पसरणी घाटात भीषण अपघात; दोनशे फूट खोल दरीत कोसळली कार, दोघांचा मृत्यू (Photo : Accident)
वाई : पाचगणी रस्त्यावर पसरणी घाटात गुरुवारी सायंकाळी साडेचारच्या सुमारास चारचाकी फोर्ड एन्डेव्हर गाडीचा अपघात झाला. यामध्ये ही कार सुमारे दोनशे फूट खोल दरीत कोसळली. या अपघातात दोघांचा मृत्यू झाला, तर दोघे गंभीर जखमी झाले. हे सर्वजण लोणी काळभोर (पुणे) येथील आहेत.
महाबळेश्वरवरून वाईकडे येताना पसरणीच्या घाटात बुवासाहेब मंदिरानजीक, पालखी रस्त्याजवळ हा अपघात झाला. याबाबत घटनास्थळावरून मिळालेली माहिती अशी की, लोणी काळभोर येथील बजरंग पर्वतराव काळभोर, सौरभ जालिंदर काळभोर, अक्षय मस्कू काळभोर, वैभव काळभोर हे सर्व एन्डेव्हर कार (एमएच १२ क्यूटी ७७११) गाडीने कोकणामध्ये फिरण्यासाठी गेले होते. गुरुवारी सकाळी महाबळेश्वर येथे काहीवेळ फिरून माघारी पुण्याला जात होते. त्यावेळी सायंकाळी साडेचारच्या सुमारास बुवासाहेब मंदिराच्या खालील बाजूस पालखी रस्त्यानजीक कार सुमारे दोनशे फूट खोल दरीत कोसळली.
यावेळी मोठा आवाज झाला. घटना घडल्यानंतर थोड्या वेळातच घटनास्थळी पोलीस प्रशासन दाखल झाले. शिवसह्याद्री ट्रेकर्सच्या मदतीने व स्थानिक युवक पसरणीचे माजी उपसरपंच विशाल शिर्के, गणेश शिर्के, अजय शिर्के, अमोल महांगडे, प्रवीण शिर्के, आबा होमणे, अक्षय मोहिते, मोहित काकडे आदींनी जखमींना स्ट्रेचरवरून दोनशे फूट दरीतून वर काढले.
अपघातात दोघांचा मृत्यू; दोन जखमी
जखमींना नजीकच्या रुग्णालयात उपचारासाठी दाखल करण्यात आले. यापैकी दोघांचा मृत्यू झाला. अक्षय मस्कु काळभोर व सौरभ जालिंदर काळभोर अशी या दोघांची नावे असून, बजरंग पर्वतराव काळभोर व वैभव काळभोर हे गंभीर जखमी झाले आहेत. रात्री उशिरापर्यंत पोलीस प्रशासन घटनास्थळी व हॉस्पिटलमध्ये उपस्थित होते.
होळी पौर्णिमेच्या दिवशीच अपघात
होळी पौर्णिमेच्या दिवशी हा अपघात झाला. या अपघाताची माहिती मिळताच सिद्धनाथवाडी वाई येथील शिव सह्याद्री रेस्क्यू टीमच्या कार्यकर्त्यांनी व वाई पोलिसांनी घटनास्थळी धाव घेतली. जखमींना खोल दरीतून दोरखंडाच्या साह्याने बाहेर काढले. अपघाताच्या ठिकाणी बघ्यांची मोठी गर्दी झाल्याने अनेक वाहने रस्त्यावरच उभी राहिली. त्यामुळे घाटात वाहनांच्या मोठ्या रांगा लागल्या होत्या.
