(फोटो सौजन्य-सोशल मिडिया)
Columbus Marathi Movie Teaser : मराठी चित्रपटसृष्टीत वेगवेगळ्या विषयांवर आधारित चित्रपट प्रेक्षकांच्या भेटीला येत असतात. आता अशाच एका हटके कथानकाचा चित्रपट लवकरच प्रेक्षकांच्या भेटीला येणार आहे. ‘कोलंबस’ असे या चित्रपटाचे नाव असून नुकताच या चित्रपटाचा टीझर सोशल मीडियावर प्रदर्शित करण्यात आला आहे. अभिनेता अंकुर वाढवे या चित्रपटाच्या निमित्ताने एका अनोख्या इंडस्ट्रीमध्ये प्रवेश करणार आहे. त्यामुळे या चित्रपटाच्या कथानकाबद्दल प्रेक्षकांमध्ये उत्सुकता निर्माण झाली आहे. हा चित्रपट येत्या ११ डिसेंबरला संपूर्ण महाराष्ट्रात प्रदर्शित होणार आहे.
‘कोलंबस’ चित्रपटाची कथा कैलास नावाच्या तरुणाभोवती फिरते. केवळ तीन फूट उंची असलेल्या कैलासने शिक्षक होण्याचे स्वप्न पाहिलेले असते. त्यासाठी त्याने उच्च शिक्षणही घेतलेले असते. मात्र, शिक्षणाचे खासगीकरण आणि सरकारी शिक्षक भरती न होणे अशा विविध अडचणींमुळे त्याचे शिक्षक होण्याचे स्वप्न अपूर्ण राहते. अशातच त्याला थेट अमेरिकेतून एका वेगळ्याच इंडस्ट्रीमध्ये काम करण्याची संधी मिळते.
ही नेमकी कोणती इंडस्ट्री आहे? कैलास या संधीचा स्वीकार करतो का? या अनोख्या क्षेत्रात प्रवेश केल्यानंतर त्याच्या आयुष्यात काय बदल होतात? अशा अनेक प्रश्नांची उत्तरे चित्रपटातून मनोरंजक पद्धतीने उलगडणार आहेत.
View this post on Instagram
अंकुर वाढवेसह दमदार कलाकारांची फौज
एस. एस. आर. फिल्म्स प्रस्तुत ‘कोलंबस’ या चित्रपटाची निर्मिती सतीश नाईक, रोहित गुप्ता आणि सनोबर लाकडावाला यांनी केली आहे. रवींद्र शिवाजी यांनी चित्रपटाचे दिग्दर्शन केले आहे. चित्रपटात अंकुर वाढवे, रोहित माने, ‘सातारचा बच्चन’ म्हणून ओळखले जाणारे किरण माने, सिमरन खेडकर, अश्विनी भांडे, प्रसाद माने, हेमंत शिंदे, चंद्रकांत मोकल आणि संस्कार हिरे हे कलाकार महत्त्वपूर्ण भूमिकांमध्ये दिसणार आहेत.
चित्रपटाचे छायालेखन गौरव कुलकर्णी यांनी केले असून रोहन पाटील आणि सुयश जाधव यांनी संकलनाची जबाबदारी सांभाळली आहे. वैभव शिरोळे यांनी संगीत दिग्दर्शन केले आहे, तर चैतन्य पिसाळ यांनी लेखन आणि क्रिएटिव्ह दिग्दर्शन केले आहे. रोहित नागभिडे यांनी पार्श्वसंगीत दिले आहे. आनंद शिंदे आणि कैलास वाघमारे यांनी चित्रपटातील गाणी गायली आहेत. मुकुंद हंगेकर यांनी कार्यकारी निर्मात्याची जबाबदारी सांभाळली आहे.
‘कोलंबस’ हे केवळ मनोरंजन करणारे कथानक नसून त्यातून आजच्या तरुणाईची मनोवस्था, रोजगाराची समस्या आणि ग्रामीण भागातील परिस्थिती यांवरही भाष्य करण्यात आले आहे. शिक्षण घेऊनही नोकरी न मिळाल्यामुळे तरुणांसमोर निर्माण होणारे प्रश्न आणि त्यातून मार्ग काढण्यासाठी करावे लागणारे वेगळे प्रयत्न या चित्रपटातून हलक्याफुलक्या शैलीत मांडण्यात आले आहेत. हटके कथानक, दमदार कलाकार आणि विनोदी मनोरंजनाची जोड असलेला ‘कोलंबस’ येत्या ११ डिसेंबरला चित्रपटगृहांत प्रदर्शित होणार आहे.






