना वाढल्या
• पुणे जिल्ह्यात महिलेचा गळा चिरून खून
• धक्कादायक कारणही आलं समोर

राजगुरूनगर : राज्यासह देशभरात गुन्हेगारीच्या घटनांमध्ये मोठी वाढ झाली आहे. दररोज वेगवेगळ्या भागात खून, खुनाचा प्रयत्न, लुटमार, हाणामाऱ्या यासारख्या घटना घडत आहेत. पोलिसांनी गुन्हेगारीला आळा घालण्याची मागणी नागरिकांकडून केली जात आहे. अशातच आता पुणे जिल्ह्यातून एक धक्कादायक घटना समोर आली आहे. राजगुरूनगर शहराजवळील शिरोली येथे अनैतिक संबंधातून विवाहित महिलेचा धारदार हत्याराने गळा चिरून निघृण खून केल्याची धक्कादायक घटना उघडकीस आली आहे. ही घटना गुरुवारी रात्री साडेअकरा वाजण्याच्या सुमारास घडली असून, खेड पोलीस ठाण्यात या प्रकरणी खूनाचा गुन्हा दाखल करण्यात आला आहे.

खेड पोलीसांनी दिलेल्या माहितीनुसार, मृत महिलेचे नाव रूपाली विलास वाडेकर (वय ४६, मुळ रा. कल्याण, जि. ठाणे, सध्या रा. शिरोली, ता. खेड) असे आहे. संबधीत महिला मूळची ठाणे जिल्ह्यातील रहीवासी असून, गेल्या काही दिवसांपासून ती शिरोली येथे प्रियकराच्या घरी राहण्यास होती. संशयित आरोपी ललित दिपक खोल्लम (वय ३७, रा. शिंदेवस्ती, शिरोली, ता. खेड) याच्याशी रूपालीचे अनैतिक संबंध होते. दोघांमध्ये सतत भांडणे होत होती. त्याच रागातून ललितने रूपालीचा गळा चिरून खून केल्याचा प्राथमिक अंदाज आहे.

शिरोली येथील एका इमारतीत दुसऱ्या मजल्यावरील सदनिकेमध्ये ही घटना घडली. रात्री उशिरापर्यंत दोघांमधील भांडणाचे आवाज आल्याचे शेजाऱ्यांनी सांगितले; मात्र नंतर साडेअकरा वाजता रक्ताच्या थारोळ्यात पडलेल्या अवस्थेत महिलेचा मृतदेह आढळल्यानंतर एकच खळबळ उडाली. खेड पोलीस ठाण्यातील पोलीस हवालदार सुदर्शन सुखदेव माताडे यांनी याबाबत फिर्याद दिली असून, संशयीत ललित खोल्लम याच्याविरोधात खुनाचा गुन्हा दाखल करण्यात आला आहे.

संशयीत आरोपी यापुर्वी काही वर्ष एका गुन्ह्यात तुरुंगात शिक्षा भोगत होता. त्यापुर्वी ठाण्यात असताना दोघांचे प्रेमसंबंध जुळले होते. महिलेच्या पतीचे निधन झाले असल्याने ती नातेवाईकांकडे शिरोली येथे राहायला होती, असे पोलिसांनी सांगितले. या गुन्ह्याचा तपास पोलीस निरीक्षक सुभाष चव्हाण करीत आहेत, संशयीत आरोपी खोल्लम हा घटनेनंतर फरार असून पोलिस त्याचा कसून शोध घेत आहेत.